Wa Sarabyin: Garan Kachyan Mu, Shaloi, Karai Kasang, Nanhte A Kumhpa Hpe Shalaw Jahtam Ya Na Ra Ai

July 25, Laban ya shani, “Madu A Lamu Kasa Akyu Hpyi Ga” tsun ten Wa Sarabyin Francis, garum jaw garum ya ai kaji kajaw rai sha raitim, Madu Karai Kasang shalaw jahtam ya na re lam, garum jaw garum ya ai hta shawang myit kaba hte jaw na matu masha hkum ngau shagu hpe Karai Kasang saw shaga nga ai re lam, garum jaw garum ya ai, shing n rai, garan kachyan ya ai gaw tsawra myit hpe shatsaw sharawt shalaw jat ya ai rai nna, Karai Kasang a mauhpa magam hpe galaw ai hta shang lawm ai mung rai nga ai lam ga hpaw hta tsun n-gun jaw da nga ai.

Mungga hpe dai shani hti ang ai Kabu Gara Shiga Chyum daw (Pope Francis reflected on the Gospel for the day) hpe lakap nna hkaw tsun da ai rai nga ai. Muk tawng manga hte nga lahkawng hpe akyu hpyi shaman let shalaw jahtam nna masha hking manga (5,000) law htam hkra jaw sha nna, mung shi lahkawng (12) jan ngam ai lam rai nga ai. Madu Yesu gaw muk hte nga hpe hpa n nga ai, kaman kaw nna hpan dat ai gaw n rai nga ai; ma langai mi kaw nna kasa ni hpyi ya ai muk hte nga hpe shalaw jahtam ya ai rai nga ai.

Ma kasha jaw ai muk hte nga gaw n law la ai raitim, shawang myit hte jaw ai kumhpa rai nga ai. Masha hkying manga a matu dai muk hte nga gaw grai nan n law la ai raitim, dai lusha madu, ma a shawang myit kaba ai majaw dai n law la ai lusha hte masha law law hpe jaw sha lu ai rai nga ai.

Ndai mabyin hpe sumru yu yang, anhte a shawang myit hte jaw ai gaw kachyi mi sha raitim, dai hpe Karai Kasang shalaw jahtam ya nga ai hpe hkap la kam sham lu ga ai. Dai majaw anhte gaw shani shagu tinang hkum hpe, “Ngai daini Yesu kaw hpa kumhpa la sa ya sai kun?”, ngu san dinglik nga ra ga ai. Yesu Madu gaw anhte a akyu hpyi ga ni, anhte a matsan dum lama ai myit, anhte a alu atan ni, anhte a nni nkri hkam sharang ai lam ni hpe chyeju kumhpa law law hpe shalaw jat ya let mauhpa lamik kumla ni hpe madun dan ya nga na rai nga ai. Ndai gaw Karai Kasang anhte hpe tsaw ra ai lam madun ai mung rai nga ai.

Myihtoi ni hte Kanu Nu Maria mung Kachyi mi sha raitim garum jaw garum ya ai lam hpe madun dan ma ai. Anhte ni garum jaw garum ya na myit ai hpe gunglau pat shingdang ai ya chye ai lawt lam tam myit ni anhte hta nga wa chye ga ai. Masha hpe garum na n law la ai, myi man kahtep hpa re ai, shing n rai, tingkyen a matu mahkawng shalaw da ra ai, ngu myit ai lam ni gaw anhte a hpu nau ni hpe garum jaw garum ya na lam hpe pat shingdang ya ai, gunglau ai, dingbai dingna jaw ai, shut sai ai myit masa ni rai nga ai. Hpa sha raitim, kachyi mi sha raitim, lama ma hpe shagaw ra kadawn nga ai hpu nau ni hpe jaw lu hkra shakut ra ai. Dai zawn garum jaw garum ya ai gaw kachyi mi sha raitim, Karai Kasang shalaw jat ya nga ai hpe Ja chyum mungga hta Madu Yesu hkum nan sharin sara langai hku nna, sakse galaw dan sai rai nga ai.

Chyum laika hta na, ma zawn nden ja myit hpe tawn da nna, kachyi mi sha raitim, garum jaw garum ya gwi ra ai. Garum jaw garum ya ai ngu ai hta anhte a n-gun, a tsam marai, kungkyang ai lam ni, anhte a aten ni hpe Yesu Madu hte hpu nau ni a matu jaw ya ai hpe mung tsun ai rai nga ai. Nang, ngai lama garan gachyan ai rai yang, Karai Kasang gaw teng sha shalaw jahtam ya na ra ai, ngu Wa Sarabyin Francis, laban shani, San Peter Pa hta, “Madu a Lamu Kasa Akyu Hpyi Ga” tsun ten, hpung shawa masha ni hpe mungga htawn da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

25 July 2021, 12:28

https://www.vaticannews.va/en/pope/news/2021-07/pope-at-angelus-share-and-god-will-multiply-your-gifts.html