Wa Sarabyin Francis Tsun Ai Mungga : Manu Jahpu Law Law Htum Hkrat Ra Tim Dai Makam Masham Hta Myit Jung Nga Ga.

 

Lai wa sai Laban Shani Angelus kata hta Wa Sarabyin Francis gaw sadi dung let kam sham nga ai Hpung masha ni hpe “ myit lawm hkum lawm re ai lam ni hte jahten shamat kau chye ai lam ni hpe n galaw taw ai sha , tinang a wenyi sak hkrung hkawm sa ai lam a matu ahkyak dik re ai lam ni hpe shawng tam nna, galaw hkawm sa nga na matu saw lajin da nga ai.

Manu jahpu jaw ra ai lam, ap nawng ai lam, (or) shang lawm na hta hkrit tsang ai myit nga ai ni hpe makam masham lam hta ru jung let, myit mada ai lam ni hpe n shayawm kau ai sha, tinang a aten hte manu jahpu jaw let mari la ai rai yang Karai Kasang kaw na myit ngwi myit sim sa ai chyeju hkam la lu na re lam  “ Madu Yesu” gaw anhte hpe saw shaga nga ai nga nna Wa Sarabyin hku nna tsun lai wa ai.

Wa Sarabyin Francis gaw “ Makam masham hpe tinang a myit machye machyang hte shingdaw sumru ai lam nmai galaw nga ai lam hpe “ lai wa sai Laban shani Angelus kaw nga ai St. Peter Square kaw sa du ai kam sham ai hpung masha ni hpe tsawra myit hte shadum jahprang ai lam rai nga ai.

Wa Sarabyin Francis gaw “ Madu A Kabu Gara Shiga” hpe myit dum ai hte, Madu Yesu gaw shi a sape ni hpe masum lang ting kahtap nna “ Hkum Hkrit Mu” ngu nna shadum jahprang let, shanhte kaw du wa na yak hkak jam jau lam ni hte “ Madu A Kabu Gara Shiga” a majaw hkrum sha ra na nni nhkri lam ni hpe hkam jan lu na matu, tsun da lai wa sai lam hpe, myit dum ai hte tsun shana lai wa ai mung rai nga ai.

Akyu Nnga ai Lam Ni Hpe Galaw Nga Nna Asak Sum Mat Chye Ai Lam Wa Sarabyin Francis gaw “ Kawa Karai Kasang a Mungdan hpe “Myit simsa ai hte Tara Rap Ra Ai Hku Daw Dan Ai Lam” ngu nna lachyum shaleng sawk shagawn da nga let, Anhte yawng gaw shada da tinang a Kahpu Kanau ni hpe tsawra ai hte mara dat ya hkat ra ai lam hpe tsun shadum nga ai. Ya na prat hta byin nga ai masa ni gaw shada da ningdang ningle ai hte adup zingri roi rip hkat ai lam ni hkrai rai wa nga ai. Dai majaw Nawku Hpung ngu ai hta “ Kaba dik ai kabu gara myit masin myit simsa lam hte “ shada da ningdang ningle zingri zingrat re ai lam” ni hpe atsawm sha chye ginhka da ra nga ai nga nna mung tsun lai wa sai.

Madu Yesu gaw “Hkum Hkrit Mu” ngu nna tsun da nga ai hta, De a lachyum gaw ; ndai Mungkan ga hta naw nga nga yang yak hkak jam jau lam ni hpe n hkrum katut na ngu nna tsun ai nre, yak hkak jam jau lam ni du pru hkrum sha wa tim dai lam ni mahkra gaw Kawa Karai Kasang a matu re ngu nna myit la ra nga ai. Anhte ni gaw Karai Kasang a manu dan ai kashu kasha ni rai nga ai majaw, anhte hta e, hkra machyi, sum wa na lam, hpa n nga ai” ngu nna mung tsun lai wa ai.

“ Masha Langai a asak hpe manu n shadan, jahten shaza kau na malai Madu Yesu hpe hkrit hkungga nga ra ai lam” hpe Wa Sarabyin tsun ai.“ Nmai hkrit ai lam langai mi nga ai : Dai gaw ; Madu A Kabu Gara Shiga a majaw, masha a chye na shut ai lam ni hpe hkam sha ra ai, masha a shatan n hkan dawdan jeyang ai lam ni hpe hkrum na ra ai, tinang a sari shadang hpoi hkrum ai, Kanbau amu bungli hta hkra machyi hkrat sum ra na lam ni rai nga ai. Dai zawn re hkum hkra wa na hpe hkit nna, tinang a prat hta hpa lachyum nnga ai lam ni hte aten shama kau ai lam hpe n mai galaw nga ai” nga nna Wa Sarabyin hkaw tsun lai wa ai.

Anhte Yawng hte Seng Ai Lam

Wa Sarabyin Francis gaw “ Ya, Dai ni na prat madang ni hta prat madang tsaw wa ai Models ni, arai lama ma ni hpe n-gun njaw hkrup, nhkap la ai rai yang nkaw nlaw re ai jahpoi jahpyak ai hte masha hpe madang ntsaw ai nga nna jut de da kau ai prat rai nga ai. Dai lam ni gaw No.(2) hku na ahkyak ai lam hpe No.(1) hku nna shara da wa ai majaw rai nga ai. Ya na prat madang hta, Shinggyim masha ni a malai  jak rung jak rai ni hpe shara jaw wa ai, shada da kanawn mazum ai lam hta grau nna ntsa lam rai wa ai hte tinggyeng akyu ni hpe sha tam galaw wa ai ni hpe she, shara jaw wa ai lam” a matu mung Sadi jaw, Shadum jahprang lai wa ai.

Wa Sarabyin hku nna, Ningmu jahpaw tsun da ai lam hta, “ Kanu Kawa ni mung, tinang a dinghku nta masha ni a matu shakut shaja ai nga nna, bungli hta hkrai aten jaw kau ai lam n galaw ai sha, tinang a kun dinghku nta masha ni, ma ni hpe mung aten jaw ra ai lam”  tsun shadum lai wa ai.

Bai nna, Wa Sarabyin gaw Jau ni, Ma Ma ni hpang de kayin let “ Shanhte gaw Madu a mu magam hpe gun hpai na matu ga sadi jaw da sai ni rai nga ma ai; raitimmung Madu Yesu hte aten la, matut makai ai lam n nga wa nna, malap mali ai ni rai yang tinang a asak wenyi hkrung lam hta hkrat sum ai ni rai nga ma ai” nga nna mung tsun lai wa ai.

Hpang jahtum, Wa Sarabyin gaw asak ram ai Ramma shayi Shadang sha ni hpe “ Ramma ni ngu ai gaw , hkan nang hkan sa galaw ra ai magam bungli grai law ai ni rai nga ai; Jawng lung ra ai, ginsup ai lamang ni, myit lawm hpa amyu myu, mobile phones hte social networks ni hta aten law law jaw da nga ma ai. Shanhte hta kaja wa ra dik ai lam ni gaw masha hte hku hkau kanawn mazum chye wa na matu hte tinang a prat pandung yaw shada da lam masing kaba ni sha rai nga ai. Raitim dai lam ni hpe n galaw lu nna, hpa nre ai, akyu n rawng ai lam ni hta aten jahtum kau na hpe grai tsang ra nga ai” nga nna mung shadum sharin tsun lai wa ai.

Ndai Hka ( myit yaw Shada pangdung) Hpe Lai Di Lu Na Matu, Nkau Mabyin Masa Ni hpe Chye Na Let Dat Kau Ra Ai Lam

Wa Sarabyin Francis gaw “ Galaw lu ai atsam ni hte sawn dangdi lu ai atsam ni hpe shagrit kau nna, hkawm sa ra ai aten ni grai nga na sai. Raitim dai shagrit kau ra ai, mabyin ni hta tinang a ahkyak dik ai myit masin yaw shada lam ni hpe mung, kabai shamat nna, asum jaw kau ai lam n nga na gaw, ahkyak dik rai nga ai” nga nna tsun lai wa ai.

Wa Sarabyin tsun ai gaw “ Mungkan hkaleng hta myit lawm hkum lawm kanawng hkawm ai masha ni myit ai hku, n myit ai sha tinang a makam masham yaw shada ai lam hta arang bang, manu jahpu jaw let hkawm sa ra nga ai. Mungkan Hkaleng hta kanawng hkawm ai ni zawn sha nga ai rai yang, lani mi hta dai hkalen ni gaw tinang hpe ahtu galau kau da na hpe tsang ra nga ai lam” mung tsun lai wa ai.

Madu Yesu gaw anhte hpe tsun da nga ai : Anhte a prat hta kaja dik sak hkrung hkawm sa lam ni hte  kaja dik, ahkayak dik ai lam ni hpe n kabai shamat kau na grau sadi ra nga ai.

Anhte Tinang Hkum Hpe Tinang Bai San Dinglik Yu Nga Ga: Ngai Kaning Re Ai Lam Ni Hpe Grau Hkrit Nga Ai Kun ? Ngai Hpa Hpe Hkrit Nga Ai Kun ?

Ngai Ra Sharawng Ai Lam N Nga Ai A Majaw , Ndai Masha Wuhpung Wuhpawng Ni Masat Da Ai Shara, Yaw Shada Lam Pandung Ni Hpe N Du Lu Sai Kun?

Masha Ni Dawdan Ai Hku Sha, Ngai Nga Ra Shana Kun?

Shing nrai,..... Madu A Kabu Gara Shiga hpe shawng ntam, nhkap la nna, Karai Kasang a myit sharawng awng ai lam hpe n hkan shadik ai wa rai nga ai Kun?

Ndai lam ni mahkra hta na gara hpe lata la ra na kun? Ngu ai hpe chye ginhka nna, jaw ai lam hpe lata la lu na matu, Nyan marai hpaji n-gun atsam jaw ya lu ai, Karai Kasang hpang de Chyoi Pra ai Nu Maria kawn akyu hpyi la nga ga ngu nna Wa sarabyin Francis gaw  hpang jahtum ga ginchyum dat  tsun lai wa ai.

Add new comment

10 + 9 =