Wa Sarabyin Francis : Shagrit Shanem Ai Hte Hpung Shingkang Madu Lu Na Matu Karai Kasang Anhte Hpe Shaga Nga Ai Ngu Shadum Ya Ai Shiga

Wa Sarabyin: Shagrit Shanem Ai Hte Hpung Shingkang Madu Lu Na Matu Karai Kasang Anhte Hpe Shaga Nga Ai Ngu Nu Maria Shadum Ya Ai

August 15, Chyoi Pra ai Nu Maria Sumsing Lamu De Woi Shalun La Hkrum Ai Laban shani, San Peteru pa hta, Madu A Lamu Kasa Akyu Hpyi ten, Wa Sarabyin Francis gaw “Shagrit shanem ai hte hpung shingkan madu lu na matu Karai Kasang anhte hpe saw shaga nga ai hpe Nu Maria shadum nga ai,” ngu Wa Sarabyin Francis mungga htawn da ai.

“Mary’s secret is humility”, Nu Maria a (ning ip, makoi magap taw ai) ahkyak lamyi gaw shagrit shanem ai lam re” ngu ai ga baw hte Wa Sarabyin Francis, dai shani, sumru woi da ai.

Karai Kasang gaw masin salum hpe madung yu ai. Nu Maria a shagrit shanem ai myit gaw Karai Kasang shi hpe azi yu na matu len la ai. Anhte shinggyim myi raitim, shinggan ntsa lam mu mada ai hpe yu ai ngu ai hta kata lam rai nga ai myit masin shagrit shanem ai a ahkyak ai hpe madung yu chye ga ai.

Nu Maria sumsing lamu de shalun la hkrum ai hpe sumru yu shagu, shi a shagrit shanem ai lam gaw shi hpe sumsing lamu ntsa de shalun la ai ahkyak lamyi madung rai nga ai hpe mu lu na ga ai. Sumsing lamu de lung wa lu na matu gaw anhte a shagrit shanem myit gaw grai ahkyak nga ai. Shagrit shanem ai ngu ai lachyum nga ai english ga si “humble” ngu ai ga si gaw latin ga “humus” “gayun” ngu lachyum nga ai ga si kaw na rai nga ai.

Anhte a kumhpa hte sutgan ni gaw Karai Kasang anhte hpe shagrau na hpe n lu galaw, n lu shabyin ai. Raitim, anhte a shagrit shanem ai, anhte a tsaw ra myit hte Karai Kasang hpe dau jau ai lam ni gaw Karai Kasang anhte hpe shagrau na lam ni rai nga ai.

Dai majaw anhte a prat hta tinang kade daram madang shagrit shanem ai, gara hku shagrit shanem ai ngu ai gaw grai ahkak ai. Dai hpe sumru dinglik shatsawm sa wa ra ai.

Masat masa galaw ya hkrum na, shakawn shagrau hkrum na matu tam galaw nga ga ai kun, shing n rai, dau jau lam hpe madung da shakut galaw nga ga ai kun?  Hpu nau ni hpe madat hkam sha ya nga ga ai kun, shing n rai, masha ni tinang hpe ra sharawng hkra galaw ai rai kun, shing n rai, tinang hpe ahkyak shatai mu ga matu galaw nga ga ai kun? Anhte gaw Nu Maria zawn hpu nau ni hpe madat hkam sha lawm nga ga ai kun? Myit pu myit tsang, n ju n dawng ai lam ni hpe shayawm shanem let ginlum kahkying gumding lam hpe tam nga ga ai kun, shing n rai, tinang tingkyen a matu sha hkawm nga ga ai kun? Ndai lam ni gaw anhte, tinang hkum hpe tinang bai san dinglik yu mai ai ahkyak ai ga san ni rai nga ai.

Nu Marai gaw shi a kaji kadun, shagrit shanem ai ahkyak lamyi a majaw sumsing sutgan hpe hkam la lu ai. Shi gaw Karai Kasang hte rau raitim shagrit shanem ai wa rai nga ai; Karai a man hta shi gaw kaji kadun wa rai nga ai hpe dum chye ai wa rai nga ai. Nu Maria gaw shi a shagrit shanem ai a majaw chyeju hte hpring ai wa tai wa ai.

Anhte a makam masham hkrun lam hta shagrit shenem let prat hpe hkawm hpang sa wa ra ga ai. Wenyi hta matsan mayan rai ra ga ai; ngu mayu ai gaw Karai Kasang hpe ra kadawn ai ni rai ra ga ai ngu ai rai nga ai; dai rai yang she Karai Kasang gaw anhte hta nau hpa kaba magam ni hpe shabyin ya na ra ai.

Nu Maria a prat hpe yu dat ga nga yang, mara gaw shi a tsawm htap ai lam hpe n jahten kau lu ai; lachyum gaw shi hkum nan dai mara n shut hpyi ai hpe tsun ai rai nga ai. Karai Kasang gaw shi hpe galoi mung tsaw ra myit hte azi yu nga ai.

Ndai gaw anhte a matu kaba dik la ai myit mada lam nan rai nga ai. Anhte hte maren sha shinggyim prat hpe tawt lai let yu maya prat hte shagrit shanem nna Karai Kasang hta kam hpa kam shamyet ai Nu Maria a kasi hpe hkam la let sak hkrung hkawm sa nga ra ga ai.

Nu Maria gaw shi zawn dai hpung shingkang hpe hkam la lu na matu Karai Kasang anhte hpe saw shaga nga ai ngu, anhte hpe shadum ya nga ai; ndai ga gaw na pyaw ai ga, tsawm htap ai ga sha n rai nga ai; kaja wa sha teng ai ga rai nga ai; dai prat hta teng sha sak hkrung ai rai yang, Nu Maria zawn sumsing lamu de shalun la hkrum na teng sha rai nga ai.

Mungga jahtum hta, Nu Marai gaw anhte a dinghta hkrun lam hta anhte hte rau rai let anhte hpe ndai mungkan kaw nna sumsing mungdan de woi shang wa u ga matu akyu hpyi let shagrit shanem myit hte gyip ai hkrun lam, makoi magap taw ai teng man jaw ang ai hkrun lam hta hkawm sa nga ga, ngu Wa Sarabyin Francis saw shaga da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-mary-reminds-us-that-god-calls-us-to-a-glorious-destiny.html