Wa Sarabyin Francis, Myu Shayi Ni Hpe Shakawn Shagrau Dat Ai

March 8, bat masum ya, Myu Shayi N'htoi, Hpung Shawa Masha ni hte  hkrum shga ten, Wa Sarabyin Francis, Myu Shayi Ni gaw shakawn ging ai ni rai ma ai, shanhte gaw si mani tsawm htap ai myit masin salum ni hte shinggyim wuhpung hpe gaw shatsawm lu ma ai, nga nna shakawn shagrau da nga ai.

Dai shani, Wa Sarabyin Francis, machyi makaw ai ni, sak kung dinggai dingla ni, dinghku n'nan de hpang ai ni, ramma ni yawng hpe mung hkalum shaga let Hkristu a lagaw hkang hpang hkan nang let Chyoi Pra Sanseng ai Chyeju hpe tam nga ga, ngu nna n-gun jaw ai.

Ukrine hte kaga tsin-yam hkrum  masha ni a matu akyu hpyi ya nga let, shanhte hte nihtep rau rai nga ga, nga nna mung saw shaga da ai.

"Woi awn ningshawng myu shayi ni law jat ai gaw grau ai mungkan hpe gaw gap lu ai," "More Women's Leadership for a Better World"  ngu ai ga baw hte, Wa Sarbyin Frnacis, shi a laika buk a 'ga nhpaw' hta: yawng hte seng ai anhte a dum nta, anhte a mungkan hpe makawp maga ra ga ai ngu tsun da ai.

Laika buk hpe, Anna Maria Tarantola jep shagrin nna, Bita e Pensiero kawn dip shapraw ai rai nga ai.

Laika buk gaw myu shayi ni hte madung seng ai: shanhte hta nga ai laklai atsam ni, galaw lu ai lam ni, kung kyang ai lam ni hte, shanhte hpe maren mara n hkap la ya ai lam ni, numja numjan rai gumshen hkrum ai lam, n tsen n hten hkrum ai lam ni gaw myu shayi ni a mungkan hta nga nga ai hpe tsun shapraw da ai hpe mu lu ai.

Anhte gaw rau magam gun ra ai, shi atsam hte shi, maren mara re ai ahkaw ahkang gaw myu shadang ni hte myu shayi ni lapran rap ra nga ra ai. Dai gaw n bung ai, shai hkat ai atsam ni hte bung ai myit mada bandung de rau hkawm ai rai nga ai, nga nna Wa Sarabyin Francis, shi a lakai buk hta tsun shadum da ai.

Numsha ni myit mang ai gaw lasha ni hte shai ai lam ni nga ma ai. Shanhte gaw makau grupyin hpe makawp maga na myit grau kaba ma ai, shawng lam myit mada lam grau kaba ma ai. Myu shayi ni gaw n'htoi gu nna shangai shaprat ten machyi kaba hkrum ai hpe dum chye nna, shangai shaprat dat ai hpang kabu pyaw lam kaba hpe hkam la lu ai hpe ta tut hkam sha ai ni rai ma ai. Asak jaw na, n'nan re ai tsawm htap ai makau grugyin hpe shabyin mayu ai myit kaba ma ai. Shanhte gaw simsa lam aten shagu nga nga na hpe sharawng awng ma ai.

Myu shayi ni gaw n-gun atsam hte si mani ai, myit shanem ai hpe rap ra shapraw dan lu ma ai. Shanhte gaw kaja ai sat lawat ni nga ma ai, madang hpring atsam nga ma ai, shanhte a kashu kasha ni hte rau prat naw kaji ai prat ban na masha ni a matu tau nau hkyen lajang shachyip da chye ma ai.

Shanhte gaw, n tara ai a majaw, tsan gang hkat nga ai hpe mung mu mada nna sharap shara, shani ya chye ma ai.

2019 shaning na International Women's Day, March 8 ya shani, "Myu shayi ni gaw tsawm grau mungkan hpe shabyin ai ni rai ma ai, mungkan hpe makawp maga nna sak hkrung nga lu shangun ai ni rai ma ai, nga nna tsun lai wa sai lam hpe mung, Wa Sarabyin Francis, kahtap tsun shana da nga ai. Simsa lam hpe myu shayi ni shaprat ma ai, kanu ni a si mani ai lailen a marang e dai simsa lam, jan zawn, rawt tsaw wa ai, nga nna, Wa Sarabyin tsun ai.

Dai majaw, myu shayi ni hpe yu dat shagu myit mada tawn ai simsa lam teng sha mu lu ai, nga nna mung tsun ai.

Kun dinghku kata sha n rai, mung masa lam yan ni hta, sut masa lam yan ni hta, hpaji hparat lam ni hta, bungli bungsi ginra ni hta, myu shayi ni a galaw lu ai atsam ni hpe manu shadan jai lang lu shangun ra ai, dai hpe makawp maga ra ai, nga nna mung tsun ai.

Dai ni na mungkan hta, numsha wan (130) daram gaw hpaji jawng n lung lu ma ai; shanhte gaw n tara ai hta, maren mara n re ai hta, democracy n nga ai hta, simsa lam n nga ai hta, nga ra nna hpaji hparat n lu sharin hkam la ma ai hpe mung Wa Sarabyin Francis madi madun da nga ai.

Fr. Patrick Gawmaw Hkawng Yae