Wa Sarabyin Francis A Mungkan Simsa N'htoi Mungga: Nsin Kaba Dik Aten Hta Pyi N'htoi Ngu Ai Nga Ai

image from Vatican website

Wa Sarabyin Francis a 2023 shaning, January langai (1) ya shani a matu "World Day of Peace" Mungkan Simsa N'htoi Mungga hpe December 16, bat manga ya shani, Vatican Shiga Dap kaw nna tau nau ndau shana da ma ai.

Tinghkrai nga ai wa kadai raitim, shimlum lam n lu ai. Kap bra ana kaba Covid-19 ana zingli hpe rau jawm gasat let simsa lam hta rau hkawm sa nga ga ai. Ndai ga si hte Wa Sarabyin Francis 2023 January 1 ya shani galaw na 56 lang ngu na mungkan simsa n'htoi, "World Day of Peace" a matu mungga tsun da ai.

Chyum mungga 1Htes 5:1-2 hpe lakap da ai.

"Hpu nau ni e, ndai lam ni byin wa na ra ai aten hte ahkying ladaw galoi rai na lam nanhte hpe ka dat shara n nga ai. Hpa majaw nga yang, Madu bai du sa na n'htoi gaw, shana aten e sa ai lagut zawn du sa na ra ai hpe anhte nan atsawm sha chye nga myit dai."

Myit n pyaw hpa mabyin ni byin pru wa ai shaloi, anhte a masin salum myit mada shara tawn da ra ai, Karai Kasang hta kam sham nga ra ai, myit nem ai hte Karai Kasang a hpang hkan ra ai. Shi anhte hpe lam madun ya nga ai.

Covid -19 ana tsin-yam gaw anhte a mungkan hpe nsin chyip byin shangun ai lam langai rai nga ai. Shinggyim masha ni a akyu ara law law hpe jahten kau shayawm kau ya lai wa sai rai nga ai.

Masum ning na lai wa sai hte maren, mahkrum madup kaba saga ai. Shawng lam a matu gara hku ladat shaw hkawm sa na hpe mung hka ja la lu saga ai. Bawngrin rawt jat lam a matu shinggyim wuhpawng hku nna mung, shinggyim masha shagu hku nna mung shawng lam a matu madung myit let, yak hkak lam ni bai galang n du n pru n shang jahten lu u ga, sadi maja nga ra ga ai lam Wa Sarabyin Francis shadum da ai.

Majan shabyin ai gaw shinggyim masha rai nga ai. Covid 19 ana kabra nna tsin-yam hkrum jam jau nga ai ten, mungdan nkau ni hta, grau nna Ukraine mungdan hta, majan hpe shabyin ma ai. Dai gaw shinggyim masha ni hta jam jau ai hta jam jau ai tsin-yam kaba rai nga ai. Dai gaw mara n lu ai ni hpe zingri ai, jahten ai, jasum kau ra ai lam rai nna myit yawn hpa kaba rai nga ai.

Dai hta, malu masha arung arai, kun arung arai yawng manu rawt kaba wa ai mung shinggyim masha ni hpe jam jau kaba jaw ai lam langai rai nga ai.

Teng sha, majan gaw anhte a hkum hpe jahten nga ai ana zingli hta grau kaaba ai ana zingli rai nga ai. Dai gaw anhte a shinggan de na n re ai, shinggyim masha ni a mara majaw htenza nga ai salum kaw na rai nga ai.

Anhte hkrum sha nga ai ginchyum chat ai lam, hkindang, mahkang ni a lapran anhte a masin salum ni hpe kaja ai de shatsawm lai la ra ai.

Shinggyim kyang lailen, shinggyim nga sat nga sa, shinggyim hku hkau lam, mung masa lam, sut masa lam ni hta gincyum chyat lam law law nga nga ai raitim shada matut mahkai hkridun nna shingtai hkamsha ai manghkang hpe hparan sa wa ra ai. Dai gaw langai hte langai kamhpa ai, madi shadaw hkat ai, akyu hkam sha ai lam ni rai nga ai, nga nna mung Wa Sarabyin Francis shadum jahhprang da ai.

Arawng aya kaba ai ni, lit nga ai ni, sak jaw ap nawng ai ni yawng gaw shawa hkam ja lam hta pahkam hkam lam nga hkra, bai sawk sagawn maram yu ra ai, nga nna mung hpyi shawn da ai.

Mungkan masha yawng kaw si hpang gara taw nga ai gaw dan len ai ana kaba langai rai nga ai.

Hpang jahtum hku nna, Wa Sarabyin Francis, du na shaning ningnan hta, labau hta na mahkrup madup hpe sharin hka ja la nna, rau hkawm rau sa rau magam bungli galaw let yawng a matu kaja ai shaning shatai la ga, nga nna mungkan masha yawng hpe saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-francis-message-world-day-for-peace-light-even-in-darkest.html

 

Add new comment

15 + 5 =