Wa sarabyin Francis a mungga

Lk 11:15-26 “Lang mi na shi gaw n chye shaga ai nat hpe shapraw kau wu ai: nat pru mat wa ai hpang, n chye shaga ai wa gaw shaga nga ai. Shawa masha ni gaw mau mat nga ma ai. Rai ti mung shanhte hta na nkau mi gaw, Nat agyi wa Bezebula hte she, shi nat ni hpe shaden kau lu ai, nga ma ai. Nkau mi mung shi hpe chyam dinglik yu let, lamu de na lamik kumla hpyi ma ai. Shi chyawm gaw shanhte a myit mang chye ya wu ai majaw, shanhte hpe, Dinghku brun ai mungdan shagu gaw, hten mat ga ai rai nna, nta mi hte nta mi hpe kamyet daw agrawp mat ga ai. Ngai gaw Bezebula hte nat ni hpe shaden kau nga ai, nga nna nanhte tsun myit dai hte maren, Satan mung tinang hte hka bra mat sai rai yang gaw, shi a mungdan kaning rai grin nga lu na lu ta? Ngai Bezebula hte nat ni hpe shaden kau ma we ai rai yang gaw, nanhte a kasha ni kadai wa hte shaden kau nga ma ta? dai majaw shanhte gaw nanhte hpe tara dara ai agyi ni tai na ma ra ai. Karai Kasang a layung hte ngai nat ni hpe shaden kau ma we ai rai yang chyawm gaw, Karai Kasang a mungdan nanhte kaw du sai rai nga ai.”  

Nat ni hpe gawt shachyut ai lam madu yesu galaw ai shaloi, masha hpawng hta lawm nga ai masha nkau mi, madu yesu a atsam hpung shing kang hpe grit mat hkra tsun shaga ai lam ni galaw lai wa ma ai. Madu yesu a stsawm hpung shing kang hpe grit yawm mat hkra galaw mayu ai agung alau ni ding run nga nga ai. Madu yesu hpe, shamai shatsai ya ai lam ni li loi galaw ai masha langai ngu ai masa hta lai nna nau n ahkyka ai masha langai zawn sha tsun kau mayu ai masa rai nga ai. Ndai zawn re ai myit lai ni dai ni na anhte a prat aten the mung mu lu nga ga ai.

Nat kap ai nang shung ngu ai lam hpe nau nkam ai masa mu mada nna, myit dum bri dum bra ai re ai lam hpe, myit the seng nna shazim shamai ya ai lam ni she re, ngu ai masa tsun ai ni mung nga ma ai. Nat tsadan shamu shamawt nga ai, ngu ai lam dan dawng dik ai. Ja chyum laika a shawng na laika man ni hta nan nat tsadan shamu shamawt ai lam, dai hpe karai kasang manga kau ai lam ni hpe mu lu nga ga ai.

Nat tsandan kaja wa shamu shamawt nga ai, ngu ai lam myit aru yu na matu hte, Hkristian ni agung alau hpa majaw hkrum ai ngu ai lam ni hte seng nna mabyin nkau mi hpe madu yesu tsun madi madun da nga ai. Nam bat langai ngu na lam gaw, Hkristian ni hku nna tsadan hpe awng dang sai madu yesu a hpang n hkan nang ai, kau chyen myit hte sha hkan nang nga ma ai, ngu ai lam rai nga ai. Madu yesu tsun ai, dai zawn kau chyen lapran tsap ai masa nbyin mai ai, “nang ngai hte rau rai yang rai na, shing nrai, ngai hpe malan ai maga hta rai nga na re” nga nna tsun ai. “Anhte hpe hkye hkrang la ai lam jaw ya na matu, shalawt dat ya na matu, tsadan hpe jahten kau na matu shi du sa ai re” nga nna madu yesu tsun ai. Ndai gaw kasat ai lam rai nga ai. Dai re majaw, sadi maja ra ai ngu ai lam nga nga ai. Nhkru ai nat tsadan a masu hkalem ai hpe nkatut hkra sadi maja ai lam galoi mung anhte hta nga ra ga ai.

Bai, anhte tinang a hkum hpe san yu mai ai ga san gaw, “ngai, nye a lam hte seng nna sadi maja ai lam galaw nga ai kun? nye a masin salum, nye a myit mang ai lam, nye a myit hkam sha shamu shamawt ai lam ni hta sadi maja ai galaw nga ai kun? Karai kasang jaw ya ai chyeju kum hpa sut gat, Chyoi pra ai wenyi nmat mat u ga matu sadi maja let makawp maga ai lam ngai galaw nga ai kun? Shing nrai dai hku sha tawn da nna, hpa nra na re, ngu ai masa kabai da ai rai kun?” Yu lakawn ai lam, sadi maja ai lam n galaw ga ai rai yang, tinang hta grau n gun kaba ai wa, dai hpe jahten kau lu ai wa sa wa na rai nga ai. Dai re majaw sadi maja ai lam galaw ra ai.

Madu Yesu jahkrat jaw ai ahkyak ai lam hpan masum gaw, nambat langai, madu yesu gaw tsadan wa hpe awng dang sai ngu ai teng man ai lam hte seng nna ung ang ai lam nmai nga ai, nam bat lahkawng, madu yesu hpang maga nre ai wa gaw shi hpe malan ai maga rai na re ngu ai lam, nam masum ngu na ahkyak ai lam gaw, galoi mung sadi maja lam nga ra ai ngu ai lam, hpa majaw  nga yang tsandan wa gaw anhte kaw nna tut e hka mat wa sai nrai, jahtum nhtoi du hkra anhte hpe jahten lu na matu aten tup anhte a makau hta mahkrun tam nga ai majaw rai nga ai.

Tsadan wa a maw lanyet ai masa hte shi tsun nga ai lam gaw, “nang hkristian rai nga ai hkrak sai, na a makam masham hta hkawm sa nga u, ngai dai hku sha nang hpe dat da na re, kaga mi nsharu na re, raitim mung, nang dai prat hta hkung dum wa nna len wa ai aten, sadi sahka galaw na malap mali rai wa ai aten hta she ngai bai sa wa na re” ngu ai masa rai nga ai. “Tsadan wa gaw shaban ai hkanghki zawn anhte hpe jahten kau lu na matu ning woi hkawm nga ai” nga nna mung Kasa Petru shi a shagun laika hta sadi jaw da nga ai. Ndai lam ni hpe sung sung ahkyak shatai nna sadi sahka nga pra lu na chyeju hpe madu kaw hpyi la nga ga. Madu gaw anhte hpe hkyak la na matu, tsadan wa hpe kasat na matu du sa wa ai re. Dai re majaw tsadan wa hte kanawn ai lam n galaw ga, shi anhte a nta hpa jahten kau nna anhte a sut gan ni hpe la kau ya mayu nga ai majaw galoi mung sadi maja nga ga.

NB. 2013, Oct 11 ya shani hkaw tsun lai wa ai Wa sarabyin Francis a mungga re.

Ka gale ai: Jau Bernard Dashi Tang Ji