Wa Sarabyin Francis a Mungga

Tinang a mung ching sha ni hpe tsawra ai myit hte, shagrit shanem ai myit Ningbaw ningla ni hta nga ra ai

Luke 7:1-10 “………. Madu Yesu dai nta hte gade n tsan kaw du jang, hpyen bu wa gaw shi a jinghku ni hpe shangun dat nna, Madu e, na hkum hpe hkum shatsang et; nye nta a magaw npu e nang sa shang na gaw, ngai n ging n dan nngai: ……”  

Kabu gara ai shiga hta mu lu ai, shi a shangun ma hpe shamai shatsai lam galaw ya na matu shagrit shanem ai myit hte Madu Yesu hpe hpyi lajin lai wa ai Yuda hpyen bu langai a lam gaw, arawng aya lu ai mung up du, du gyi salang ni hku nna kaning re ai myit masa hte daw jau lam ni galawra ai ngu ai lam ni hpe myit dum shangun nga ai. Up hkang na ahkaw aya hta nga nga ai mung up du, du gyi salang ni hku nna tinang a npu hta taw nga ai mung chying sha ni hpe tsawra ra chye ra nga ai, hpa majaw nga yang tsawra nchye ai up hkang du gaw up hkang ai lam hpe atsawm sha galaw lu na nrai nga ai. Hkan sa ra ai tara ni hpe hkan sa hkra galaw lu yang galaw lu na re, raitim mung tsawra ai lam nnga yang up hkang lam galaw lu na nrai nga ai.

Ndai shara hta mung chying sha ni hpe tsawra chye ai David hkaw hkam a lam hpe myit dum mai nga ga ai. Shut hpyit mara shut hpyit tawt lai wa ai lam a majaw ari dan hkam ra yang, mung chying sha ni a ntsa hta nrai, shi a ntsa hta sha mara ya rit ga matu madu kaw David hkaw hkam akyu hpyi lai wa ai rai nga ai. Dai re ai majaw up hkang ai mung up du ni hta nga ra ang ai mai kaja ai lai len lahkawng gaw mung chying sha ni hpe tsawra ai, ngu ai lam the shagrit shanem ai ngu ai lam rai nga ai.

Up hkang ai du salang shara hta nga na ni kadai raitim mung tinang a hkum hpe tinang san yu ra na lam gaw, mung chying sha ni hpe grau mai kaja ai masa daw jau lam galaw lu u ga, ngai kaja wa mung chying sha ni hpe tsawra nga ai kun? ngu ai lam the, kaja dik ai lai ladat ni lu la hkra masha shagu tsun hpaji jaw ai lam ni hpe madat ya chye ai shagrit shanem ai lam ngai hta nga nga ai kun? ngu ai lam ni rai nga ai. Ndai lam ni hpe tinang a hkum hpe san ding lik yu ai lam ni lama nnga ai rai yang dai masha wa a up hkang woi reng ai lam gaw kaja ai up hkang lam ntai lu na rai nga ai.

Mung up du ni hte ahkang aya lu ai masha ni a matu akyu hpyi ya ra ai nga nna san Pawlu tsun ai. Mung masa lam gaw ngai hte nseng ai, up hkang woi reng ai lam gaw shanhte a lit she re ngu nna tsun kau nmai nga ai. Ngai hta lit nga ai, shanhte atsawm up hkang lam galaw lu hkra ngai galaw lu ai lam hpe kaja dik ngai galaw ra na rai nga ai. Shing gyim nga pra lam hte seng ai nawku hpung a sharin matsun hta, mung masa magam lam ngu ai gaw hkyik hkam dik ai tsawra matsan dum lama ai magam lam ni hta na langai mi rai nga ai, hpa mjaw nga yang masha law law a mai kaja ai akyu a matu daw jau ai magam lam rai nga ai majaw rai nga ai, nga nna sharin shaga da nga ai.

Mung masa galaw ai masha ni hta byin nga ai n kaja ai, nhtap htuk ai lam ni a majaw, mung masa galaw ai lam gaw n kaja ai lam re, nga nna tsun tsun chye ga ai. David hkaw hkam zawn sha, mung masa galaw ai ni gaw shut hpyit ai ni rai yang rai nga na ma ai, raitim mung n gup aga hte hpaji jaw la ai, tsun shadum la ai lam ni galaw nna shanhte hpe garum la ra na rai nga ai. Kahtawlik hpung masha ni hku nna, mung masa lam hta nmai achya ai nga nna nkau mi tsun chye ma ai, dai gaw n jaw ai lam rai nga ai. Kaja ai Kahtawlik hpung masha ni hku nna, mung masa lam hta achya lawm ra ai, atsawm sha mai kaja ai masa up hkang ai lam shanhte galaw lu mu ga, kaja dik ai lam jaw ya nna shang lawm ai lam galaw ra ai. Dai rai yang, mung masa galaw ai masha ni hpe anhte jaw ya lu ai kaja dik ai lam gaw hpa mi rai na rai kun? Dai gaw akyu hpyi ya ai lam rai nga ai. “up hkang ai shara hta nga nga ai masha ni a matu akyu hpyi ya mu” nga nna San Pawlu tsun ai. “Dai wa gaw mara grai lu ai wa she re, nga-rai de sa gying ai,” ngu ai masa ntsun ga, atsawm up hkang ai lam galaw lu mu ga, shagrit shanem lu mu ga, mung chying sha ni hpe tsawra mu ga, mung chying sha ni hpe shagrin shanem ai the daw jau ai lam galaw lu mu ga, shanhte a matu akyu hpyi ya ga. Tinang a mung up du ningbaw ni a matu akyu hpyi ya ai lam n galaw lu ai hkristian gaw hkristian kaja nrai nga ai.

NB:   (Lahta na mungga gaw 2013 ning Sept 15 ya shani hkaw tsun lai wa ai Wa Sarabyin Francis a mungga rai nga ai)