Wa Sarabyin Francis Gaw: Prat  Hpe Myit Masin Salum Kaw Na Yu Hpang Chye Ga Nga Nna N gun Jaw Da Nga Ai Shiga

Prat hpe masin salum kraw lawang kata kaw nna yu hpang chye ga, ngu August 29, laban shani, San Peter pa hta, Madu A Lamu Kasa Akyu Hpyi ten, Wa Sarabyin Francis mungga htawn da ai.

Chyum daw hpe gaw dai shani hti ang ai Kabu Gara Shiga hpe la tawn da ai. Kabu Gara Shiga hta n san n seng ai lam gaw kata kaw na, masin salum kaw na hpang wa chye ai rai nna, kaga masha ni hpe mara shangun mara tam na lam mung byin shangun chye nga ai; dai zawn rai na malai anhte masin salum ni makam masham hta rawt jat kung hpan wa na matu Karai Kasang jasan jaseng ya na matu Shi kaw hpyi nem ra ga ai lam rai nga ai.

Madu Yesu a kasa ni lusha hpe n sha shi yang htung lai tara nga ai hte maren, jasan jaseng (lata kashin ai lam) ai lam n galaw ai majaw Pharisee ni hte Chyum laika sara ni hpe myit um ang shangun ai mu shut, chye na shut na lam byin shangun ai mabyin kaw na hpang ai rai nga ai. Ndai zawn jasan jaseng ai lam n galaw ai gaw Yuda makam htung lai hpe n hkan shatup ai lam rai nga ai (Mk 7:2-5).

Ndai mabyin gaw Yesu Madu a sape ni lusha n sha shi yang lata n kashin ai majaw, mara shagun myit kaba hte ga san san ai chyum laika sara ni hte Pharisee ni hpe Yesu Madu sharin shaga ai lam rai nga ai. Kaja ai Yuda htung lai hpe hkan shatup ai Yesu Madu a sape ni, hpa rai, ndai lang gaw lata n kashin ai sha malu masha hpe sha ma ai rai ngu ai hpe Wa Sarabyin Francis sumru woi da nga ai. Mahtai gaw anhte ni makam masham hpe yawng a kri madun ka-ang kaw tawn da ra ai, shinggan ntsa lam ni hpe madung da ai masa lam yawng hpe gaw koi yen kau ra ai, ngu ai rai nga ai, nga nna Wa Sarabyin Francis sang lang da ai.

  Ndai shinggan ntsa lam ni gaw makam masham hkrang shapraw ai hta htung lailen byin wa chye ai rai nna, dai makam masham hkrang shapraw ai htung lailen ni gaw Yesu Madu hta madung kam sham ai myit masin hpe hkra shangun ai, shabyin ai rai ra ai.

“Masha a shinggan maga de nna shi a kata de shang wa nhtawm shi hpe n san n seng awu asin di kau lu ai arai hpa mung n nga ai; raitim shi a kata kaw na pru wa ai gaw shi hpe awu asin di kau lu nga ai” (Mk 7:15).

Ndai lam gaw, daini na nhtoi hta mung, anhte hte mung seng nga ai, anhte hta mung byin nga ai teng sha rai nga ai. Anhte hkrum sha ai manghkang ni gaw masha kaga ni a majaw, shing n rai, shanhte a sat lawan kyang lailen a majaw re ngu hkam la, myit la ai nan anhte a myit kata kaw na byin pru wa ai rai nga ai. Masha kaga wa hpe mara shagun ai, wuhpung wuhpawng kaga hpe mara shagun ai, mungkan hpe mara shagun ai lam ni anhte a myit kata kaw na byin pru wa ai rai nga ai. Manghkang gaw shinggan kaw na re ngu myit la nna masha kaga ni hpe mara shagun mara hta je yang daw dan chye ga ai.

Ndai zawn manghkang gaw shinggan maga de nna byin pru wa ai re ngu myit la ai lam ni gaw aten shama kaman lila di nga ai sha tai nga ai; pawt sindawng ai hte myit machyi ai lam ni shalaw la ai tai nga ai; Karai Kasang hpe anhte a masin salum kaw na tsan tsan de tawn kau ai tai nga ai. Kadai raitim, ndai zawn rai nna manghkang ni hpe anhte a masin salum kata kaw nna shaw la kau n lu dingsa gaw teng man makam htung lailen ni hpe hkan shatup ai wa ngu n tsun lu ai. Hpa majaw nga yang pawt sindawng ai, mara shagun ai, maroi nni, sindawn katawt ai hte myit hkrit myit tsang ai lam ni gaw Karai Kasang hpang de sit shang na chyinghka hpe pat shingdang ya ai majaw rai nga ai.

Ndai n kaja ai lam ni kaw nna koi yen kau lu na matu gaw Karai Kasang anhte hpe agun alau kaw na shalawt ya u ga akyu hpyi shaja nga ra ga ai. Anhte a mungkan prat hpe myit masin kraw salum kata kaw nna nan yu hpang chye ra ai hpe Yesu Madu hkum nan sharin ya ai rai nga ai, ngu sharin shaga let, Nu Maria gaw shi a masin salum hpe jasan jaseng nna labau hpe galai shatsawm ya ai wa rai nga ai hte maren, anhte mung makam masham hpe anhte prat a akri madung masin salum hta bang tawn da lu na hpe garum ya u ga Nu Maria hpe kasi la hkan sa nga ga, ngu Wa Sarabyin Francis mungga hte rau n-gun jaw da nga ai.

By Fr. Patrick Gawmaw Hkawng Yae

#vaticannews

#rvakachinservice

29 August 2021, 12:20

https://www.vaticannews.va/en/pope/news/2021-08/pope-at-angelus-look-at-life-starting-from-the-heart.html