Wa Sarabyin Francis Gaw : Matsan masha ni gaw Shinggyim masha hpan ningnan hpe gaw de ai ni re nga nna shi a mungga hta tsun dat nga ai shiga

Wa Sarabyin Francis gaw lai wa sai pranwan ladaw 14 ngu na laban hta Matsan masha ni gaw Shinggyim masha hpan ningnan hpe gaw de ai ni re ngu shi a mungga hta tsun da ai.

Mt 11:25-30 hpe lakap nna daw masum garan jahpra dan ai. Langai ngu na daw hta Matsan mayan ni hte shagrit shanem ai ni hpe Karai Kasang a yaw sin ai lam shadan dan ai a majaw, Yesu Madu Kawa Karai Kasang kaw shaman chyeju hpyi ai hte chyeju dum chyeju shakawn ai lam rai nga ai.

Lahkawng ngu na hta Yesu Madu hte Kawa Karai Kasang lapran na matut mahkai ai lam hpe mung shadan shadawn ai. 

Masum ngu na hta, Anhte hkye la hkrum lu u ga, Yesu Madu kaw sa na shi hpang hkan nang na  matu anhte hpe shaga nga ai.

Yesu Madu Kawa Karai Kasang hpe chyeju dum shakawn ai lam gaw matsan mayan ni hpe sumsing mungdan madun dan ai majaw rai nga ai. Hpaji chye dum ai ni hte nyan marai rawng dum ai ni kaw na gaw makoi da ai.

Karai Kasang a mung sung lam hpe kaji htum wa hpe madun dan nga ai. Shi hkum nan hpe kam sham nna myit mada lam tawn da ai ni yawng hpe hkye hkrang la lam hpaw madun dan ai.

Yesu Madu Kawa Karai Kasang kaw na mahkra hkam la lu ai re. Wa e, ngu tsun ai gaw shi hte Kawa Karai Kasang kade ram ni htep ai hku matut mahkai nga ai lam madun dan ai rai nga ai.

Kawa Karai Kasang hte Yesu Madu shan shada kam hkat ai lam nga nna atai langai hte langai chye hkat ma ai hte langai a marang e langai hkrung nga ma ai rai nga ai. Dai gaw Kaga kadai kaw mung nnga ai ganawn mazum lam rai nga ai.

Yesu Madu anhte hpe sa rit ngu tsun ai gaw Shi hkum nan Kawa Karai Kasang kaw na hkam la ai chyeju ni hpe garan ya na matu rai nga ai.

Yesu Madu gaw myit masin hta Matsan mayan ai ni a katsi la hpa kaba rai nga ai. Hkristu gaw hkri ba hkrum ai ni hte zingri hkrum ai ni hpe shalan shabran ya ai. 

Hpang jahtum hta Nu Maria San Elizabeth hpe sa gawan ai shaloi Karai Kasang hpe shakawn da ai akyu hpyi ga Lk 1:46-56 hpe lakap nna, Nu Maria gaw anhte prat hta shi a mau hpa lamyit kumla garan kachyan ya let, hpaji rawng dum n-gun atsam nga dum ai ni kaw na makoi da ai kumla ni hpe mu lu hkam la lu mu ga ngu akyu hpyi da ya ai lam Vatican Shiga Dap kawn ndau da nga ai.

Source : Vatican News

#churchnews

#rvakachinservice