Wa Sarabyin Francis Gaw : Karai Kasang A Shagrit Shanem Ai Hpe Mu Lu U Ga Nanhte A Myi Ni Hpe Hpaw Da Mu nga nna tsun dat nga ai shiga

July 4, Laban shani, “Madu A Lamu Kasa Akyu Hpyi Ga” tsun maw na shawng hta, Wa Sarabyin Francis, dai laban shani na Kabu Gara Shiga chyum daw hpe myit sumru woi da nga ai.

Yesu Madu shi a mare buga, Nazareth kaw na tara jawng hta sharin shaga hpang ai lam hte seng ai rai nga ai. Ndai zawn re ai hpaji byen-ya gaw matsan dinghku, laksama wa a kasha kaw nna pru wa ai gaw mau hpa n rai a ni, ngu ai myit um-ang ai ga san ni hte mare masha ni shada tsun kajai nga ma ai.

Shanhte Yesu hpe bai htang ai sat lawan gaw n kam n hten ai, sindawng katawk maroi nni ai masa lam ni rai nga ai.

Shanhte a myit masa hpe chye ai Yesu Madu gaw, “Myihtoi gaw, tinang a buga hta tinang a mayu dama ni hte tinang a nta dinghku masha ni hta lai nna gara shara kaw mung shagrau hkungga hkrum nga ai” ngu bai shadum sadi jaw da nga ai (Mk 6:4).

Chye Chyang Ai Hte Matsing Masat Hkap La Ai Lam

Nazareth mare masha ni Yesu Madu hte Shi a shindu labau hpe chye ma ai raitim, Shi a lam matsing masat hkap la ai lam gaw n nga ma ai. Chye chyang ai hte matsing masat hkap la ai lam gaw anhte ni masha langai a lam hpe chye chyang ra ai hte matsing masat hkap la chye ra ai lam hpe shadum ya nga ai.

Masha langai mi a lam hka ja ai shaloi, shi hta laklai ai lam hpe matsing masat hkap la lu hkra shakut ra ga ai. Masha ni hpe tsang madang hte shingdaw masam maram ai rai yang, n kaja ai hku mu ai hpe myit hta manoi nga ai rai yang, shanhte a lam hpe chye ga ai raitim mung, matsing masat hkap la lam hpe pat shingdang la ai sha tai nga ai.

Mara masha ni asak sumshi (30) ning rai sai Yesu a teng man lam hpe myit n hkawn, n chye na ma ai hte Shi hta nga ai atsam ningja ningnan hpe myit hkawn hkap la na ning hkap ma ai, nyet kau ma ai.

Pat Shingdang La Ai Hte Hpaw Malang Da Ai Lam

Lama na anhte galaw mayu ai loi dik akyang lailen hpe sha hkap la hkan sa na rai yang gaw gumshen ai myit manoi lam ni grau grau jat wa na sha rai nga ai. Dai zawn rai wa yang gaw anhte hkum hpe laklai wa na lam hte mau hpa lam ni byin pru wa na lam ni kaw nna pat shingdang la ai tai nga ai.

Ndai zawn pat shingdang la ai lam gaw, anhte a mahkrum madup hte sha, shing n rai, masha ni e anhte hpe mungkan hte seng ai myit ningmu, myit masa, myit jasat ni hpe sha dawk bang ya hkrum ga ai majaw rai nga ai hpe anhte a shani shagu na nga sat nga sa prat hta mu lu na ga ai.

Anhte a mungkan ningmu hte Yesu a lam yawng chye ga ai ngu myit la shut ai makam prat kaw sha nga na lam shabyin ai hpe sadi maja ra ga ai.

Ningnan re ai hku anhte mu chye hkawn hkrang wa ai Karai kasang a mauhpa lam ni hpe hkap la na myit masin chying hkra n hpaw da ai rai yang, mauhpa hku n myit la ai rai yang, anhte a makam gaw gawng ngwi ngwi rai si mat na rai nga ai.

Anhte hta Karai Kasang a mauhpa hpe hkap la ai gaw Shi hte teng man jaw ang ai hku matut mahkai nga ai tai nga ai, ngu Wa Sarabyin Francis shang lang sharin shaga da nga ai.

Karai Kasang hkum nan shinggyim hkum sa la ai gaw, Shi hkum shagrit shanem ai, si mani ai, makoi magap da ai, anhte hte ni htep ai hku sa nga ai, yu maya shinggyim prat hku sa nga ai lam ni hpe madun ai rai nga ai. Yesu Madu gaw anhte a kaja dik manang rai nga ai. Shi gaw anhte hta na langai mi shatai la ai. Dai majaw anhte hpe chye na ya ai, hkap la ya ai, manang tai ya ai, mara raw ya ai. Ndai lam ni gaw Karai Kasang anhte hpe grai tsaw ra ai majaw nan rai nga ai.

Hpang jahtum mungga hta Kanu Nu Maria zawn Karai Kasang a mungsung lam hpe, anhte a shani shagu na sak hkrung lam hta, n kam n hten, n tsen ai myit manoi lam ni hpe shaw kau, Karai a mauhpa lam a matu myit masin chyinghka hpaw da, Shi a Karai ngu ai amying shingten hpe makoi magap da let shagrit shanem ai hpe mu chye hkam sha, hkap la lu na matu akyu hpyi nga ga, ngu Wa Sarabyin Francis saw shaga da nga ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-07/pope-at-angelus-open-your-eyes-to-god-s-humble-presence.html