Wa Sarabyin Francis Gaw : Karai Kasang Hte Rai Yang, Na A Prat Hta Byin Mai Ai Lam Ningnan Galoi Mung Nga Nga Na Ra Ai Nga Nna Tsun Dat Nga Ai Shiga

February 6, laban shani, “Madu A Lamu Kasa Akyu Hpyi Ga” tsun ten, Wa Sarabyin Francis, hkrit tsang myit n nga ai sha prat panglai ntsa sak hkrung hkawm sa lu na matu Yesu hpe kam sham kam hpa nga ga, ngu Hkristan masha ni hpe saw shaga da nga ai.

Dai shani hti ang ai Kabu Gara Shiga Chyum daw gaw Madu Yesu, Petru a li hpe shap lang, shawa masha ni hpe mungga hkaw tsun ngut ai hpang, Petru a sumgawn hpe hka sung de kabai hpang na matu tsun ai hte rau Petru mung mabyin masa tsun dan let Madu tsun ai hte maren sung ai hka de sumgawn kabai bang nna nga law law magawn la lu ai lam rai nga ai (Lk 5:1-11).

Sumgawn hpe hka sung de kabai hpang na matu Yesu Madu, Petru hpe tsun ai shaloi, Petru gaw shawng shana tup nga hkan yu ai raitim langai mung n lu ai lam tsun dan ai. Nga n lu ai sha li kaman bai nhtang wa ai rai nga ai.

Ndai mabyin gaw anhte a shani shagu na prat panglai hta galaw ai magam bungli hte bung ai mabyin rai nga ai. Hka panglai kaw nga hkan na matu Petru hte manang ni shakut lai wa ai zawn, anhte a yup mang shingran yaw shada pandung hpe lu la na matu shani shagu shakut nga ra ai.

Petru zawn sha anhte ni n yup n sha shakut shaja ai lam ni gaw myit htum hpa tai chye nga ai. Myit mada da ai hku n bying shagu anhte a masin salum kaw nna nan hkam sha ru chye ga ai.

Li kaman gaw anhte ni a magam n awng dang ai, n hkum n tsup ai, akyu ara n lu ai kumla rai nga ai. Yesu Madu gaw dai li kaman kaw sa nna li hta nga jahpring ya mayu nga ai. Yesu Madu anhte a kaman re ai prat hkrunlam hta rau nga lawm ai a marang e, anhte a, shani shagu, shakut shaja ai, hpe jahkum shatsup ya mayu ai.

Yesu Madu gaw pyaw hkawm na matu galaw da ai hka sanghpaw hpe sharawng ai n rai; matsan mayan ni shatmai shatmaw htaw ai li kasha gaw shi a matu ram dik la sai rai nga ai. Ahkyak ai gaw anhte ni shi hpe saw shaga nna hkap la na lam rai nga ai. Dai majaw gaw anhte a kaji kadun la ai prat hta rai tim Yesu Madu hpe saw shaga hkap tau la ga; dai kaji kadun la ai prat kaw rai tim shi a matu ram dik la nga ai.

Karai Kasang gaw anhte hte ni htep ai hku nga nga ai; Shi gaw mungkan lam hta hkum tsup ai hpe n tam ai. “Ngai hpe na a prat kaw hkap la ya rit, dai ram rai yang ram la sai”; Madu Yesu tsun ga ai, ngu Wa Sarabyin Francis, Madu Yesu hpe hkap la na matu shadum da nga ai.

Yusu Madu gaw Petru a kam myit hpe shanang shakang ya ai. Yesu Madu gaw Petru a li hta lung jawn nna, hka hkinggau kaw nna shagang da na matu tsun ai. Shani aten nga n lu mai ai hpe chye ninglen, Petru Yesu Madu hpe madat mara ai hte kam hpa myit tawn da ai.

“Anhte hpa n lu ga ai raitim myit n htum ga; asum hkum jaw ga; masha shagu hta rai tim, nawku hpung a matu rai tim, wuhpung wuhpawng, kun dinghku a matu rai tim, anhte a dai prat hta tsawm htap lam nga nga ai; Madu hta kam sham myit hte gwi gwi atsam dat ai gaw apu asi pu si shangun ai; Madu Yesu hte rau rai yang prat panglai hta n hkrit n tsang hkawm sa hkawm wa lu na ga ai,” ngu Wa Sarabyin Francis mungga htawn da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-02/pope-francis-angelus-catechesis.html