Wa Sarabyin Francis Gaw: Hungary Mungdan, Budapest Hte Slovakia Mungdan De Akyu Hpyi Bu Hkawm ai Ni A Matu Akyu Hpyi Ya Na Matu Saw Shaga Da Nga Ai Shiga

Wa Sarabyin Francis gaw, September 5, laban shani, San Peter pa hta, “Madu A Lamu Kasa Akyu Hpyi” ngut ten, hpang na laban hta Budapest hkrun lam a matu shajing nga ai lam, dai shara hta (52) lang ngu na International Eucharistic Congress zuphpawng shangut ginchyum dat Misa Hkungga nawng jau na re lam tsun da ai.

Dai zuphpawng shangut Misa Hkungga nawng jau ngut ai hpang Slovakia mungdan de masum (3) ya sa du hkawm na re lam, dai hpang bat masum ya shani, “Our Lady of Sorrows, Nu Maria a yawn hkyen ai lam poi masat dingsat nhtoi mung rai, dai mungdan a kamhpa shara Nu Maria a poi mung rai nga ai majaw Misa Hkungga hpe hpung shawa masha law law hte jawm nawng sa wa na re lam Wa Sarabyin Francis ndau da ai.

Kam hpa let akyu hpyi chye ai myit gaw Europe dan a masin salum rai nga ai lam, ndai akyu hpyi bu hkawm na hkrun lam a matu shajing shachyip nga ai ni hte hkap hkalum daw jau na ni yawng hpe mung chyeju dum ai lam, aten gaw September 12-15 laman re na lam, shi hte hkrum na matu ala nga ai ni yawng hpe myit masin kraw lawang kaw na nan hkrum mayu nga ai lam, Wa Sarabyin Francis matut tsun da nga ai.

Ndai lang gaw Wa Sarabyin Francis (Apostolic visit abroad) maigan mungdan de hpung kawan hkawm ai  (34) lang ngu na lang rai sai lam, ndai lang na hpung kawan ga manoi, gabaw ginlam (theme) gaw “With Mary and Joseph on the way to Jesus” Maria yan Yawsep rau Yesu hpang de sa ai hkrunlam” ngu ai rai nga ai.

Slovakia mungdan hkrun lam gaw, Mungdan a mare kaba daju rai nga ai Bratislava kaw sa nna, de a hpang mungdan a lahkawng ngu na kaba dik mare rai nga ai Kosiace, bai matut nna Poland, Ukraine, hte Hungary mungdan ni hte mungdan jarit rai nga ai Slovakia mundan a sinpraw maga jarit de sa nna, dai mung dan a masum ngu na kaba dik mare rai nga ai Presov de sa du na re lam chye lu ai.

Hpang jahtum shani gaw Sastin, Trnava region de nhtang wa nna, dai kaw akyu kadun mi hpyi ngut ai hpang, “Our Lady of Seven Sorrows” Nu Maria a yawn hkyen ai lam sanit (7) hte seng nna madung yaw shada let shaning 250 na ai aten kaw nna gaw gap da ai “National Shrine, kaw Wa Saradaw ni hte hkrum saga na re lam  chye lu ai.

Hpang jahtum ndau shana ai mungga hta, shi hte rau dai hkrunlam hta lawm na ni a matu akyu hpyi let shi hte rau rai nga na matu hpyi shawn lit shatsam dat nga ai.

Vatican Shiga Dap kaw nna ndau da ma ai. 

By Fr. Patrick Gawmaw Hkawng Yae

#vaticannews

#rvakachinservicee

https://www.vaticannews.va/en/pope/news/2021-09/pope-angelus-prayers-visit-budapest-slovakia.html