Wa Sarabyin Francis Gaw : Anhte A Hkye Hkrang La Lam Gaw Yesu Si Hkam Ai Wudang Hta Re

September 14, bat masum ya, Wudang Shagrau poi shani, Wa Sarabyin Kazakhstan, Nur-Sultan na EXPO Center hta Missa Hkungga nawng jau ai. Dai shani Wa Sarabyin nawng jau ai Missa hkungga hta hpung shaw masha (6,000) a lahta de sa du lawm ma ai.

Hkristan ni gaw, n ju n dawng ai lam n nga ai, matsan dum lama ai, garan ginhka lam n nga ai, myit galu kaba hkam sharang nna mara dat hkyam sa ya ai, matai htang lam n nga ai

tsaw ra myit majing hpe, Yesu Madu jan noi si hkam ai Wudang kaw na sharin hkam la ra ai.

Labau hta, si ari dam jaw ai wudang rai lai wa ai raitim, daini anhte galaw ai Hkristu a wudang hpe shagrau ai poi rai nga ai. Hpa majaw nga yang, dai hpun hte galaw ai wudang hpe Madu Yesu shi a lahpa ntsa mara nna, anhte a mara mahkra, mungkan ting na n kaja ai lam ni hpe gun la kau ya ai; Satan mara ya ai mara hte n hkru n kaja ai lam mahkra hpe, Shi a tsaw ra myit hte, gasat shamyit kau ya ai.

Kawa ai lapu Hte Asak jaw ai lapu

Kawa ai lapu hte asak jaw ai, hkye la ai lapu myu lahkawng a hti htang re ai lam hpe Wa Sarabyin Francis, Chyum Laika hpe lakap nna tsun shadum da ai. Ga Shaka Dingsa Chyum Laika, Pru Mat Wa Ai Laika hta na rai nga ai. Chyoi Pra buga de hkawm sa ai Israel masha ni Karai Kasang hta kamsham kamhpa myit hpe shamat kau wa ai. Shi a ga sadi hpe malap kau wa ai. Dai majaw lapu ni e kawa ai hpe hkrum ra ma ai. Si wa ai du hkra kawa hkrum ma ai rai nga ai.

Anhte Karai Kasang hta kamsham kamhpa ai, Karai Kasang myit ra ai hta gara hku sak hkrung nga pra ai gaw grai ahkyak ai. Karai Kasang hte nhtan shai ai hku nga pra ga ai rai yang Isreael masha ni zawn lapu e kawa sat kau ai hkrum na rai nga ai.

Kazakhstan mungdan hta jam jau taw ai, gumseng ai lam law taw ai, zingri zingrat ai lam ni law taw ai, shinggyim sari manu hte shanglawt lam ni hpe gasat jahten hkrum taw ai. Ndai zawn re ai gaw gade a majaw kadai ni shut taw ai hpe sumru dinglik na matu, ya hkyak hkyak byin nga ai Kazakhstan mungdan masa lam hpe ga shadawn hte tsun madun dan let Wa Sarabyin Francis anhte hpe shadum nga ai.

Kazakhstan mungdan hta Kahtawlik hpung masha gaw grau shau ai; mungdan a tsa shadang kaw na 1% a npu de sha nga ma ai.

Anhte Myanmar mungdan, Jinghpaw mung hte mare buga/lawk ni, kun dinghku nta masha ni hta mung sumru dinglik la mai ga ai.

Wa Sarabyin tsun mayu ai hkye hkrang la ai lapu gaw, Mawshe hpe Karai Kasang e galaw shachyaw shangun ai magyi lapu, wan chyi nga ai magyi lapu, dai lapu gaw Madu Yesu wudang hta jan noi si hkam ai hpe kumla tau nau madun ai rai nga ai.

Dai hkye la Madu hpe azi yu nga ra ga ai. Shaloi n hkru ai lam ni kaw na koi yen lu ai atsam lu la ai. Chyoi pra sanseng ai lam hta hkawm sa lu ai.

Madu Yesu a wudang hpe azi yu nga ga ai rai yang, Satan e nang jung ai hpe n hkrum na; Satan gaw anhte hpe n ga-up dang kau lu na; Dai Madu Yesu a wudang npu e satan hte shi jaw ai mara ni hkrat sum si mat ma na; Satan a atsam gaw dai wudang npu e hten run hkoi mat mat na, nga nna Wa Sarabyin Francis hkaw tsun da ai.

Anhte a hkye hkrang la lam, anhte bai shangai la ai lam, anhte bai hkrung rawt ai lam gaw Madu Yesu si hkam ai wudang hta nga nga ai.

Dai wudang kaw na gara hku tsaw ra na, n ju n dawng lam n nga hkra gara hku galaw na, gara hku matsan dum lama myit nga ra na, gara hku mara dat hkyam sa ya na, matai n htang ai myit gara hku galaw la na: ndai lam ni hpe sharin la ra ai.

Hkristan masha langai hku nna kabu pyaw ai hte sak ningnan, tsaw ra myit hte simsa lam ni hpe sakse hkam sa wa lu na matu Karai Kasang kaw na chyeju kumhpa hpyi ya let Wa Sarabyin Francis, shi a mungga hpe ginchyum dat da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-in-kazakhstan-our-salvation-is-to-behold-jesus-crucified.html