Wa Sarabyin Francis A Canada Mungdan Hpung Kawan Hkrunlam

 

June 23, bat mali ya shani, Wa Sarabyin Francis a Canada Mungdan Hkunlam Lamang hpe Vatican Press Office kaw nna ndau shana da ma ai.

Wa Sarabyin Francis, July 24 – 29 laman hta Canada Mungdan de hpung kawan na.

July 24, laban jahpawt daw hta Roma na Fiumicino nbungli daru kaw nna rawt na.

Canada mungdan Edmonton International Airport hta yu na rai nna dai shara kaw hkalum la na.

July 25, bat langai ya shani hta gaw Canada mungdan na dakkasa ni hte hkrum zup lamang galaw na.

Shawng ningnan, mungdan sakkasa ni, dai hpang Maskwacis mare kaba kaw dai kaw na dakkasa ni hte hkrum shaga na.

Dai hpang gaw Edmonton mare kaba de matut hkawm sa nna dai kaw na dakkasa ni, Yesu a Salum Ningsang Jau Ginwang na hpung masha ni hte hkrum shaga na.

July 26, bat lahkawng ya shani gaw Edmonton mare kaba na Commonwealth Stadium hta hpung shawa masha ni hte rau Missa Hkungga nawng jau na.

Dai hpang Lac Ste, Anne mare kaba de hkawm sa na. Dai kaw nawku daw jau lamang galaw ai buhkawm ni hte rau akyu hpyi shang lawm na.

July 27, bat masum ya shani gaw Sinna Canada Quebec mare kaba de hkawm sa na.

Dai kaw mung hkap hkalum lamang galaw nna, Prime Minister hte rau mungdan magam gun ni, bai buga dakkasa ni hte hkrum shaga na.

July 28, bat mali ya shani gaw, galang mi bai, mungdan a San Anne de Beaupre chyoi pra shara hta hpung shawa masha ni hte shawa Missa Hkungga nawng jau na.

Shani ka-ang daw hta gaw Saradaw ni, Jau, Deacon ni, Sasana hpung magam gun ni, Jau tai jawng ma ni, sagurem magam gun ni hte rau Notre Dame na Ginwang Up Sarada shanu ai Catheral Jawng hta akyu hpyi na.

July 29, bat manga ya shani, Wa Sarabyin Francis, Quebec Saradaw Ginjaw hta nga ai ni hte rau hkrum shaga let dai shara na dakkasa ni hte zuphpawng galaw na.

Canada mungdan jarit Nunayut na Iqalut de matut hkawm sa nna dai ginra na lawu tsang jawng ma ni hte laksan hkrum shaga na.

Dai hpang dai jawng na Ramma ni, Salang ni hte hkrum shaga la nna Roma na Fiumicino nbungli daru de bat kru ya jahpawt bai nhtang wa na re lam Vatican Shiga Dap kaw nna ndau da ya ma ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-06/pope-francis-canada-schedule-apostolic-journey.html

 

Add new comment

1 + 0 =