Wa Sarabyin: Dingman Dinghpring ai Mung Shawa Masha Kaja Ngu Ai Gaw Shinggyim Wuhpawng Hpe Madi Shadaw Ya Ai Kabu Gara Shiga Sakse Tai Ai Ni Re

image from Vatican website

Wa Sarabyin Francis gaw October 18, laban ya shani, “Madu Lamu Kasa Akyu Hpyi” ngut ten, San Peter pa hta, dai shani hti ang ai Kabu Gara Shiga Mt 22: 15 – 21 hpe lakap nna, Mung Masa Lam hte Makam Masham Lam hta hkawm sa ra ai Mung Shawa Masha ni a lit magam hte seng nna shadum jahprang da ai.

Hkristan masha ni gaw mungkan masha ni a sari, arawng sadang hpe makawp maga na hte shatsaw sharawt ya na matu tinang hkum hpe ap nawng let Karai Kasang hpe sakse hkam ai lachyum rawng lachyum pru ai prat hta hkawm sa ga ngu Wa Sarabyin Francis saw shaga da nga ai. Dai gaw Yesu Madu hkum nan anhte hpe saw shaga da ai re.

Chyum laika hta rawng ai hte maren, Yesu Madu gaw, dai ten hta teng man ding hpring jahpai hpai ai ai hypocrite ni a jahte tam ai lam hpe hkring hkring hkrum sha lai wa ai re. Shawng daw hta shanhte gaw Yesu Madu hpe shakawn shagrau ai zawn zawn tsun ma ai raitim, hpang daw hta, Yesu Madu hpe shanhte hkam da ai mahkam hta dun bang ma ai. Mung shawa man kaw n san gin ai ga san ni hpe san wa ma ai. “Caesar hkawhkam hpe ahkun hkanse bang gin ai i, n bang gin ai i,” ngu mung shawa masha ni a man hta ga san san nna Yesu Madu a sari hpe jahkrat ya ai magam hpe galaw lai wa ma ai.

Dai ten hta, Palestine kaw Roma hkawseng a ka-up ai gaw makam masham lam hku rai tim, mung shawa matu rai tim, Israel myusha ni a Karai Kasang hpe roi shagoi di ai Roma hkawseng a sumla lawm ai gumhpraw denga jai lang ai aten rai nga ai.

Mung Masa Lam hte Makam Masham Lam lahkawng lapran garan ginhkra ai byin shangun ai lam

Yesu Madu hpe ga san san ai ni gaw, Yesu Madu “bang mai ai,” shing n rai, “n bang ra ai” ngu htai na mahtai lahkawng yan hte shi hpe shanhte a mahkam hta kadawng bang shangun lu na matu maw lanyet, hkalem ai lam rai ma ai.

Yesu Madu gaw shanhte ni a mahkam hta n hkrat ai hta sha n ga, “Caesar hte seng ai hpe Caesar hpe jaw mu; Karai Kasang hte seng ai hpe gaw Karai Kasang hpe jaw mu,” ngu ai mahtai hte asan sha hkang dat nu ai.

Mung masha ni, Caesar hpe ahkun hkanse jaw ang ai masat masa nga ai hpe tsun ai rai tim, shinggyim masha shagu gaw Karai Kasang a wenyi hkrang hte bung ai hku hpan da hkrum ai ni re majaw Karai Kasang hte seng ai ngu tsun ai rai nga ai.

Dai majaw gaw, Karai Kasang a matu, Karai Kasang hta, shinggyim masha shagu tinang a-nga nga ai Karai Kasang hpe hka kap ai rai ng ai.

Ndai Yesu Madu a mahtai gaw, Mung Masa lam hte Makam Masham lam hpe garan jahpra da ai masat shadang hpe sha n-ga, kam sham ai ni yawng a Sasana Magam a matu asan dan tawk re ai lam matsun ni hpe mung shadan shadawn da ai hpe anhte ni mu lu ga ai.

Ahkun hkanse jaw bang na hte mungdan tara upadi ni hpe hkan sa na gaw mung masha yawng a lit rai nga ai. Grau nna, Karai Kasang ahkyak da manu shadan ai shinggyim masha prat hte shinggyim masha ni labau hta Karai Kasang hte Karai Kasang madu ai lam yawng a ntsa hkung ga lara di ra ga ai.

Nawku Hpung hte Hkristan Ni A Sasana Magam

Nawku Hpung hte Hkristan ni a Sasana magam gaw Karai Kasang a lam hkaw tsun nna, dai ni na prat na shinggyim masha ni lapran Karai Kasang hpe sakse hkam na matu rai nga ai.

Kashin kamun hkam la ai a marang e, anhte gaw shinggyim wuhpung wuhpawng hta Kabu Gara Shiga hte Wenyi a lam woi ai hta sak hkrung nga pra ai ni tai na matu saw shaga hkrum shaga ai.

Dai majaw kam sham ai masha ni gaw, tinang hkum shagrit shanem ai, nden marai rawng ai myit hte tara rap ra lam hte shada galum gahkyin gumding chye ai tsaw ra myit nga ai shinggyim wuhpung wuhpawng hpe gaw de sa wa ai hta tinang hkum nan shalawm ap nawng garum sa wa ra ai.

Kam Sham Ai Ni Gaw Myit San Seng Myit Kaja Ai Hte Mungdan Gaw De Ai Mung Masha Ni Tai Ra ai

Hpang jahtum hta, dingman dinghpring jahpai hpai ai kaw nna, anhte hpe Kanu Nu Maria shalawt dat ya u ga; Myit san seng kaja ai hte mungdan gaw gap sa wa lu u ga; Yesu Madu a sape rai ga ai anhte hpe Karai Kasang gaw shinggyim masha a daju hte shinggyim masha a sung la ai lachyum rai nga ai hpe sakse hkam sa wa lu na matu akyu hpyi let Wa Sarabyin, shi a mungga hpe jahtum da ai.

RVA Jinghpaw Nsen hkap madat la nga ai nu wa hpu nau ni yawng hpe Karai Kasang shaman ya u ga law.

Translated by Fr. Patrick Gawmaw Hkawng Yae

#vaticannews

#rvakachinservices

https://www.vaticannews.va/en/pope/news/2020-10/pope-francis-angelus-catechesis-gospel-reading-common-good.html

 

Add new comment

13 + 1 =