Wa Sarabyin: Chyoi Pra Ai Wenyi Anhte Hpe Myit Mada Shara Hte Makam Hpe Jaw Ya Let Atsam Marai Hpe Mung Jaw Ya Ai

Chyoi Pra ai Wenyi gaw ja la ai nbung kaba zawn rai yu hkrat wa ai. Kam sham ai hpung masha ni a myit masin salum ni hpe hpaw da let Chyoi Pra Ai Wenyi a chyeju kumhpa hkap la nna, Karai Kasang a tsawra ai sakse ni tai na matu pru sa ga ngu n-gun jaw saw shaga da nga ai. Dai gaw Chyoi Pra ai Wenyi kaw na anhte a myit mada shara hte makam hpe hkap la nna, hkrung rawt sai Yesu Madu a tsawra myit hpe sakse hkam na lam rai nga ai.

Kasa Laika hta na Yesu Madu a hpang jahtum daw sha poi a hpang nhtoi (50) lapran Yerusalem hta byin ai mabyin ni hpe mung sumru woi da ai.

Kasa ni Nu Maria hte rau nta ntsa htap kaw hpawng de nga ma ai. Shanhte gaw Hkrung rawt sai Madu Yesu, Shi ga sadi jaw da ai Chyoi Pra ai Wenyi yu hkrat wa na shani du hkra rau nga nga na lam tsun shana da hkrum masai.

Dai Yesu a ga sadi hte maren nbung laru kaba zawn re ai nsen kaba sumsing lamu de nna du hkrat wa let shanhte rawng nga ai nta kata kaw du shang wa ai.

Ndai mabyin gaw teng sha byin ai mung rai nga ai, kumla hku hkrum katut ai mahkrum madup mung rai nga ai. Chyoi Pra Ai Wenyi gaw ja ai nbung kaba zawn rai du sa ai hpe hkrang shala ai mabyin rai nga ai. Shi hpe hting hkang ya n lu ai, jahkring kau mung n lu ai, shadawn shadang hku masam maram mung n lu ai, Shi sa wa ai lam hpe mung tau nau mu chye n lu ai ngu Wa Sarabyin Francis Sumru woi da ai.

Chyoi Pra Ai Wenyi gaw Karai Kasang rai nga ai, asak hpe jaw ya wa mung rai nga ai

Chyoi Pra Ai Wenyi hpe mungkan shinggyim masha ni hta nga ai machye machyang hpaji madang hte sha n chye na lu ai. Chyoi Pra Ai Wenyi gaw Kawa Karai Kasng hte Shi a Kasha Yesu Hkristu kaw nna Nawku Hpung a ntsa du yu wa ai wa rai nga ai. Anhte marai hkum shagu gaw dai nawku hpung hta lawm nga ga ai rai nna, Chyoi Pra Ai Wenyi gaw anhte a myit masin ni hta asak chyeju kumhpa hpe jaw bang ya nga ai.

Chyoi Pra Ai Wenyi garai n yu hkrat wa shi ai shaloi, Kasa ni nta shinggan de le na matu chyinghkra hpaw na n-gun lagaw n rawng ma ai hte hkrit tsan nga ma ai.

Anhte mung kasa ni zawn sha shim lum lam n nga ai makau grupyin ni a majaw hkrit tsang nna gawk rawng rawng chye nga ga ai. Karai Kasang gaw anhte kaw gara hku sa du ra na, anhte a masin salum chyinghka hpe gara hku hpaw ya na chye da wu ai. Shi gaw Chyoi Pra Ai Wenyi hpe shangun dat nna anhte a masin salum ni hpe hpaw ya let anhte a hkrit tsang ai lam hpe galai shai kau ya nna teng man ai lam hta hkawm sa tsun shaga gwi ai myit hpe jaw bang ya ai. Anhte hkrit tsang ai majaw madin din da ai shakum ni hpe malawng kau ya ai. Anhte a shut shai ai hkam la lam ni hpe la kau ya ai. Chyoi Pra ai Wenyi gaw kasa ni hpe Pentecost shani galaw ai zawn anhte ni hpe sak prat ningnan hte re ai sakse ni shatai ya ai.

Chyoi Pra ai Wenyi hpe hkam la ai hpang gaw Kasa ni shawng na zawn n rai mat sai sha, Hkrung rawt sai Yesu Madu a lam hkaw tsun gwi wa ai, Yesu Madu gaw Karai Kasang re ngu sakse hkam gwi wa ma ai. Dai tinang a ga hte chye na la lu ai hku hkaw tsun sakse hkam lu wa ma ai.

Chyoi Pra Ai Wenyi anhte a masin salum hpe galai shai ya ai

Chyoi Pra ai Wenyi gaw kasa ni a masin salum ni hpe galai shai ya nna, masha shagu hpe kaja dik masa lam hku tsun shaga matut mahkai lu shangun ai, masat shadang n nga ai Karai Kasang a magam hpe gun hpai lu shangun ai, makam masham htung hte shinggyim htung lai len ni hpe Karai Kasang myit ra ai hta, shanhte mung myit dik ai hku mahkri shawn jahtuk shatsawm lu shangun ai.

Chyoi Pra ai Wenyi gaw amyu, ga hpan, hte htung lailen n bung ai shinggyim masha ni hpe shada matut mahkai hkrum shaga lu na atsam hpe jaw ya let ginlung kahkying gumding lam hpe jaw ya ai, Yawng hte seng ai nawku hpung hpe jaw ya ai.

Hpang jahtum mungga hta “chyoi pra ai wenyi a chyeju kumhpa hpe hkam la na matu kam sham ai masha ni yawng a masin salum ni hpe hpaw da ga ngu saw shaga nga ai. Dai chyeju kum hpa a marang e, Karai Kasang a tsaw ra ai hte tsawm htap ai lam hpe hkam sha lu na rai nna, dai gaw Yesu Madu a si hkam ai hte bai hkrung rawt ai hta anga nga ai lam, dai tsaw ra ai lam hpe sakse hkam sa wa ra ai lam, Chyoi Pra ai Wenyi gaw kasa ni hpe zawn anhte hpe mung kam sham myit mada tsawra lam hpe jaw bang ya nna, dai hpe sakse hkam sa wa lu na matu n-gun atsam marai mung jaw bang ya ai lam tsun shadum n-gun jaw da nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-05/pope-regina-coeli-pentecost-sunday-catechesis.html