Wa Sarabyin: Basketball Gaw Ramma Ni Ntsa De Nga Ai Pandung Hpe Mada Na Matu Garum Ya Ai

May 31, bat langai ya shani, “Italian Basketball Federation (FIP)” Italy munghpawng lata bawlung ginsup hpung a dakkasa ni hpe hkrum shaga ai hta “lata bawlung, basketball, gaw ramma ni ntsa de nga ai pandung hpe mada na matu rai nga ai” ngu tsun n-gun jaw da ai.

Italian Basketball Federation (FIP) hpe 1921 shaning hta hpaw hpang da ai rai nna, “International Basketball Federation (FIBA) hta malawm lawm ai hpung mung rai nga ai.

Ndai lata bawlung “Basketball” ginsup hpung gaw 1955 shaning, San Peter wang na pa hta, Wa Sarabyin Pius XII hpe ginsup dan lai wa yu sai re lam dai hpung a ningbaw Giovanni Petrucci kawn Wa Sarabyin Francis hpe hkrum shaga shachyen shaga ai shaloi tsun dan ai a marang e chye lu ai.

Nawku Hpung Makam Masham hte Mungkan Madang Ginsup ai lam yan a matut manoi ai lam nga nga ai hpe Wa Sarabyin Francis sumru lu ai rai nna, lahkawng yan gaw shinggyim hkum hkrang hkam ja lam hpe jaw ya ai hte wuhpung wuhpawng hpe mung garum shingtau lu nga ai ngu tsun da ai.

Shingtai Prat Hpe La Kau Na Matu Pawng Hpawng Let Rau Gasat

Shinggyim prat hta ahkyak ai lam lahkawng hpe mung Wa Sarabyin tsun dan da ai. Dai gaw, (1) teamwork ngu ai hpawng jawm magam bungli rau galaw ai lam hte (2) discipline ngu ai ripkawp tara tawn da nna hkan shatup ai lam rai nga ai.

Ginsup hpan nkau ni gaw tinang shingtai hkrai ginsup ra ai raitim, dai ginsup hpan yawng gaw shinggyim masha ni a shingdu labau, myit sat lawat, kyang lailen ni hpe mu chye shangun ai hte shading sharai ya lu nga ai. Rau jawm hpawng chyawm let yawng a akyu ara matu jawm gasat shangun ai, ngu mung Wa Sarabyin Francis sumru sang lang da ai.

Ahkyak dik galaw ra na lam lahkawng gaw ginlung kahkyin gumdin na hte pandung nga ra na lam rai nga ai; ginsup ai lam gaw shinggyim wuhpung wuhpawng ni hta lawm ai masha shagu a matu mung tsi kaba tai nga ai; dai gaw myit shingtai hkam sha ai lam ni hte myit ru myit tsang ai lam ni hpe mung shamai ya lu nga ai; dai gaw Kabu Gara Shiga zawn sha, sai rum nau na myit a sari manu hpe mung jaw bang ya ai.

Shapan Shalat Hpaji Hkaja Ai Hta Ripkawp Tara Ahkyak Ai

Ginsup ai masha langai mi a myit manaw, myit jasat gaw shi tawn da ai ripkawp tara hte grai seng ai (An attitude of the sportsperson is discipline); shingjawng poi shang lu na, n shang lu na ngu ai gaw dai ginsup masha bungli gade galaw ai, aten mawn mawn shaman shakyan lam hta gade ram shakut ai ngu ai hta hkan na re, ngu mung Wa Sarabyin tsun shadum da nga ai.

Ripkawp tara hkan ai ngu ai gaw hkum hkrang a matu sha n rai nga ai; myit masin wenyi lam a matu mung rai nga ai; hkum hkrang shamu shamawt ai lam hpe jaw ang ai masa hku aten mawn mawn galaw ra ai zawn yawm mat ai n-gun bai ban la lu na matu malu masha hte nga sat nga sa lam hpe jaw ang ai hku lu sha nga sa ra ai.

Hpaji sharin hka ja nga ai ni, grau nna ramma ni gaw Loyala kaw na San Ignatius tsun da ai, “masha hkum shagu shi a prat hta hkan shatup ra ai lai ladat hte hkrak nga sa ra ai” ngu ai ga hpe lakap nna mung Wa Sarabyin Francis shadum da ai.

Dai zawn galaw ai gaw anhte hkum nan hpe shayak la ai n rai nga ai; anhte lit la sa wa lu na matu she rai nga ai; anhte hkum nan a matu, anhte hpe kam da ai yawng a matu, hpu nau ni a matu, tsun ga nga yang prat a matu rai nga ai, ngu mung tsun sang lang da ai.

Wenyi Lam Yan Hte Seng Ai Ripkawp Tara

Ripkawp tara gaw wenyi sak prat hta mung ahkyak dik ai; myit a hkamsha ai hpe sha madat nna dat da n mai ai; rawt jat galu kaba lam de galai shai hkawm sa matu ripkawp tara ra ai; masan sa ai lam hta hkawm sa na lu na matu mung ripkawp tara ra ai.

Ripkawp tara hta sadi dung ai, ngang gring ai, hte shani shagu akyu hpyi ai lam hta shakut shaja ai lam ni rawng nga ai; hpa majaw nga yang, n hkring n sa shaman shakyang ai, shakut shaja ai lam n nga ai makam gaw hkraw hkun si mat na; ripkawt tara hting hkang ai lam n nga ai makam gaw si mat na rai nga ai.

Lata bawlung ginsup masa lam hte seng nna mung, Wa Sarabyin Francis tsun dan wa ai hta, “dai ginsup ai lam gaw ntsa de mada ra ai; ginsup pa hta mung sadi maja let, lata bawlung hpe mung n shayaw kau hkra sadi maja ra ai; ginsup manang ni hte mung matut mahkai nga ra ai; shingjawng manang ni hpe mung maja ra ai; ntsa kaw masat masa galaw da ai hku hpe mada ra ai, ngu tsun dan da ai.

Yu reng hpung ni hpe n-gun jaw ai hta, Ma ni hte ramma ni a hkamja lam hte htuk manu ai re majaw shanhte hpe shapan shalat ya na matu hpaji jaw n-gun jaw da nga ai. Ma ni hte Ramma ni shawng lam bandung de yu chye mu ga; myit daw myit hten n nga mu ga; asum jaw ai lam n nga u ga; hkrat sum yu ai lam ni gaw awng dang lam ni hpe jaw ya ai re hpe prat hta chye na hkam sha lu mu ga sharin ya na matu n-gun jaw da nga ai.

Ma ni hte Ramma ni hpe mung ahkyak dik myit masa langai hpe ngang ngang jum tek da ra ai lam tsun da ai; dai gaw hkam ja lam a matu ginsup hpan ni hpe ginsup mayu ai myit hpe galoi n mai shamat kau ai lam rai nga ai. Dai ginsup mayu ai myit nga taw ai rai yang, ginsup na matu n yak ai; ginsup ai ni gaw “goal”ngu  hku de mi n kabai bang lu ai rai tim, shanhte galoi mung hkrat sum na n re ai, ngu mung n-gun jaw da ai.

Tinang chye da ai ginsup hpan hte seng ai wuhpung de sa nna manang ni hte rau ginsup hpung hpaw la let ginsup poi langai hpe bai shang shakut lu ai, ngu mung n-gun jaw da ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-05/pope-francis-italian-basketball-federation-discipline-teamwork.html