Wa Sarabyin: Asak Lusha Rai Nga Ai Yesu Hte Hku Hkau Ai Hta Ngang Kang Nga Ga

August 8, Laban ya shani, San Peter Pa hta, “Madu A Lamu Kasa Akyu Hpyi” ten, Wa Sarabyin Francis, dai shani hti ang ai Kabu Gara Shiga hpe lakap nna, Yesu gaw Asak lusha rai nna, Shi chyu sha htani htana wenyi asak hpe jaw ya ai, ngu mungga htawn da nga ai.

 Yesu Madu, shawa masha ni hpe mungga htawn ngut ai hpang muk hpe shalaw ai lamik kumla hpe shanhte ni mau hpa mu lu ma ai.

Nam mali hte zaibru pa hta hkrun lam hkawm lai wa ten, Jiwoi jiwa ni hpe Karai Kasang lamu de na manna muk jahkrat ya ai hpe, Wa Sarabyin Francis, bai myit dim sumru woi let, Yesu Madu gaw anhte a shani shagu na asak muk re ai, ngu tsun dan da ai. “Ngai gaw asak muk rai nngai.” Ndai ga hta, Yesu Madu anhte hpe wenyi lusha tai ya nga ai, anhte a hkrat sum ai lam ni hpe chye na mara raw ya nga ai, anhte hte galoi mung rau nga nga let n-gun atsam jaw ya ai, salum simsa tsi tai ya nga ai ngu tsun da nga ai. “Ndai dinghta ga ntsa asak htum ai shani Yesu Madu chyu sha htani htana asak hpe jaw ya na re,” ngu mung tsun da ai.

Yesu Madu a tsawm htap hkrang kumla “asak muk” Chyoi Pra Hkum gaw Shi kadai re ai ngu ai hte Shi a sasana magam hpe shadan shalen nga ai; dai gaw hpang jahtum daw sha poi sakse nan rai sai. Yesu gaw anhte shinggyim masha ni a hkum hkrang lu sha hpe sha jaw ya ai n re; Shi a Hkum, Shi a Asak, Shi a Shan, Shi a Salum mahkra, anhte hpe jaw ya sai. Dai gaw anhte htani htana asak lu la na matu rai nga ai, ngu mung shang lang da nga ai.

Ndai lam hpe “Misa Hkungga Chyeju” hta mau hpa mu lu ga ai. Yesu Madu gaw anhte hpe lusha hta n-gun jaw ai asak muk rai nga ai; anhte chyoi pra hkum kawan akyu hpyi ai a marang e mung mau hpa chyeju atsam hpe hkam la lu ga ai.

Kabu Gara Shiga hta byin ai mabyin hta shawa masha law malawng gaw dai mau hpa mabyin hpe mu shut chye na shut ma ai hpe mu lu ai. Shanhte a matu Yesu ga sadi tawn da ai ndai gaw nye a hkum shan sai ngu ai hkap la n lu byin ma ai.

Anhte mung, sumsing mungdan hta nga ai Karai Kasang anhte a shani shagu na prat hta rau nga nga let lam woi ya u ga matu myit sharawng nga ra ga ai. Karai Kasang gaw anhte a mungkan hta kaja wa teng man shinggyim hkum sa la nna anhte hte rau galoi mung anga nga ai. Ra ahkyak, ra kadawn ai aten shagu anhte hpe garum ya nga ai. Anhte hpe tsaw ra ai Yesu Madu gaw anhte hte nihtep dik nga nga mayu ai, ngu Wa Sarabyin sumru woi da ai.

Hpang jahtum mungga hta, Wa Sarabyin Francis, kun dinghku masha ni lusha rau sha na hpawng de ai aten, muk hpe ahkyep na shawng kaw, asak muk rai nga ai asak Madu, Yesu Hkristu hpe anhte a dum nta kata saw shaga, shaman hkam la nga ga; shaloi, Yesu Madu anhte a shaku hta anhte hte rau rai nga nna, anhte hta grau ai tsaw ra lusha hpe jaw ya na ra ai; Nu Maria hpe mung mada yu ga; shaloi, anhte a shani shagu prat hta asak muk Madu Yesu Hkristu hte nihtep dik hku hkau na lam hpe hkam la lu matu shi garum ya na ra ai, ngu laban shani, “Madu a Lamu Kasa Akyu Hpyi Ga” tsun ten hpung shawa masha ni hpe n-gun jaw da ai hpe Vatican Shiga Dap kaw nna ndau da ma ai.

https://www.vaticannews.va/en/pope/news/2021-08/pope-may-we-grow-in-friendship-with-jesus-the-bread-of-life.html

By Fr. Patrick Gawmaw Hkawng Yae