Wa Sarabyin: Anhte A Ntsa Galoi Mung Tsaw Ra Ai Karai Kasang Hpe Aten Shagu Shakawn Shagrau Sha-a Nga Ga

January 13, bat masum (3) ya shani, San Peter pa hta,  shawa manam ni hte hkrum shaga ai aten, Wa Sarabyin Francis gaw shakawn shagrau akyu hpyi ai lam hte seng nna sumru woi da ai. Prat shagu e anhte a makau grupyin hta Karai Kasang gaw anhte a ntsa galoi mung sadi dung nga ai.

Dai shani Wa Sarabyin gaw, Mara tam hkrum ai Madu Yesu a prat hpe sumru woi let shi a mungga hpe hpang ai.

Madu Yesu a Sasana magam nnan hpang ai aten hta Karai Kasang a ja mungdan lam hkaw tsun ai hte mau hpa lamik kumla ni hpe madun hpang ai. Masha ni a n ra sharawng ai hte mara tam mara shagun hkrum ai lapran Messiah Karai a sasana magam hpe galaw ra ai.

Yawhan Batista hkum nan Yesu a lam tsun dan ai shaloi shawa masha ni myit um-ang nga ma ai rai nna Madu Yesu hkaw tsun ai mungga ni hpe ninghkap ma ai.

Ndai zawn myit htum na zawn rai ninghkap hkrum ai aten hta, Madu Yesu Kawa Karai Kasang hpang hpe aput angun hkrap sharung ai lam n galaw ai. Dai mayak ni a lapran Madu Yesu Kawa Karai Kasang hpe shagrau sha-a ai, shakawn shagrau ai.

Karai Kasang gaw, Karai Kasang rai nga ai majaw shakawn shagrau hkrum ai rai nga ai. Yesu Madu gaw Kawa Karai Kasang hpe mungkan ting a Karai, n gawn tawa ting a Karai, nga yawn nga pra a Karai, shi a Kawa re ai hpe hkrak sha dum chye ai.

Shakawn shagrau, shagrau sha-a ai lam gaw Yesu Madu “Tsaw Htum Karai a Kasha Shingtai” shi hkum nan hkam sha ai mahkrum madup hta na prut pru wa ai rai nga ai.

Karai Kasang gaw kaji htum ni hpe myiman pa shangun ai. Shanhte hpe ahkyak madung da ai. Shanhte hpe tsaw ra ai. Hpaji rawng dum ai ni hte kung kyang dum ai ni hpe gaw shagrit kau ai.

Madu Yesu tsun ai “kaji htum ai” ni gaw Kawa Karai Kasang ra sharawng hkrum ai ni rai nga ai. Yesu Madu mung dai hpe sharawng awng nga ai rai nna Kawa Karai Kasang hpe shakawn shagrau nga ai. Hpa majaw nga yang dai “kaji htum ai” shagrit shanem ai hte yu maya masha ni gaw Kabu Gara Shiga hpe hkap la ma ai majaw rai nga ai.

Madu Yesu gaw hkrat sum ai zawn re ai aten hta raitim Karai Kasang hpe shakawn shagrau ai. Ndai gaw anhte a hkrat sum aten ni hta n gun jaw ya nga ai n htoi shingkan nan rai nga ai. Dai zawn re ai aten hta Karai Kasang hpe shakawn shagrau ai mung anhte hkum nan a akyu ara matu she rai nga ai. Karai Kasang a matu n re ai hpe dum nga ra ga ai.

“Yak hkak jam jau hkrum ten ni hta Karai Kasang hpe shakawn shagrau chye ga; chyam dinglik hkrum ai ngu hkam la ai aten ni hta Karai Kasang hpe shagrau sha-a chye ga,” ngu Wa Sarabyin n gun jaw nga ai.

Ngwi pyaw ten ni hta sha shaman chyeju hkam la lu ai n rai ga ai. Anhte yak hkak jam jau hkrum aten ni hta mung Karai Kasang hpe shakawn ra ai. Dai zawn galaw ai a marang e, Karai Kasang madun dan na dam lada ai mabyin hkum ningmu kaba ni hpe mu la hkam la lu na teng sha rai nga ai.

San Francis A Kasi Ningli

San Francis gaw –Laudato si – mungkan ga hpe makawp maga ai hta yak hkak jam jau law law a lapran Karai Kasang hpe shakawn shagrau lai wa ai. Shi a prat jan shang wa aten hta akyu hpyi ga hpe ka da lai wa ai hpe yu yang shi a prat hta jam jau jam hkau hkrum ai lapran Karai Kasang hpe galoi n malap ai sha aten shagu shakawn shagrau ai hpe mu lu ai. “Hpan da hkrum nga yawng nga pra a matu Karai Kasang hpe chyeju dum ai; si hkrung si htan lam a matu chyeju dum ai,” ngu akyu hpyi lai wa ai.

“San pra ai ni a kasi ningli gaw anhte ni a prat hta ngwi pyaw ten rai tim, ruyak jam jau hkrum aten rai tim, Karai Kasang hpe shakawn shagrau, shagrau sha-a nga ra ai hpe dum chye hkan shatup sa wa na matu n gun jaw nga ai. Hpa majaw nga yang Karai Kang gaw anhte a ntsa kaja dik htum manang rai nga ai; anhte hpe tsaw ra ai manang rai nga ai; anhte hpe galoi mung tsaw ra n jing ai wa rai nga ai; shi a tsaw ra ai lam galoi mung mat mat ai ngu n nga ai,” ngu Wa Sarabyin Francis shi a mungga jahtum hta n gun jaw shadum jahprang da ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-01/pope-francis-we-can-always-praise-god-whose-love-never-fails.html