Wa Sarabyin: Anhte Ni Yesu Madu Hta Manoi Nga Ai Rai Yang She, Apu Asi Pu Si Lu Na Rai Ga Ai

“Christian Unity Service” Hkristan ni galung kahkying gumding akyu jawm hpyi ai laban bat magam hpe January 18 – 25 lapran kaw galaw lai wa sa ga ai. Hpang jahtum shani ang ai January 25, bat langai shani Cardinal Kurt Koch a mungga hta tsun da ai “nga nan nga ra ai galung kahkying gumding lam gaw Yesu Madu hta manoi nga ai a marang e she hkam la lu ga ai, ngu ai hpe Wa Sarabyin Francis bai woi sumru da ai.

January 25, bat langai ya shani gaw San Pawlu myit malai lu galai shai wa ai masat poi ntoi mung rai nga ai.

2021 shaning na Hkristan ni galung kahkying gumding nawku daw jau ai laban bat magam ginchyum dat akyu hpyi hpawng hpe San Pawlu hpe lup da ai shara hta gaw gap da ai San Pawlaw Nawku Htingnu kaba hta galaw lai wa ai rai nga ai.

Cardinal Kurt Koch gaw the Pontifical Council for Promoting Christian Unity a president “hpa awn” rai rai nna, dai shani na akyu hpyi lamang hpe woi awn la ai re lam chye lu ai.

Daining na nawku daw jau shaning hta sumru na manoi ga hpe Yawhan a Kabu Gara Shiga Laika hta na “abide in me” “ngai hta manoi nga mu” ngu ai Madu Yesu a ga rai nna Wa Sarabyin gaw dai hpe sumru woi da ai lam mung Vatican kaw nna tsun dan da ma ai. Sabyi ru madung hta noi nga ai lakung lakying ni zawn, anhte ni Madu Yesu hta manoi nga ai rai yang kung kaba wa nna apu asi ni pu si lu na rai ga ai lam tsun da ai.

Galung kahkyin gumding ai hta lakang n-gam daw masum nga ai lam mung Wa Sarabyin Francis sang lang da ai. Dai gaw hpun langai hta nga ai daw ni hte maren rai nga ai.

Shawng na daw gaw Madu Yesu hta manoi nga ai lam rai nga ai. Galung kahkyin gumding lam de sa wa ai masha shagu a matu n nan hpang ai lakang n-gam rai nga ai. Madu Yesu hta manoi nga ai ngu ai gaw shi hta akyu hpyi nna shi a tsaw ra ai hpe hkam sha lu hkra anhte a myit masin bawnu nyan marai hpaw da ai lam rai nga ai. Ndai gaw shawng na galung kahkyin gumding hpang ai lam rai nga ai.

Hkristan masha ni a lapran galung kahkyin gumding ai gaw lahkawng ngu na lakang n-gam rai nga ai. Anhte gaw sabyi ru madung hte matut nga ai lakung lakyin ni rai ga ai. Ndai daw hta mung akyu hpyi ai lam gaw ra ahkyak ai lam kaba rai nna, dai zawn akyu hpyi ai a marang e, anhte ni shada langai hte langai tsaw ra lu ai lam de woi ning shawng ya ai. Ndai zawn galaw lu na matu grai nan nloi la ai gaw rai nga ai. Anhte ni a lapran shada yu shut, mu shut, na shut, sumru shut ai lam ni nnga hkra gaw Karai Kasang kaw akyu hpyi shaja ra ga ai. Shaloi anhte gaw Karai Kasang a kashu kasha majing ni rai ga ai hta galung kahkyin gumding nga lu na rai ga ai.

Hpang jahtum na lakang n-gam gaw shinggyim myu sha ni yawng hpe hkrawm la ai lam rai nga ai. Anhte gaw Chyoi Pra ai Wenyi a atsam hte sumru hkan shatup lu na rai ga ai. Anhte hpe tsaw ra ai ni hta lai nna masha shagu hpe tsaw ra lu ai tsaw ra myit hpe Chyoi Pra ai Wenyi anhte hta jaw bang ya nna garum ya nga ai. Yesu Madu hkum nan tsun da ai.  Kaja ai Samaritan masha zawn anhte a htingbu hpe tsaw ra ai ngu ai gaw tinang hpe tsaw ra ai wa hpe sha tsun ai n rai nga ai. Tinang hpe n tsaw ra ai wa hpe tsaw ra chye ai lam gaw htingbu wa hpe tsaw ra ai ngu ai lachyum rai nga ai.

Sakse sakgan hte hkrat re ai Tsaw ra lam

Hpu nau ni hpe daw jau garum shingtau na matu rau jawm hpawng de ai gaw hpu nau ni rai ga ai hpe myit dum shangun ai rai nna, galung kahkyin gumding lam hpe grau shangang shakang ya ai. Anhte gara hku nga pra na hpe lata hkan sa ai gaw yawng a akyu ara matu yawng hte seng ai dum nta hpe makawp maga ai lam mung rai nga ai.

Ya na zawn chyam bra ana zingli a majaw nawku daw jau lamang hpe masha law law hpawng de nna n lu galaw ga ai raitim, byin mai ai ladat ni hte anhte ni kaja dik htum shakut galaw saga ai hta online hku shang lawm ai hta, masha hkum nan sa du shang lawm ai hta Chyoi Pra ai Wenyi shadut ya ai hte galaw la lu saga ai lam Wa Sarabyin Shi a ginchyum dat mungga hta tsun da ai hpe Vatican Shiga Dap kaw nna ndau da ma ai.

Karai Langai, Atai masum a tsaw ra ganawn mazum lam gaw anhte a galung kahkyin gumding lam hpe shangang shakang shagrin ya nga u ga law ngu akyu hpyi shangut da ai.

https://www.vaticannews.va/en/pope/news/2021-01/pope-francis-we-bear-fruit-only-if-we-remain-united-in-jesus.html