Wa Sarabyin: Anhte Mat Shagu Karai Kasang Anhte Hpe Hkan Tam Ai

image from Vatican website

September 11, laban shani, San Peter Shawa Pa hta, 'Madu A Lamu Kasa Akyu Hpyi Ga' tsun ten, Wa Sarabyin Francis, Karai Kasang gaw anhte mat mat shagu hkan tam ai re, nga nna tsun ai.

Anhte mat mat shagu, Karai Kasang gaw shi a lata ladawn let anhte hpe a-la nga ai; dai gaw Shi anhte hpe gade tsaw ra ai, matsan dum lama ai, anhte hte nihtep nga ai hpe madun dan ai rai nga ai.

Dai shani hti ang ai Kabu Gara Shiga, 'Matsan Dum Lama Myit Kaba Ai Yesu Madu a mat mat ai sagu a lam ga shadawn, dam mat ai kasha kanau wa hpe Kawa hkap tau la ai lam, hpe lakap nna sumru, hkaw tsun da ai rai nga ai.

Mara lu ai ni hte rau lu sha nga ai Shi hpe, Pharisee ni hte Tara Sara (Scribes) ni mara shagun mara mu nga ma ai hpe Chye ai Madu Yesu, shanhte hpe madi nna shadum ai ga shadawn rai nga ai.

Karai Kasang gaw kadai hpe mung n shangam da ai; marai hkum shagu hpe Shi a daw sha poi hta shang lawm shangun mayu ai; masha hkum shagu hpe Shi a kasha zawn tsaw ra ai.

Karai Kasang gaw anhte mat mat shagu, dam mat shagu Kawa langai zawn anhte hpe hkan tam nga ai.

Mat mat ai shi a gumhpraw hpe hkan tam nna mu la ai myu shayi zawn, dam hkawm mat nna bai htang wa ai kasha hpe hkap tau la ai kawa zawn Karai Kasang anhte hpe hkan tam nga ai.

Mat mat ai wa hte seng hkra galaw la ai wa gaw shi hpe tsaw ra ai majaw, n du lawm shi ai wa hpe myit mada ala taw nga ai gaw shi hpe tsaw ra ai majaw, lam dam mat ai wa hpe ala dingda nga ai, n du wa jang hkan tam ai; langai hpe mung mat mat na Karai Kasang n ra sharawng ai.

Karai Kasang gaw shi a lata ladawn let anhte hpe ala nga ai. Shi a lahpyen hta du wa ai aten du hkra shi a lata hpe ladawn let anhte hpe ala nga ai, hkap tau la nga ai.

Kawa a masin salum, kanu a masin salum hte mat mat ai anhte hpe, dam mat ai anhte hpe, shut kataw ai anhte hpe hkan tam nga ai; n hkrum hkraw shi ai shi a kasha ni a matu Karai Kasang hkam sha yak taw nga ai. Shi gaw anhte hpe mat mat ai jahpan kaw galoi n bang kau ai.

Masha hkum shagu gaw Karai Kasang a matu ahkyak ai hkrai rai nga ai. Mat Mat, dam mat, shut kataw ai ni hpe madung da, ahkyak da saw shaga nga ai Karai Kasang gaw anhte shada da mung Shi zawn rai nga na hpe myit ra nga ai.

Nihtep dik htum masha hte rau rai nga ga ai raitim, nang ngai yawng, Karai Kasang hte grau nihtep ga ai hpe gaw dum hprang ra ga ai. Kanu Nu Maria mung shi a kasha ni hpe hkan tam ai hta galoi mung pu ba ai ngu n nga ai wa rai nga ai. Shi kaw akyu hpyi htinglu htinglai let Karai Kasang a man de sit shang wa ra ga ai hpe Wa Sarabyin Francis shadum da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-at-angelus-god-always-searches-for-us-when-we-are-lost.html

 

Add new comment

1 + 0 =