Wa Sarabyin: Anhte Galoi Mung Akyu Hpyi Ra Ga Ai

image from Vatican website

Wa Sarabyin Francis gaw November 11, bat 3 ya shani, akyu mawn mawn hpyi ai gaw ahkyak dik ai re ngu Madu Yesu a ga shadawn masum hpe sumru let shadum sharin ya ai.

Madu Yesu hkum nan mung akyu hpyi let, anhte hpe kasi kamang madun dan ya sai re. Akyu hpyi ai hta shakut shaja nga ra ga ai.

Madu Yesu a ga shadawn masum gaw akyu hpyi ai a laklai ai lam hpe madun dan ai re ngu Kahtawlik Nawku Hpung hkap la da ai re. Anhte a Kawa Karai Kasang gaw anhte ra ai hte ra kadawn ai lam yawng hpe chye ya ai. Akyu hpyi ai gaw Karai Kasang n dum n chye ai anhte a ra kadawn ai lam hpe tsun shadum ai n re ai; jaw ya mayu hkra tsun la ai mung n rai nga ai; raitim, anhte a myit ra ai lam hte myit mada ai lam ni hpe gaw sharawt ya na matu she rai nga ai.

“Makam masham gaw chyahkrin chyahkra gan lata la ai makam n re ai; Karai Kasang hte ga rawng rawng na matu mung n re ai; raitim, Karai Kasang kaw akyu hpyi na matu gwi gwi daw dan na matu she rai nga ai.” Ndai gaw Madu Yesu tsun ai “N-tara ai Tara Agyi” ga shadawn a marang e chye na shangun ai rai nga ai.

“Karai Kasang gaw rai dum ai ni hte gawng ai ni a akyu hpyi nsen hpe n madat ya ai. Shagrit shanem ai ni a akyu hpyi nsen hpe gaw Karai Kasang madat ya ai. Shagrit shanem ai lam n nga ai akyu hpyi nsen gaw teng man ai akyu hpyi nsen n rai nga ai. Ndai gaw Madu Yesu tsun ai “Pharisee hte Kang hta ai yan a akyu hpyi” ga shadawn a marang e chye na shangun ai rai nga ai.

Kabu Gara Shiga a sharin shaga ai gaw asan sha rai nga ai. Anhte ni aten shagu akyu hpyi ra ga ai: yawng gaw kaman lila zawn ngu hkam sha ai shaloi raitim; akyu hpyi na matu grai yak dum ai shaloi raitim; Karai Kasang anhte a akyu hpyi nsen hpe n madat ya ai ngu hkam sham ai shaloi raitim ngang kang myit hte akyu mawn mawn hpyi ra ai.

“Shana aten hta akyu hpyi ai wa gaw tinghkrai shingtai n rai nga ai. Madu Yesu gaw akyu hpyi ai ni hte rau galoi mung nga nga ai; Madu Yesu a akyu hpyi ga hta anhte hpe galoi mung hkap tau la ai; dai majaw anhte ni gaw Madu Yesu hta Madu Yesu a marang e akyu hpyi ra ga ai. Ndai gaw Chyoi Pra ai Wenyi a bungli nan rai nga ai.” Madu Yesu gaw shinggyim masha ni akyu hpyi ai hta shanhte myit ra ai lam hpe madu lu na matu sinkaw hpe shakap ya ai.

Akyu hpyi ai Hkristan ni gaw hkrit tsang ai myit n rawng ai. Shakawn Kungdawn 91 hta rawng ai hte maren Madu Yesu hta kam hpa kam shamyat nga ra ga ai. Hkristu Madu kaw kam hpa myit hte akyu hpyi ai rai yang, anhte shinggyim n gun atsam hte galaw shaja ai hpe shayawm ya ai.  

Madu Yesu Hkristu gaw anhte a matu mahkra re; anhte prat a matu re. Akyu hpyi ai Hkristan ni gaw hkrit tsang shara n nga ai,” ngu Wa Sarabyin Francis shawa masha ni hte hkrum ai shaloi mungga htawn da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-at-audience-we-must-pray-always.html

Add new comment

10 + 5 =