Wa Sarabyin: Akyu Hpyi Ai Gaw Makam Tsi, Wenyi Hpe Makawp Da Lu Ai

Wa Sarabyin: Akyu Hpyi Ai Gaw Makam Tsi, Wenyi Hpe Makawp Da Lu Ai

October 16, laban shani, Madu a Lamu Kasa Akyu Hpyi Ga tsun ten Wa Sarabyin Francis, Karai Kasang hte nihtep htingbu ni hpe tsaw ra lu na hta akyu hpyi ai gaw ahkyak ai, dai gaw makam tsi re, wenyi hpe mung makawp da lu ai, nga nna tsun da ai.

Chyum Laika hpe gaw dai shani hti ang ai chyum daw hpe lakap nna tsun da ai.

"Masha Kasha du sa ai nhtoi hta, ndai mungkan ntsa e makam masham nga nga ai hpe mu lu na a kun?" (Lk 18:8)

Ndai chyum daw hte anhte hkum hpe anhte san jep la mai ga ai lam Wa Sarabyin anhte hpe shadum jahprang da ai.

Myit n pyaw hpa lam ni: law la ai majan ni, matsan mayan re ai lam ni, n bung pre ai lam ni; ndai lam ni hpe Shi mu la nga na re. Prat madang hta hkan nna jak hpaji hkum sumhpa ni hpe mung mu lu nga na re. Karai Kasang hpe madung da ai lam n nga ai shinggyim masha ni hpe Karai Kasang mu lu nga na kun? Karai Kasang hpe madung da nga ga, nga nna Wa Sarabyin shadum da ai.

Wa Sarabyin Tsun ai: "Yesu Madu gaw makam masham hpe shangang shakang makawp maga ai tsi hpe jaw ya ai. Dai gaw hpa rai ta? Akyu Hpyi Ai Lam rai nga ai. Akyu Hpyi Ai gaw makam masham a matu tsi kaba rai nga ai; wenyi hpe mung makawp maga ya ai."

Anhte a makam masham sak rawng ai hte hkam ja nga na matu anhte ni aten shagu akyu hpyi nga ra ai; dai gaw, anhte a wenyi hpe kaja ai hku matut nga nga shangun ai, ngu tsun ai rai nga ai.

"Anhte gaw shani shagu akyu hpyi nga ra ai; aten shagu Karai Kasang kaw ap nawng da ra ai; shaloi, shi anhte a ten tup hta nga lawm ya ai hpe hkam la lu na; anhte a masin salum ni hpe hpaw da ya ga; shaloi, anhte hta tsaw ra ai, simsa ai, kabu pyaw ai, n-gun atsam, myit mada shara ni hpe Shi jaw bang ya nna makam masham hta shangang shakang ya na ra ai," nga nna Wa Sarabyin tsun da ai.

"Anhte dum hprang wa ai hte rau, Madu e, dai ni a matu Nang Madu hpe chyeju dum nngai; ndai nhtoi hpe nang Madu a matu ap nawng da nngai, ngu hpyi ga; magam bungli n galaw shi yang, 'sa rit, Madu e sa rit' ngu mung hpyi ga; Yesu Madu e, ngai nang hta kam hpa kam sham nngai, Nang madu hpe tsaw ra nngai, ngu nna mung hpyi mai ai," nga nna Wa Sarabyin Francis, akyu gara hku hpyi ra ai lam sharin da ya nga ai.

Hpang jahtum hta mung, Nu Maria gaw anhte a akyu hpyi ga hpe madat ya nna aten shagu gara hku akyu hpyi nga ra ai lam sharin ya u ga, ngu akyu hpyi htinglu htinglai let Wa Sarabyin Francis, shi a mungga hpe ginchyum dat da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-10/pope-at-angelus-prayer-is-medicine-for-faith-restoring-the-soul.html

 

Add new comment

11 + 6 =