Wa Sarabyin: Akyu Hpyi Ai Gaw Anhte A Prat Hkrun Lam Hpe Lam Matsun Na Matu Shadum Jahpran Ya Ai

Tau nau akyu hpyi ai; simsa ai hte akyu hpyi ai; grau nna Covid-19 a majaw machyi ai ni a matu akyu hpyi ya ai; shanhte a matu tsi sawk sagawn, tsi lajang ai ni a matu akyu hpyi ya ai na matu Madu Yesu anhte hpe lam matsun madun nga ai re ngu Lai sai laban bat 3 ya shani shawa masha ni hte hkrum ai aten hta Wa Sarabyin Francis tsun shadum da ai.

Wa Sarabyin gaw shawa masha ni hte hkrum shaga ai lam hpe kam sham ai hpung masha ni n lawm ai sha the Apostolic Palace na library (laika hti gawk) kaw kalang bai galaw ai rai nga ai.

Mung masa lam hte hkam ja Dap Hpa-awn ni kaw nna masat matsun ai lam ni hpe hkung ga lara di hkan shatup na gaw ahkyak ai re lam mung bai kahtap tsun ai.

“Ya na zawn masha shada gang hkat ai hku nga ra ai hpe Karai Kasang kaw ap nawng let hkan shatup ga. Shingdu gayin da hkrum ai zawn hkam sha nga ma ai machyi masha ni a matu mung aten shagu myit dum myit tau ya nga ga. Tsi Du Kaba ni (doctors), tsi sara num ni (nurses), ap nawng nga ai ni (volunteers), hte machyi masha ni hpe yu gawn nga ai ni a matu mung myit dum myit tau ya ga. Shanhte a prat hta yak hkak ai lam law law nga ma ai rai tim, shawang tsaw ra myit hte shanhte shaga la hkrum ai lam hta ni htep ai ni a matu dau jau nga ma ai re. Shanhte yawng a matu akyu hpyi ya ga,” ngu Wa Sarabyin Francis n gun jaw shaw shaga da ai.

Dai hpang Wa Sarabyin Francis gaw Madu Yesu a akyu hpyi ai kasi kamang hpe matut sharin ya ai.

Yesu Madu a akyu hpyi ai gaw mau hpa mungsung lam rai nna, kaja wa akyu pru ai re.  

Mk 1: 32, 34-38 hta na chyum daw hpe sumru woi da ai. Madu Yesu machyi masha law law hpe shamai shatsai ya ai lam galaw ngut jang shi langai hkrai sha simsa ai shara de sa nna akyu hpyi ai lam rai nga ai. Capernaum na masha ni Yesu hpe tam ai lam Kasa ni tsun dan wa ai shaloi kaga mare ni hta machyi masha ni hpe naw shamai hkawm ra ai lam; kabu kara shiga hkaw tsun ra ai lam Madu Yesu bai tsun sanglang da ai.

Yesu Madu akyu hpyi ai lam kaw na kasi la hpa sakse mali hpe mung tsun dan da ai.

Shani shagu na yup rawt hpang wa ai hte dai nhtoi hpe hpang ai akyu hpyi gaw Madu Yesu sharin ya ai akyu hpyi ga rai ra ai.

Akyu hpyi ai lam nnga ai rai yang dai nhtoi gaw lagawn na zawn, shing nrai, katsi gatsang akyu n nga ai zawn re ai mahkrum madup de gale mat chye nga ai.

Hpa mi rai rai, akyu hpyi ai lam gaw Karai Kasang hte hkrum shaga ai lam rai nga ai majaw, madat mara hkam sharang ai hte Karai Kasang a nsen hpe madat hkam la na gaw ahkyak ai lam Yesu Madu sharin ya ai.

Shani shagu hkrum ang ai mayak manghkang ni gaw akyu hpyi ai hpe pat shingdang ya ai n rai nga ai. Karai Kasang a nsen hpe madat hkam la na hte anhte hte nihtep ai ni hpe garum na matu rai nga ai.

Yawng gaw Karai Kasang kaw na rai nna, Karai Kasang kaw bai nhtang wa ra na re.

Ngwi pyaw simsa ai hte kabu pyaw ai lam gaw Yesu Madu a akyu hpyi ai ga hta nga ai.

Translated by Fr. Patrick Gawmaw Hkawng Yae

#vaticannews #rvakachinservice

Source : Vatican News