Wa Sarabyin: Ahkyak Ai Grupyin Shinra Hpaji Lam Hta Bawng Ring Rawt Jat Na Anhte A Matu Ra Ahkyak Taw Sai

July 18, Laban ya shani, “Madu A Lamu Kasa Akyu Hpyi Ga” tsun ten, Wa Sarabyin Francis, anhte hta ahkyak ai grupyin shingra hpaji lam bawng ring rawt jat na ra ahkyak taw sai, ngu tsun da nga ai.

Wa Sarabyin Francis gaw kan ga tsi lajang la ngut ai hpang laban hta Madu A Lamu Kasa Akyu Hpyi ga hpe shawoi na hte maren, San Peter pa hta bai matut galaw sai rai nga ai.

Dai shara kaw nna hpung shawa masha ni hpe “Madu A Lamu Kasa Akyu Hpyi Ga” tsun woi let mungga htawn ya ai hta, “ecology of the heart” Grupyin Shingra Hpaji Daju, ngu ai ga si hpe jai lang da nga ai. Hkring sa let, myit aru yu let, n-gaw n-wai ai myit tawn let dai hpe gaw sharawt ra ai; dai gaw du na ra ai ginhtawng ta hta htuk manu dik nga ai ngu Wa Sarabyin Francis tsun shadum da nga ai.

Chyum mungga hpe Marku 6:31 kaw na, “Nam maling kata na machyi shim ai shara de, nanhte hkrai nan sa nna, loi mi ban sa la mu”, ngu ai hpaji jaw n-gun jaw ga hpe jai lang da nga ai.

Ndai hpaji jaw, n-gun jaw ga hte maren nga yang Madu Yesu gaw anhte hpe ahkyak ai sharin shaga lam hpe jaw ya ai; Shi anhte hpe awn ya nga ai lam gaw wenyi hte nawng hkum hkrang lam mung lawm nga ai gaw dan dawng nga ai.

Anhte mung tinang galaw ai magam ni hta myit jung ai hte galaw ai rai yang apu asi hkam la lu na; ndai aten ni hta anhte myit yak ai lam ni law law a lapran tinang hkum nan madi shadaw garum ya ai ningbaw ni zawn rai nga ra ai; prat shagu na Nawku Hpung lai di wa ai aten ni hpe anhte yu yang anhte ni gaw grai kyin, grai myit ai ni rai ga ai hpe mu lu ga ai; anhte hta grai nan madung tai nga ai ngu myit la ga ai; Raitim Madu Yesu hta madung da ra ga ai hpe mung myit dum ra ga ai. Madu Yesu gaw anhte hpe hkring sa la na matu tsun ai; hkum hkrang a matu sha n rai nga ai; wenyi myit masin salum a matu mung hkring sa la ra ga ai, ngu Wa Sarabyin Francis sang lang n-gun jaw da nga ai.

Kaja wa sha hkring sa lu na matu anhte ni gaw mahkra hte seng ai salum hpang de kayin wa ra ai; magam bungli ni hpe jahkring da nna shim ai hkun azim shim nga nna akyu hpyi ra ai; dai gaw anhte galaw ra ai, galaw nga ai lam ni yawng kaw nna gan jahkring let dai lam ni hpe grau myit jung ai hte sumru sa wa lu na matu mung rai nga ai.

Madu Yesu gaw masha ni hpe daw jau ai lam aten shagu galaw ai; raitim shani shagu shim ai shara hta hkring sa let akyu hpyi ai; Kawa Karai Kasang hte nihtep ai hku nga ai. Anhte hpe mung shi zawn chyahkring mi hkring sa la let akyu hpyi nna Kawa Karai kasang hte nihtep ai hku nga na matu saw shaga nga ai; dai zawn galaw ai hta shi hkum nan anhte hte rau rai nga na ngu ga sadi jaw da ai.

Gara hku hkring sa la ra ai hpe sharin hkam la ga; mobile phone ni hpe gan pat da ga; shada da yu hkat ai lam ni hpe mung chyahkring mi sha gaw gan jahkring da ga; simsa lam hpe shabyin ga; shingra maka hpe myit aru yu nna Karai Kasang hte matut mahkai ga shaga ai lam hpe anhte hkum nan aten tam la ga, ngu mung n-gun jaw da nga ai.

Ndai laban na Kabu Gara Shiga hpe matut sumru yu ga nga yang, Madu Yesu hte Shi a kasa ni magam bungli galaw shaja ai majaw hkring sa ten n lu ma ai hpe mu lu ga ai. Hpa majaw nga yang shawa wuhpawng ni shanhte a garum shingtau ya ai hpe hkam la na matu matut manoi du hpawng nga ma ai majaw rai nga ai.

Madu gaw shanhte hpe yu matsan dum ai majaw shi a aten hpe masha ni hpe garum ya na hta aten shama kau ai; dai hpe yu yang hkring sa na matu tsun ai gaw Madu Yesu galaw ai hte shai mat ai zawn gaw rai nga ai. Raitim, dai hku gaw n rai nga ai; masin salum gaw magam bungli ni hta sha aten jaw kau na matu n rai nga ai; dai magam hta sha madung da sumru galaw sa wa na matu mung n rai nga ai; Karai Kasang hpe aten jaw na matu gaw madung rai nga ai; anhte a masin salum gaw galoi mung shamu shamawt nga lu na matu, masha ni hpe myit dum ya na matu, shanhte a ana ni hte ra kadawn ai lam ni hpe dum chye na matu mung rai nga ai.

Matsan dum tsaw ra ai lam gaw myit jung ai hte myit aru yu ai kaw nna pru wa ai rai nga ai. Jaw ang dik ai masa hte gara hku hkring sa la na ngu ai hpe atsawm sha sharin la ai gaw matsan dum tsawra magam a matu rai nga ai. Madu Karai hte nihtep ai hku nga ai a marang e mung, anhte kadai re ai hpe sumru la ai a marang e mung, anhte a magam bungli ni hta grau masan sa ai hku galaw sa wa lu na matu rai nga ai. Dai majaw ginchyum dat ga tsun ga nga yang, anhte hta makau grupyin shingra hpaji daju ngu ai gaw ra ahkyak ai. Dai lam ni gaw anhte hpe atsawm hkring sa lu shangun ai, atsawm myit aru la lu shangun ai, matsan dum tsawra magam hpe atsawm galaw lu shangun ai, ngu Wa Sarabyin Francis, ndai laban shani na “Madu A Lamu Kasa Akyu Hpyi Ga” tsun ten, sumru woi da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-07/pope-at-angelus-we-need-to-develop-an-ecology-of-the-heart.html