Wa Sarabyin: Agung Alau Hpe Karai Mungga Hte Tai Htang Sa Wa Ga

March 6, laban shani, anhte a shani shagu na prat hkrunlam hta agung alau nga nga ai; dai zawn rai agung alau jaw ai satan hte myit hkrum lam n tawn da ai Madu Yesu hpe kamhpa nga na matu Wa Sarabyin Francis, Hkristan masha ni hpe saw shaga da nga ai.

During his Angelus address, lusha gam ladaw laban langai shani, Madu Yesu mali shi ya mali shi na tup lusha gam akyu hpyi ai hte agung alau hkrum ai lam hpe madung sumru woi da let ya na zawn shadum da ai rai nga ai.

Nam mali kata lushagam akyu hpyi nga ten, satan gaw Madu Yesu hpe sa gunglau ai raitim, teng man lam hpe shanglawt  myit hte lata la let dai teng man lam hpe lata la chye na matu sharin ya ai.

Yesu Madu gaw kaning re ai wa rai nga ai hpe ndai wenyi majan hta asan sha mu lu ga ai, ngu Wa Sarabyin madi madun da ai.

Agung Alau hpe gasat ai lam

Madu Yesu gaw nam mali hta lusha gam akyu hpyi ai shaloi, satan gara hku du sa wa ai lam, Madu Yesu hpe gara hku gunglau ai lam, Wa Sarabyin sang lang dan da ai. “Nang Kari Kasang a kasha rai yang, ndai ahkaw ahkang hpe hkum tat kau u! Nang bai lu na mying dang hkrung na lam, sut gan, arawng ara ni hpe myit dum u, ngu sa gunglau ai rai nga ai.

Raitim, ndai lam ni gaw tang madun dan ai lam sha naw rai nga ai; dai gaw mayam prat de du shangun na lam she rai nga ai; Yesu Madu hta nga ai madu da lu ai lam ni, mying dan hkrung ai lam ni, hte arawng power hpe pyi shamat kau na lam rai nga ai, ngu Wa Sarabyin madi madun da ai.

Madu Yesu hte Karai Mungga

Madu Yesu gaw satan a awng dang lam hpe rai nga ai ndai agung alau ni hte mawng la hkrum ai raitim, dai hpe ninghkap awng dang akau lu ai. Dai gaw Karai Mungga hte rai nga ai; Karai Kasang hpe hkrit hkungga ra ai lam, Karai Kasang a mying ningsang hpe kaman lila gang nna n mai tsun n mai galaw ai lam, ahkaw ahkang hpe kaman lila n ma la ai lam ni rai nga ai.

Teng Man Shanglawt Ai Lam

San Peter shawa pa kaw kam sham ai hpung masha ni hpe mungga htawn ai hta, kabu pyaw lam hte shanglawt ai lam gaw madu lu ai hta madung n re ai sha, dai madu da ai hpe gam garan ai a majaw lu la ai; masha kaga ni a ntsa ahkaw ahkang la ai hta n re ai sha, shanhte hpe tsaw ra ai hta she kabu pyaw lam hte shanglawt ai lam hpe lu la ai; arawng power hpe myit manoi jai lang ai hku n re ai sha, kabu gara daw jau ai magam hte mahtang kabu pyaw lam hte shanglawt ai lam hpe hkam la lu ai, ngu Wa Sarabyin sanglang da ai.

Zeng Ja Rai Nga Mu

Anhte gaw zeng ja rai nga ra ai; hkrit tsang nga n ra ai; dai gaw masha shagu hta byin chye ai; dai majaw galoi mung zeng ja rai nga mu; hpa majaw nga yang,dai lam ni gaw mai kaja lam hpe madu na matu rai nga ai.

Satan gaw myit magaw ai wa, n hkru ai wa, jahten sharun na chyu myit ai wa rai nga ai.

Yesu gaw satan hte galoi mung n jahkrum ai, n bawng ban ai, matut mahkai n galaw ai; Shi hta kam sham ai ni mung dai zawn n galaw ai, ngu Wa Sarabyin shadum sharin shaga da ai.

Satan a arawng mala shangun ai lam hpe teng man jaw ang ai yaw shada myit masa hte mai kaja lam lam hte shagrit kau lu ai. Teng man jaw ang ai mai kaja lam hte jahtuk shatsawm la ra ai, ngu Wa Sarabyin shadum da ai.

Yesu hpe yu ga

Hpang jahtum mungga hku nna, satan hte mahkri sawn lam n galaw ai, myit hkrum lam n galaw, n tawn da ai Yesu Madu hpe yu na matu kam sham ai ni yawng hpe Wa Sarabyin saw shaga da ai.

Yesu gaw Karai Mungga hte rau satan hpe ninghkap ai ya ai; Karai Mungga gaw satan hta atsam grau kaba ai; agung alau yawng hpe mung awng dang lu ai.

Ndai lusha gam ladaw gaw nam mali kaw lusha gam akyu hpyi ai ladaw rai nga ai; shim ai hte akyu hpyi na aten rai nga ai; chyahkring mi sha raitim akyu hpyi ga; dai gaw anhte hpe akyu jaw na ra ai; nang nga ai shara hta hkring mi sha raitim hkring la nna anhte a masin salum kata na teng man lam hpe yu la ga; Karai Kasang a mungga shawng hta anhte hkum hpe tawn da ga; anhte hpe mayam shatai ai n kaja ai lam ni kaw nna lawt lu hkra gasat nga ga; shaloi Karai mungga anhte hta nga nga na ra ai, ngu lusha gam akyu hpyi nga na matu mung Wa Sarabyin saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-03/pope-at-angelus-respond-to-temptation-with-the-word-of-god.html