Wa Sarabyin: 2021 Shaning Na Lusha Gam Ladaw Hta Kamsham, Myit Mada, Tsawra Lam Ni Hpe Tsawm Htap Ngang Kang Grau Hkra Shatsawm Sa Wa Ra Ai

Wa Sarabyin Francis a 2021 shaning na Lusha Gam Ladaw mungga hpe lai wa sai February 12, bat manga (5) ya shani, Vatican Shiga Dap kaw nna ndau da ma ai. Shi a mungga hta anhte a kamsham, myit mada, tsawra lam ni hpe bai gram shatsawm jahtap la lu hkra Karai Kasang a tsawra myit hpe hkam la na matu anhte a myit masin salum hpe hpaw da ra ga ai.

Ndai Lusha Gam Ladaw hkrun lam hta anhte sawn sumru nna myit dating let daw dan sa wa ai lam ni gaw Yesu Madu a hpang hkan ai a marang e lu la ai rai nga ai. Paska mungsung lam hpe myit aru yu yang nan chye na wa na re.

Wan gam akyu hpyi, alu jaw bang let anhte a myit malai hkrun lam hta hkawm sa ai gaw, ngang kang ai makam masha hpe lu la na, myit mada lam mung agrin nga na, tsawra daw jau lam mung akyu pyu ai lam hpe mung akyu kaba ai hte galu lu nna, anhte ni hkum nan dai akyu hpe hkam la lu na rai ga ai.

Teng man sakse hpe hkap la let dai teng man lam a matu sakse hkam sa wa ra ga ai. Karai Kasang a mungga hkam la lu na matu anhe a myit masin hpe hpaw da ra ai.

Wan gam ai ngu ai hta tinang hkum tinang nyet kau ai lam hpe tsun ai. Shaloi she Karai Kasang a chyeju kumhpa hpe hkam la lu na. Shi a hkrang sumla hte bung ai anhte hkum hpe anhte dan len ai hku bai mu lu na ga ai. Dai hkrang bung sumla gaw Karai Kasang hta hkum tsup nga ai. Wan gam gam ai a marang e, matsan jam jau yak hkak ai lam hpe grau dum grau chye na wa na ga ai. Karai Kasang hte htingbu ni hpe grau tsawra chye na matu mung garum ya ai.

Wan Gam Ladaw gaw kam sham ai ni a matu Karai Kasang hpe hkap la let anhte hta shanu nga shangun na aten nan rai nga ai.

Asak hka hpawk gaw anhte a hkrun lam hta garum ya nga ai. Yesu Madu Samaritan num sha hpe hka Yaku a hkahtung hta asak hka jaw na ngu tsun da ai gaw myit mada lam jaw ai rai nga ai. Dai hka gaw anhte a hkum hkrang a matu n re ai; Paska mung sung hta Chyoi Pra ai Wenyi a marang e jaw ya ai asak hka rai nga ai.

Anhte a myit mada lam gaw hten loi ai, mat wa chye ai, myit mada lam galoi she hpring tsup wa na ngu ai lam ni anhte hkrak n chye ga ai raitim, wan gam ladaw hta anhte ni Karai Kasang hpang de nhtang wa ai rai yang anhte a myit mada lam hpe kaja wa sha hkrang shapraw jaw ya na rai nga ai.

Simsa ai hte myit sumru akyu hpyi ai a marang e, anhte hpe n’htoi jaw ya ai, myit masin hpaw ya ai. Dai gaw anhte a myit mada lam rai nga ai. Ndai lusha gam ladaw hta wudang ntsa si hkam nna masum ya n’htoi hta bai hkrung rawt wa sai Madu Yesu jaw ya na myit mada lam hpe hkam la ra ga ai.

Tsawra lam gaw kamsham, myit mada lam yan hta tsaw grau ai rai nga ai. Tsawra ai lam gaw masin salum kaw na rai nga ai. Tsawra myit gaw anhte a kraw masin salum kaw nna pru wa ai rai nga ai. Dai tsawra myit hpe hpu nau ni hte shada tsawra hkat let arau ganawn mazum ai lam hpe gaw de la lu ai.

Shinggyim masha shada tsawra myit madun hkak ai lam ga mung shawa masha shada tsawra daw jau ai lam hpe gaw de hkrang shachyaw lu ai. Tsawra myit gaw anhte a prat hta lachyum nga lachyum pru shangun ai. Tsawra myit gaw shinggyim la sha, shinggyim num sha yawng hte hpe kahpu kanau, nau na majing hku mu chye na matu garum ya ai.

Tsawra myit hte garum jaw ai rai yang shawang tsawra myit hpe shalaw jahtam dat ai rai nga ai. Ndai hte seng nna chyum laika hta anhte mu lu ga ai. Anhte a prat hta alu jaw bang ai, bai, ra kadawn ai ni hpe garum ya ai mahkrum madup hku nna mung anhte ni chye na hkam sha ai rai ga ai. 

Ya daini chyam bra ana Covid -19 tsin-yam hkrum aten ni hta jam jau hkrum nga ai ni hte shingdu gayin da hkrum ai ni hpe tsawra myit kaba hte yu lakawn ya ai gaw Lusha Gam Ladaw a namchyim hpe hkam sha ai rai nga ai.

Myit malai hkrun lam

Aten shagu anhte a kamsham, myit mada, tsawra ai hta hkwm sa na ra ga ai. Dai lam ni hpe myit dum let ndai Wan Gam Ladaw hta lachyum nga lachyum pru ai hte Karai Kasang a chyeju kumhpa ni hpe hkap hkam la nga ga.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-02/renewing-faith-hope-and-love-pope-francis-lenten-message.html