Wa Sarabyin A 2021 Shaning Na Chyoi Pra Laban Bat Magam Nawku Dawjau Lamang

Sarabyin Rung laika dip shapraw dap kaw nna htuk shapraw ai ndau laika hta 2021 shaning na Wa Sarabyin a Chyoi Pra Laban Bat Magam nawku daw jau lamang hte seng nna mung ndau da ma ai.

Lusha gam ladaw htum wa magang sai hte maren, Chyoi Pra Laban Bat Magam a bat lahkawng ya shani hta Wa Sarabyin Francis kawn woi awn la na.

March 28, kungla shaman labat Misa Hkungga hpe jahpawt daw hkying 10:30 a.m., aten, San Peter a tingyang nga ai San Peter Nawku Htingnu kaba hta galaw hpang na.

Chyoi Pra Sau shaman ai Misa Hkungga hpe  April 1, bat mali ya shani, 10:00 a.m, aten, San Peter Nawku Htingnu hta sha Wa Sarabyin Francis hkum nan woi awn nawng jau na.

Dai shana daw maga hkying 6:00 p.m, aten hta Madu Yesu a hpang jahtum daw sha poi Misa Hkungga hpe Cardinal Giovanni Battista Re (Dean of the College of Cardinals) kawn nawng jau woi na.

Chyoi Pra manga ya shani, April 2 ya, shana maga 6:00 p.m, aten hta San Peter tingyang nga ai Misa tawn hta sha Madu Yesu a nni nkri hkam si hkam ai nawku daw jau lamang hpe galaw ngut ai hpang hkying 9:00 p.m, aten hta Wudang kawan nawku daw jau lamang hpe San Peter wang kaw galaw na rai nna Scouts masha ni hte Roma Jau Ginwang hpung masha ni, bai Ramma ni shang lawm na.

“Easter Vigil” Kru ya shana na Paska Misa Hkunggga hpe shana 7:30 p.m, aten, San Peter kaw sha matut galaw na. Laban shani na Paska Misa Hkungga hpe laban jahpawt 10:00 am, aten hta galaw na rai nna Nawku Hpung a htung lai rai nga ai “Urbi et Orbi” shaman ai lam hpe shani ka-ang aten galaw na. “Urbi et Orbi” ngu ai lachyum gaw “Mare kaba hte Mungkan” ngu ai lachyum rai nna Roma mare kaba hte Mungkan ting hpe shaman ai lam galaw na hpe tsun ai rai nga ai.

Ndai nawku daw jau lamang ni yawng hpe chyambra ana Covid-19 tsin-yam makawp matsun hte maren galaw sa wa na rai nna, nawku hpung masha ni yawng dai matsun hte maren hkan shatup let nawku daw jau lamang shang lawm ra na.

By Fr. Patrick Gawmaw Hkawng Yae

#vaticannews

#rvakachinservice

23 March 2021, 16:47

https://www.vaticannews.va/en/church/news/2021-03/pope-francis-holy-week-easter-2021.html