Wa Sarabyin: 2020 Shaning A Hkristmas gaw Aput Angun N Nga ai Sha Garum Shingtau Na Matu Rai U Ga

December 20, Du Sa Ladaw 3 laban shani na “Madu A Lamu Kasa Akyu Hpyi” ten, Wa Sarabyin Francis, San Peter Pa hta “Maria a ‘mai sa’ ngu Karai Kasang a shaga la ai lam hte lata la ai hta a sharawng a shara rai hkam la ai hpe sumru woi da let Hkristmas a teng man laklai salum hpe garan gachyan ga ngu n gun jaw da ai.

Chyum mungga daw hpe gaw Lk 1:26-38 hta na “Madu A Lamu Kasa Marai Hpe Ga Sa Shana Ai” lam hpe sumru woi da ai. Maria Na-Um Na-Sin wa na lam, dai gaw Wenyi a marang e re ai lam, dai ma gaw Messiah Hkyela Madu re ai lam, Shi a mying hpe Emanuel shamying na lam Madu a Lamu Kasa Gabriel ga sa shana ai chym daw rai nga ai.

Chyum laika hta, Maria gaw Yawsep ngu ai wa hte mahtan da ai wa rai nga ai. Kawa n paw/ n dan ai ma hkum rai yang Yuda htung hte maren si ari dam rai nga ai.

“Karai Kasang kaw na du wa ai dai mungga gaw Maria a masin salum hpe nhtoi jahtoi ya ai hte n gun atsam mung tai ya ai. Maria hta si hkrung si htan hkrum na daram yak hkak ai lam hte hkrum katut ai majaw daw dan yak ai lam nga ai rai tim, Karai Kasang shaga la ai hpe ‘mai sa,’ na a ga hte maren byin wa u ga, ngu hkap la lai wa sai re,” ngu Wa Sarabyin Maria kasi kamang hpe tsun da ai.

Maria htan ai Greek ga shi madung a lachyum hpe yu dat ai shaloi, Kaja wa sha sharawng awng ai myit hte myit um-ang lam n nga ai sha, hkrak tup nan hkap la ai lam hpe shadan shadawn ai laika si rai nga ai, nga nna mung Wa Sarabyin Francis matut madi madun da ai.

“Mai sa,” Na a ga hte maren byin wa u ga ngu ai gaw yu maya ga n re ai. Maria shi hkum hpe Karai Kasang kaw ap nawng da ai nan rai nga ai.

Shi gaw Karai Kasang hpe hpring tup ai tsawra myit kaba hte ya ju ya hkyen hkap la daw jau na matu jing jing rai nga ai num sha rai nga ai. Maria gaw Karai Kasang shatsam wa ai lam hpe ningdang ai ngu n nga ai; hting nut ai lam mung n galaw ai.

Manu shabrai hpe n yu, n myit ai sha Karai Kasang hpe hkap la ai.

Anhte a prat gaw wenyi lam hta pyi aten hpe sharen nna kaman nga shalai kau chye ga ai. Akyu hpyi ai gaw kaja ai lam re hpe chye ga tim, anhte ni aten n lu ai ngu tsun chye ga ai. Masha langai ngai hpe garum shingtau ya ai gaw ahkyak ai lam re ngu chye ga ai; raitim, dai ni, ya aten n lu shi ga ai, hpawt ni she garum na ngu tsun chye ga ai. Hkristmas du wa sai; manu shabrai hpe n yu, n myit ai sha “mai sa” na a ga hte maren byin wa u ga, ngu tsun na matu Maria anhte hpe saw shaga nga ai.

Yak hkak jam jau ai masa hta nga nga ga ai rai tim, Karai kasang anhte hpe shaga wa ai shaloi shagu ‘mai sa’ ngu bai htan ga. Grau nna 2020 shaning a Hkristmas gaw yak hkak jam jau lam law law hte ka-up taw nga ai.

“Ndai yak hkak jam jau ai Hkristmas aten hta, aput angun n tsun, n galaw ai sha, kaji kadun nga ai ni a matu lama ma sha gaw galaw ya lu hkra shakut ga. Anhte a manang ni hpe n re, kaja wa ra kadawn nga ai ni a matu madung myit ga,” ngu Wa Sarabyin n gun jaw da ai.

Holiday a matu kum hpaw kum hpa mari na hte hkawm sa hkawm wa lam a matu lajang shachyip ai lam ni hta sha myit ru myit tsang taw ai hku gaw n galaw ga. Yesu, Maria, Yawsep, Chyoi Pra kun dinghku matsan jam jau hkam let mungkan ting hpe tsawra myit jaw ya ai hpe myit dum let kasi la hkan sa ga.

Kanu Nu Maria zawn, mara hta na koi yan let Hkristmas akyu hpyi ga ni hte Karai Kasang hpe hkap tau la lu hkra anhte a myit masin salum ni hpe shajing shachyip da ga ngu n gun jaw let Wa Sarabyin Francis shi a mungga hpe ginchyum dat shangut da ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-francis-angelus-catechesis-mary-annunciation.html