Wa Sarabyin: “Tsawra” Hte Rau Rai Nga Yang, Anhte HKristan Ni Mungkan Hpe Shatsawm Lai Lu Na

Wa Sarabyin Francis “New York, Yonkers kaw na San Yawsep Jau Tai Dakkasu Jawng hte College hta lahkawng ya tup myit sumru akyu hpyi hpawng galaw ngut ai, bat masum ya shani, John 17 Movement malawm ni hpe Video message sa ya ai hta, “Nawku Hpung a magam bungli rai nga ai, shinggyim manaw manang shada galum kahkying gundin lam hte Hkristan Nawku Hpung ni lapran tsawra myit hpe gaw de sa wa ai gaw langai hta sha jawm pawng wa na lam de hkawm sa ai re,” ngu tsun da nga ai.

Yawng gaw sai rum nau na myit hte matut mahkai, hku nau tsun shaga, kanawn mazum ai a apu asi ni rai nga ai; “Tsawra” hte rai yang mungkan hpe galai shai lu ai; raitim dai tsawra hte anhte hkum hpe shawng galai shai hkam la ra ai ngu mung tsun da nga ai.

“The John 17 Movement” hpe 2013 shaning hta Pentecostal pastor Joe Tosini woi gaw de hpang ai rai nga ai. Shi gaw Kahtawlik n rai tim, Sarabyin n’nan lata la lu na matu akyu hpyi shakut mayu ai myit kaba rawng ai hte akyu hpyi lai wa ai wa rai nga ai. Sarabyin hte mung law law lang hkrum lai wa sai wa mung rai nga ai.

“The John 17 Movement” mying hpe Yawhan laika daw kaba 17 hta na Yesu Madu Shi a sape ni a matu akyu hpyi ya ai “shanhte gaw langai ya rai nga mu ga” ngu ai yaw shada ai lam hpe lakap nna shamying ai rai nga ai.

“Shada htingrai htingrat hkat ai Hkristan prinem lam n’nan hta” (Relational Reconciliation, a New Way to Christian Reconciliation) ngu ai ga baw ginlam hte myit sumru akyu hpyi hpawng hpe galaw la ma ai lam chye lu ai.

Kawa Langai a Kasha Ni

“The John 17 Movement” kaw lawm ai ni gaw sha ku hta rau dung rau sha let hku hkau wa ai hpu nau ni tai wa ma ai ni rai ma ai; Shanhte gaw lu su, matsan, shan hpraw, shan chyan, myu, hpung, mungdan n ginhka ai sha hpu nau myit majing hte rau magam gun ai ni rai ma ai. Shanhte gaw Kawa langai a kasha ni hkrai rai ma ai; majan a majaw matsan jam jau ai a majaw, sha ku n nga, lu sha n nga ai raitim, anhte yawng gaw hpu nau ni sha naw rai nga ga ai ngu shada da tsun hkat, n-gun jaw hkat nga na hpe galoi mung myit dum ra nga ai, ngu Wa Sarabyin Francis Video message hta matut tsun n-gun jaw da nga ai.

“Anhte a daidaw ginra, anhte a mungdan, anhte a madang, anhte a hpraw ai chyang ai, lam ni hpe madung da n myit ga; anhte gaw Kawa langai a kasha ni hkrai rai ga ai, ngu Wa Sarabyin tsun sadum da nga ai.

Hkristu hte matut mahkai hkrum shaga ra ai lam

“Tsawra myit” kaba hte tsaw ra na matu gaw sung ai Karai hpaji machye machyang n nga ra ai,” ngu mung madi madung da nga ai. “Tsawra” hpe prat hta hkrum katut na ga ai raitim, Yesu hte shawng hkrum katut ra ai; dai zawn rai tsawra hte hkum katut ai hta manau manang prat, nau na prat majing hpe lu la na rai nna, Kawa langai a kasha ni hkrat sha tai wa na rai nga ai. Sai rum nau na myit hte shada matut mahkai, hku hkau, hkrum shaga, kanawn mazum ai kaw nna hpa lam hpe mung hkam la lu mai ai.

“Tsawra gaw mungkan hpe galai shai lu ai; Raitim anhte hkum hpe shawng galai shai ra ga ai. Tsawra hte rau rai yang, anhte Hkristan ni mungkan hpe galai shai shangun lu ai, anhte hkum hpe anhte shawng galai shai ra ai; Karai Kasang gaw Tsawra rai nga ai,” ngu Wa Sarabyin tsun da ai.

Asak rawng nga ai Tsawra myit hpe hpaji sharin hkam la ai zawn sharin la n lu ai

“The John 17 Movement” hpung ni hte hkrum shaga ai hta shanhte a sakse hkam ai lam ni Wa Sarabyin hpe myit mada lam hte kabu pyaw lam jaw ya ai ngu shi hkum nan sakse hkam let shanhte a prat hta nau na myit hte prat hpe rau hkawm, rau garan gachyan sa wa na matu matut n-gun jaw da nga ai.

Tsawra myit gaw myit sawn hpaji ninghkring Palato a ningmu hte myit shingran ningmu masa hte jashuk kau chye nga ai; Tsawra myit gaw Yesu Madu zawn sha kaja wa ngang gring ai hku nga taw ai; Yesu Madu zawn sha hpu nau wa hpe myit ngwi myit pyaw lam jaw ai.

“Nang wa mi tsaw ra ai raitim, n tsaw ra ai raitim, dai ‘tsawra’ gaw sak hkrung nga ai; nga taw ai; dai tsawra gaw anhte hpe sak prat jaw ya ai lam rai nga ai” ngu hpang jahtum n-gun jaw tsun shadum da ya ai.

Vatican Shiga Dap kaw nna ndau da ma ai.

#vaticannews

#rvakachinservice

https://www.vaticannews.va/en/pope/news/2021-06/pope-francis-john17-movement-video-message.html