Wa Sarabyin: “Majan N Nga, N Byin Ai Mungkan” Shingran Hpe Galoi Mung Hkum Jahkring Kau Ga

Wa Sarabyin Francis, Itay ga hte ka hpang da ai “Peace on Earth, Fraternity is possible”, “Mungkan Simsa U Ga! Nau Na Myit Bang Da Lu Ai” ngu ai ga baw ginlam hte shi a laika buk ginchyum dat laika hpe ka ngu sai lam chye lu ai.

Dai laika buk hpe June 28 ya shani laibuk seng ni de du hpang sai lam mung chye lu ai.

“Peace on Earth, Fraternity is possible” laika buk gaw Wa Sarabyin a simsa lam hte nau na myit masa hte seng ai mungga ni hta na mahkawng da ai re lam chye lu ai.

Ndai laika buk gaw 1963 shaning hta San Pra ai (Sarabyin) Yawhan XXII a encyclical “pacem in Terris” ngu ai ga baw hte sharin shaga ai laika buk hpe bai myit dum shangun nga ai ngu Vatican Shiga Dap kaw nna ndau da ma ai.

Labau N Tsawm Ai Mabyin Masa Ni Hpe Malap Kau Ra Ai

Majan a majaw dum nta ni hpe kau da, hprawng yen hkawm nga ra ai hte dawsa ai, gumshen ai lam ni hkrum sha lai wa ai lam ni nga lai wa ai raitim, dai lam ni hpe malap kau ra ga ai.

Ndai myit mada shara gaw grai nan htuk manu ai tara masa rai nga ai rai nna, dai hpe shamat kau ra ga ai. Lahkawng lang ngu na mungkan majan (World War II) hpe a tsin-yam hta matut hkawm sa nga ga ai ni anhte gaw dai majan labau a n hpru n mai ai myit manoi lam ni hpe lawan dik malap kau rau ga ai, ngu Wa Sarabyin Francis shadum da nga ai.

Majan shabyin ai masa lam ni gaw anhte hpe dingbai dingna jaw nga ai; Shinggyim nau na shada matsan dum lama ai lam yawng gaw dai majan byin shangun ai masa lam ni yawng kaw nna makawp maga ya na re; Majan a majaw hkra machyi hkrum ai lam ni rai nga ai: shinggyim gawng machyi ai lam, matsan jam jau lam, garan ginhka lam, n ju n dawng ai lam, dawsa ai lam, gumshen ai lam ni yawng hpe myit dum nna myit n pyaw nga ga ai rai yang dai lam ni hpe koi yen kau let Karai kasang a man e, shinggyim masha shada a man e teng man tsawra myit hte simsa lam hpe gaw de sa wa lu na ga ai.

Tsin-yam hkrum htawt sit machyu nga hkawm ra ai ni hpe garum shingtau ya ai gaw simsa lam hpe gaw de nga ga ai tai nga ai.

Simsa lam hpe gaw de na myit n lawm ai, n mu jahpai hpai ai gaw majan shabyin na n-gun jaw ai wan n htaw tai nga ai. Kadai raitim, simsa lam a matu pu ba ai lam n nga ai sha shakut shaja ra ai; tinang nga pra ai makau grupyin, mare buga, mungdaw mungdan ni hta simsa lam a matu shang lawm shakut gaw de ra ai.

Hpang jahtum mungga hta Wa Sarabyin Yawhan Pawlu II, 1986 shaning, assisi hta tsun shadum da ai “htung hking shagu hte makam hpung shagu gaw simsa lam gaw de ai nli tum ni tai nga ra ai” ngu mungga hte shadum n-gun jaw da ai hpe Vatican Shiga Dap kaw nna ndau da ma ai.

Source : Vatican News