Wa Sarabyin: “Kabu Gara Shiga Hkaw Tsun Ai Magam Gaw Karai Kasang Ra Sharawng Ai Lam Hta Hkawm Sa Ai Re

Bat (3) Ya Shani, Shawa Masha Ni Hpe Sharin Shaga Ai Lamang, Kabu Gara Shiga hkaw tsun sakse hkam ai lam gaw, anhte n myit mada ai lam, Karai Kasang jaw da ai lam hta hkawm sa ai rai nga ai, ngu Wa Sarabyin Francis hkaw tsun da nga ai.

San Pawlu Galati hpung masha ni hpang de shagun dat ai laika hta na, Galiti na Hkristan Hpung masha ni mayak mahkak hkrum katut ai hpe madi madun sharin shaga ai lam hte Wa Sarabyin Francis ga hpaw sharin shaga hpang ai.

San Pawlu gaw shi hkrum katut lai wa ai mabyin masa ni hta shi gara hku galai shai wa ai lam, shi a prat hta gara hku myit daw dan lai wa ai lam, Hkristu Madu hta shi a prat hpe gara hku ap nawng da ai lam ni hte anhte hpe sharin shaga ai lam law law galaw da ai; dai San Pawlu sharin shaga ai ga baw ni gaw daini anhte a prat hta Nawku Hpung a myit hta jung hkra nga ai, ngu mung madi madun sang lang da ya ai.

San Pawlu a shagun laika ni gaw grai nan ahkyak la nga ai, myit daw dan chye ai lam jaw ya ai laika rai nga ai, hta sha n ga, Kabu Gara Shiga a tsawm htap ai lam hpe mung madun ya nga ai.

San Pawlu A Kabu Gara Shiga Sakse Hkam Magam Bungli

Galiti ni kaw San Pawlu shagun dat ai laika gaw, Kabu Gara Shiga sakses hkam magam kaba hte seng nga ai. Sagurem wa kasa Pawlu sasana majan je hpung kawan hkrum lam lahkawng lang tup hta Galiti hpung masha wuhpung ni gaw sa du kawan lai wa ai.

Galiti hpung masha ni gaw Celtic jiwoi jiwa masha ni rai ma ai; shanhte gaw Anatolia ginra buga (ya aten Turkey Mungdan Ankra ngu shamying ai) ni hta Ancyra ni hte rau nga ai ni rai ma ai.

Ndai ginra hta San Pawlu machyi makaw hkrum ai majaw hkring sa la ai aten mung ang ai. San Luka a Kasa laika gaw wenyi lam kunghpan lam hte seng ai hpe tsun da ai: shanhte gaw Asia kaw mungga htawn na hpe wenyi e ahkang n jaw ai majaw Hprugi (Phry’gia) hte Galati ginra ni de ga sa ma ai, ngu ka da nga ai (Kasa 16:6).

Ndai Chyum daw na mabyin masa lahkawng hpe maram yu yang, Kabu Gara Shiga sakse hkam hkawm sa lam gaw anhte myit ra ai mahkyen masin hku n re ai sha, Wenyi ra sharawng ai hta hkawm sa ra ai hpe madun dan nga ai; dai lam hta hkawm sa na matu anhte hkum hpe jin jin shachyip da let anhte n myit mada ai, n mu lu ai dai lam hta hkawm sa na ang wa ai shaloi hkawm sa lu ra ga ai.

San Pawlu gaw Galiti na hpung masha wuhpung kaji law law hpe mu hkrum lu ai gaw shi a Kabu Gara Shiga sakse hkam ai lam hta marai rawng ai hte pu ba lam n nga ai sha shakut shaja ai majaw rai nga ai hpe anhte mu lu na ga ai.

Yak hkak jam jau lam ni a lapran San Pawlu a Sagurem magam

San Pawlu a Sagurem magam hte seng nna yu dat ai shaloi mung, dai shi sasana galaw hpang da ai nawku hpung masha wuhpung ni hta shi a sharin shaga ai lam ni hte nhtan shai ai sharin shaga lam ni hpe Yuda makam kaw nna Hkristan tai wa ai masha ni e dawk bang/ hkai bang da ma ai hpe bai sawk sagawn sam maram lu nu ai.

Dai gaw Mashe tara hte maren, Yuda n re ai Gentiles masha ni mung Hkristan tai na rai yang gaw matu kadoi hkam ra ai, ngu ai sharin shaga ai lam rai nga ai. Grau nna, Pawlu gaw teng man ai kasa n re ai, shi hta Kabu Gara Shiga sakse hkam na ahkaw ahkang n nga ai, ngu sharin shaga ma ai gaw San Pawlu a matu myit ru hpa, myit n pyaw hpa kaba rai nga ai.

Galati hpung masha ni gaw dai Yuda htung hkan ra ai nga yang gaw makam hpe nyet kau na law malawng rai nga ai.

Ndai zawn rai nna Galiti hpung masha ni hpe hkindang ai manghkang ni a lapran Yesu Madu gaw hkye hkrang la lam hpe gun sa ya na re ngu ai hpe hkap la kam sham hkan nang na matu Galiti masha ni hta myit um ang shara kaba tai nga ai. Shanhte ni hta masa lam hku bai yu dat yang mung, Roma hkawhkam up hkang ai n pu e mayam prat madang hku nga ra ai majaw mung hkrit tsang shoi hpa lam ni hkrum sha nga ma ai.

Dai zawn re ai mayak mahkak manghkang ni a lapran San Pawlu Galiti hpung masha ni hpe shanhte a htung lailen hku Karai kasang hpe kam sham nawku daw jau lu ai lam de woi awn sa ya ai rai nga ai.

“Daini” hte n tsan ai

Mungga hkaw tsun ai ni gaw, daini na nhtoi masa hta hkan nna, Madu Yesu a Kabu Gara Shiga hkaw tsun ai ngu ai hta, matut mahkai lam n’nan ni hte rau, teng man lam hta sak hkrung hkawm sa, sakse hkam nga ma ai. Dai gaw Hkristan ni a matu, daini na masa lam hta hkan ai kaja dik ladat nan rai nga ai. Hkristan ni gaw daini na aten hta hkrum sha nga ai mayak mahkak manghkang lam ni hpe mahtai shapraw ai hta teng man jaw ang ai hku shapraw sa wa ra ai; teng man makam hpe mung n mai shamat kau ai. Dai gaw jat ai Hkristan masha ni a prat rai nga ai.

Galati ni kaw shagun dat ai laika hta San Pawlu a sharin shaga lam gaw anhte gara lam hpe lata hkawm sa ra ai hpe garum ya nga ai. Yesu Madu a wudang ntsa si hkam nna bai hkrungrawt ai lam hta hkawm sa ai ngu ai gaw prat hta hkan nna teng man jaw ang ai lam hpe shang lawt ai myit hte lata hkawm sa ai rai nga ai.

Dai gaw shagrit shanem ai hte nau na myit majing bang da let hkawm sa ai, si mani simsa ai hte teng man ai hta madat mara ai, Wenyi e anhte a prat hta nawku hpung kata bungli galaw nga ai hpe hkap la ai lam ni rai nga ai, ngu Wa Sarabyin Francis bat masum ya shani, hpung shawa masha ni hte hkrum shaga ai hta mungga hkaw tsun da nga ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-francis-paul-galatians-evangelization-general-audience.html

23 June 2021, 10:30