Wa Sarabyin: “Ginlum Kahkyin Gumdin Ai Hkristan Ni Gaw Shada Garan Ginhka Lam N Galaw Ai Ma Ai”

September 26, laban shani, San Peter Shawa Pa hta, “Madu A Lamu Kasa Akyu Hpyi Ga” tsun ten, Wa Sarabyin Francis, “Anhte n hkan shatup lu ai, n hkap la lu ai, anhte hte n htuk n manu ai ngu ai masa lam hte kaga masha ni hpe jeyang daw dan ai lam ni, tawn, ngam kau ai lam ni n mai galaw ai ngu Madu Yesu shadum jahprang da ai hpe sumru woi da nga ai.

Ndai lam hte seng ai hpe, dai shani hti ang ai Mk 9:38-41 hpe lakap nna hkaw tsun da ai.  Chyum laika hta Kasa ni shanhte a lapran hta kadai wa gaw kaba grau ai ngu ai hpe ga rawng rawng nga ma ai chye ai Madu Yesu sharin shaga ai lam rai nga ai. Kadai raitim Yesu Madu a mying ningsang hta mai kaja ai lam hpe pat shingdan ai lam n galaw na matu mung Yesu Madu kasa ni hpe sharin shaga da ai.

Kaja ai galaw ai ni hpe raitim, n kaja ai galaw ai ni hpe raitim, anhte mu hkrum ai shaloi, anhte a hkam la myit la ai lam hpe satan a gunglau ai hta n kadawng bang na gaw grai ahkyak ai lam Wa Sarabyin Francis anhte hpe shadum da ai.

Satan a agung alau gaw wuhpung wuhpawng kata rau hpawng de sumru bawngban ai hta mung ni ni htep htep du shang wa chye ai lam Wa Sarabyin shadum sadi jaw da nga ai.

Kasa ni gaw Yesu Madu hte seng nna shanhte ni, sumsing mungdan gaw gap ai hta shanhte galaw ai yawng jaw ai ngu myit la hkam la shut lai wa ma ai hpe Yesu Madu mu chye ya ai majaw kasa ni hpe shadum da ai mung rai nga ai.

Wuhpung wuhpawng hte re ai ni gaw kaga masha ni hpe shanhte a shinggan masha hku myit la chye ai ma mung shut kaba byin chye nga ai hpe dum ra ga ai.Anhte chye ai, ngai chye ai, ngu ai ga manoi gaw labau hta mung, daini na anhte lapran hta mung satan a sha rai nga ai, ngu mung shadum sadi jaw da ai.

Wuhpung wuhpawng hte re ai ni gaw kaga masha ni hpe shanhte a shinggan masha hku myit la chye ai ma mung shut kaba byin chye nga ai hpe dum ra ga ai.

Satan gaw garan ginhka lam hpe shabyin ai, kaga masha ni hpe wuhpung hta n shalawm shangun ai; Karai Kasang hte shi hpe kam sham ai Hkristan masha ni gaw ginlum kahkyin gumding lam hpe shabyin ai, yawng hpe shalawm la ai, ngu Wa Sarabyin tsun sakse hkam da ai.

Jeyang daw dan ai lam gaw garan ginhka ai lam hpe shabyin ai, ginlum kahkying gumding lam hpe n shabyin lu ai, ngu mung Wa Sarabyin kahtap kahtap nna tsun shadum da nga ai.

Jeyang daw dan hkat na malai masha hkum shagu hpe awn la ga, zinglum la ga, anhte ngu ai ga si gaw yawng hte seng ai rai nga ai lam Wa Sarabyin matut sang lang da nga ai.

Hpang jahtum ginchyum dat mungga hta gaw, anhte a prat hpe kaja grau ai prat hku sak hkrung nga na matu n-gun jaw let, Kabu Gara Shiga hte nhtan shai ai lam ni ngai hta hpa ni ni nga nga ai kun, tinang hkum tinang bai san sawn dik lik la ga; Yesu Madu ngai a prat hta kaning re ai n kaja ai lam ni hpe di kau shangun mayu ai kun, bai san dinglik la let sak hkrung nga ga, ngu n-gun jaw da nga ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News