Wa Sarabyin: “ Karai Kasang Gaw Shi Shangun Dat Ai Ni  Kaw Na Apu Asi Hpe Myit Mada Nga Ai” 

October 4, laban shani, San Peter pa hta “Madu Lamu Kasa Akyu Hpyi” ngut ai hpang, Wa Sarabyin Francis gaw dai shani a chyum mungga hta na Madu Yesu a “Sabyi Sun Shap Galaw Ai Ni” a ga shaadawn (Mt 21:33-43) hpe myit sumru woi ai.

Ga shadawn hta sabyi sun madu gaw sun shap ni hpe shi a sabyi sun sap da ya let hkrun lam hkawm mat ai. Shu la dan la ten gu jang apu asi ni hpe mahkawng la na matu shangun ma ni hpe shangun dat ai. Shangun ma ni yawng gaw sun sap ai ni a adup abyen, zingri sat ai hpe sha hkrum ra ma ai.

Hpang jahtum kasha hpe shangun dat ai rai tim, sun sap ai ni dai sabyi sun madu la mayu ai lawhpa myit a majaw dai kasha hpe mung sat kau ma ai.

Ga shadawn hta na, Sabyi tsun gaw Karai Kasang lata la ai shinggyim masha ni rai nga ai; shangun ma ni gaw Karai Kasang shangun dat ai myihtoi ni rai nga ai; kasha gaw Yesu Madu rai nga ai. Myihtoi ni zawn sha Madu Yesu mung sat hkrum ai rai nga ai, ngu Wa Sarabyin kadun ai hku sang lang da ai.

Ga shadawn hpe tsun hkai dan ngut jang Madu Yesu hpung woi ni hpe “sabyi sun madu du wa jang dai sabyi sap ai ni hpe kaning di na rai ta?, ngu san ai.

Sabyi sun madu gaw dai sabyi sun sap ni hpe tara jeyang nna, dai sabyi sun hpe atsawm sha gawn lajang ya ai, apu asi law law shapraw ya lu ai, masha ni kaw ap jaw da na rai nga ai, ngu bai htai ma ai.

Madu Yesu a sabyi sun sap ga shadawn gaw prat shagu na masha ni hte seng nga ai re. Daini anhte a prat hta mung Karai Kasang gaw shi shangun dat ai ni kaw na apu asi ni hpe myit mada nga ai re.

Prat shagu hta arawng power ana lu ai ni gaw Madu Yesu a sabyi sun ga shadawn na sabyi sun sap ai ni zawn galaw na matu gumlau ai hkrum chye nga ai. Anhte dum ra ai gaw, dai sabyi sun gaw anhte a n re ai; Karai Kasang a sabyi sun she rai nga ai.

Arawng power lu ai masha ni gaw Karai Kasang ra sharawng ai shinggyim masha ni a mai kaja lam hpe woi awn gun hpai na matu hte, Kabu Gara Shiga hpe garan kachyan na matu rai nga ai.

Translated by

Fr. Patrick Gawmaw Hkawng Yae

#vaticannews #rvakachinservice

Source : Vatican News