Tsi Mawan Hte Seng Ai Masat Shadang Garan Ginhka Ai Lam Ni A Majaw Machyi Masha Ni Grau Yak Hkak Hkrum Nga Ai Lam Wa Sarabyin Tsun

September 19, bat 6 ya shani, Wa Sarabyin Francis gaw, Tsi mawan hte seng nna masat da ma ai gaw matsan masha ni a hkam ja lam matu tsi gawn lajang ai hta yak hkak ai lam byin shangun ai ngu tsun hpaw dan wa ai.

Alu madu ni hte Company ni kaw nna garum ya ai tsi mawan ni hpe Italy Mungdan, Fondazione Banco Farmaceutico (Medicine Bank Foundation) kawn woi awn nga ai masha 300 shalai jaw dat ai lam chye lu ai. Dai gaw shanhte yu gawn taw nga ai machyi ai matsan masha marai 1,800 lahta de nga ai ni hpe tsi gawn lajang na matu yaw shada ai lam chye lu ai.

Daini na aten hta machyi ai masha ni kaw yak hkak ai lam ni grau grau law jat wa ai. Grau nna, matsan mayan re ai masha ni a matu tsi manu kaba ai majaw tsi tsi hkam la na matu nmai byin ai lam law law nga wa ai. Dai gaw tsi mawan hte seng ai masat shadang hpe wuhpung kata garan ginhka ai lam; Mungdan langai hte langai garan jahka ai lam; ja gumhpraw lu lawm ai ni hte n lu n lawm ai ni lapran garan jahka ai lam ni grai kaba wa ai majaw rai nga ai lam mung Wa Sarabyin sang lang tsun da ai.

Tsi mawan hte tsi hkam la ai hta masha shagu maren mara ahkaw ahkang lu ging ai ngu mung tsun da ai. Buga ginra nkau ni hta tsi mawan n lu mai ai majaw masha law law si mat nga ding yang rai ma ai, ngu myit yawn ai hte tsun shapraw da nga ai.

Dai majaw Wa Sarabyin Francis gaw, Mungkan ting hta ndai zawn yak hkak nga ai lam ni hpe Mungkan ting hte seng ai “globalization of treatment” kaw nna masan sa hkra yu hpareng ya matu hpyi shawn da nga ai.

Yawng pawng hpawm nna galaw shakut ai “common effort” jaw galaw ai hta marai hkum shagu shang lawm ai ladat hpe jai ra ga ai lam mung Wa Sarabyin kaw nna matsun da nga ai.

Hpung tang hpaji sawk sagawn ai ladat “Scientific research” hku nna, ya ten hkrum sha nga ai mayak mahkak ni hpe hparan ya la lu na ladat nnan hpe tam la lu na re. Tsi mawan Company ni gaw tara rapra ai hku tsi mawan ni hpe garan shabra lu wa na re; Ra gadawn ai ni a akyu ara matu grau hparan ya lu wa na re, ngu n gun jaw da ai.

Ya na chyambra ana a majaw, masha wan mi daram hkrat sum taw sai rai nna, sut masa lam hta grai nan yak hkak jam jau ai de gale mat sai. Ndai gaw n lu n su ai matsan masha  law jat lam de yawng nga shangun ai rai nga ai.

Matsan masha ni a matu tsi mawan garum ya ai rai yang, matsan jam jau ai de gale wa ai Mungkan hpe tsi tsi nna makawp maga ai hte bung ai re. Ana zingli makawp tsi gaw lu su ai ni a matu madung da nna, matsan masha ni a matu n myit ai rai yang gaw anhte Mungkan a matu myit yawn hpa rai nga ai, ngu Wa Sarabyin shadum da ai hpe Vatican kaw nna ndau da ma ai.

Source : Vatican News