Tsawra Myit Nga Ai Sak Prat Gaw Hpang Jahtum Nhtoi Hta Karai Kasang Hte Matut Mahkai Lu Na Matu Hkyen Lajang Ya Ai

“Hkristan Hpung masha ni shani shagu na mai kaja ai magam bungli galaw ai hta Madu Yesu a tsaw ra myit hte shadum jahprang ya ai a marang e galaw lu na matu anhte hpe shadum ya nga ai. Dai rai jang she, hpang jahtum si mat mat na aten hpe simsa ai hku la dingda nga lu na rai ga ai, nga nna, November 8, Laban shani, San Peter Pa hta “Madu A Lamu Kasa” akyu hpyi ngut ten na mungga hta Wa Sarabyin Francis tsun da ai.

Dai shani na mungga hpe Mahte 25:1-13 hta na, “num ningnan marai 10, la ningnan kaw wan kawk hte shana tup la ai ga shadawn hpe lakap nna tsun da ai. Madu Yesu a prat hta, hkungran poi gaw shana aten kaw galaw ai lam; dai poi gaw wan ni hte htoi kabrim tsawm nga ai lam tsun hkai dan ai.

Ga shadawn hta, num nawn manang nkau ni gaw wan sau shajan gun na malap ma ai gaw angawk ai ni rai nna, wan sau shajan gun ai ni gaw hpaji byennya rawng ai ni rai ma ai. Angawk ai num nawn manang ni dum hprang wa ai shaloi shanhte hta wan sau n law ai hpe dum chye wa ma ai majaw shajan mari na matu pru mat ai. Tim, bai n-htang wa ai shaloi gaw grai nan hpang hkrat mat sai majaw hkungran poi hte tsan ai de wa ra ma ai.

Ndai ga shadawn hta Yesu Madu gaw shi bai du sa na aten hpe jing jing rai nga hkra tau nau shajing da na matu anhte hpe sharin ya nga ai. Hpang jahtum shani du sa na aten a matu sha n re; shani shagu shi du sa na aten hpe, mai kaja magam bungli ni hte matsan dum garum shingtau lam ni galaw let ala nga na ra ga ai.

Makam gaw anhte hpe Yesu Madu hta teng sha nan kahkyin gumding shangun ai. Dai makam hpe tsawra myit a marang e hkrang shapraw ga ai. Ndai gaw hpaji byennya rawng ai num nawn manang ni galaw ai ladat rai nga ai. Wan kawk hte rau wan sau shajan gun sa ai ngu ai gaw chyeju hpring ai mai kaja lam law law hpe gun sa ai ngu ai rai nga ai.

Hpang jahtum shani Madu hte rau hkrum shaga mayu yang gaw, ya ndai shara hta nan shi hte rau nga ra ai; mai kaja ai magam ni hpe shi a tsaw ra myit hte shadum sharin ya ai hta mai kaja ai lam ni hpe galaw ra ai.

Gam maka n tsawm ai gaw, anhte prat a yaw shada ai lam hpe malap mali ai a majaw rai nga ai. Prat a yaw shada ai lam gaw Karai Kasang hte hkrum na matu ndat nhtoi/aten masat galaw ai lam rai nga ai. Ndai myit mada lam hpe anhte ni malap mali di kau chye ga ai.

Shinggyim masha ni gaw tinang madu lu na matu chyu sha matut hkawm sa ma ai; shanhte hkum shanhte hpe gaw de la ma ai. Anhte myit lawm ai hta, anhte hpe mawng la ai hta sha anhte a hkum hpe ahkang jaw ai rai yang anhte a prat gaw akyu n rawng ai mau dung dung ai tai mat na re. Anhte a nhtoi a matu wan kawk hte wan sau hpe tam mahkawng makawp maga da ai lam nnga ai rai yang Karai Kasang bai n du sa shi ai aten kaw nan mat mat na rai ga ai.

Wa Sarabyin a hpang jahtum mungga hta, anhte ni Karai Kasang a chyeju hte mai kaja ai lam ni hpe galaw ai rai yang, anhte ni yup pyaw taw ai aten rai tim Karai Kasang anhte kaw du sa na rai nga ai; shi hpe hkap tau la lu na rai nga ai ngu n gun jaw da ai.

Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-francis-sunday-angelus-all-saints-faithful-departed-eternal.html