Thai Hte Japan Mungdan Hkrun Lam Mahkrum Madup Ni Hpe Wa Sarabyin Tsun Dan

Lai wa sai bat masum ya, November 27 ya shani San Peter pa kaba hta du hpawng nga ai shawa hpawng kaba hpe sharin shaga mungga shaga lam galaw ai aten shi sa du gawan lai wa ai Thailand hte Japan Mungdan hkrun lam mahkrum madup ni hpe tsun hti dan ai lam Wa Sarabyin Francis galaw lai wa ai.

Thailand Mungdan mahkrum madup ni hte seng nna Wa Sarabyin tsun ai hta, “Thailand Mungdan masha ni gaw mani sum sai tsawm htap ai, makam masham ngang kang ai, tsawm htap ai htung hkying lai len ni lu ai masha ni rai ma ai. Nbung n pre ai hpan langai hte langai lapran myit hkrum gahkyin gum din let simsa ai masa rau nga pra lu ai masa byin tai hkra shanhte hpe matut n gun dat shakut nga na matu n-gun jaw da lai wa ai”

nga nna Wa Sarabyin tsun hti dan lam galaw ai.

Thailand Mungdan hkrun lam laman Thai hkaw Hkam hte hkrum shaga ai lam, Mung up du asuya ning baw ni, Saradaw ni, Buddha hpung gyi kaba ni hte hkrum shaga lai wa ai lam ni hpe mung Wa Sarabyin tsun hti dan lam galaw ai. Grau nna St Louis tsi rung kaba de sa du gawan ai aten machyi makaw hkrum ai masha ni, matsan mayan masha ni hpe yu lakawn garum la lam galaw nga ai Thai Mungdan Nawku Hpung a magam bungli ni hpe n-gun jaw shakawn shagrau lam galaw da lai wa ai zawn, Thai Mungdan hta Thai myu sha ni a htunghkying maka kumla ni hte Kabu gara shiga shachyam shabram lu hkra galaw na matu mung n-gun jaw da lai wa ai, nga nna shi a mahkrum madup hpe Wa Sarabyin tsun hti dan ai.

Japan Mungdan hkrun lam mahkrum madup hte seng nna Wa Sarabyin tsun ai hta gaw,

“shing gyim asak hpe makawp maga ga, ngu ai ga manoi hpe madung da nna Japan Mungdan de sa du gawan ai lam re, Japan Mungdan gaw Nuclear mang hkang hte seng nna tsin yam law law lang hkrum nga ai Mungdan rai nga ai majaw  ‘shing gyim asak hpe makawp maga lam’ ngu ai ga baw gaw Japan Mungdan a matu grai ahkyak ai ga baw rai nga ai, shing gyim asak hpe makawp maga lam galaw lu na matu gaw shing gyim asak hpe tsawra chye na ra ga ai.

Dai ni na prat hta, grau nna, rawt jat bawng ring nga sai Mungdan ni hta, atsawm sha asak hkrung ai ngu ai myit masa ni mat hkoi nga ai, shing gyim asak hpe manu n shadan ai lam ni a majaw nam bat langai ngu na tsin yam hkrum sha ra ai ni gaw asak naw ram ai ramma ni rai ma ai. Dai re majaw Karai Kasang hpe kam hpa ai myit hte akyu hpyi na matu, shada da tsawra ai hte daw jau hkat nga na matu ramma ni hpe lak san n-gun jaw da lam galaw lai wa ai. Bai Nuclear wan bawm jahkrat hkrum lai wa ai  Nagasaki hte Hiroshima Mare kaba ni de mung sa du gawan nna Nuclear bawm jahkrat hkrum ai aten asak nsi nna ya du hkra naw hkrung nga ai masha ni hte hkrum shaga n-gun jaw da let, Nuclear lak nak tsep kawp n nga ai Mungkan byin tai hkra n-gun dat shakut lam galaw na matu Mungkan Mungdan ning baw ni yawng hpe tsun lajin lam mung galaw lai wa ai lam, San Peter pa kaba hta hpawng nga ai shawa hpawng kaba hpe Wa Sarabyin shi a mahkrum madup hpe tsun lai wa ai lam Vatican shiga dap kaw nna shana dat nga ai.       

Source:Vatican News