Sut Gan Arung Arai Hta Masha Madaw Grau Ahkyak Ai Nga Nna Wa Sarabyin Tsun

“Sut gan arung arai hta masha madaw grau ahkyak ai” nga nna lai wa sai laban shani San Peter pa kaba hta hpawng nga ai shawa hpawng hpe Wa Sarabyin Francis tsun dat nga ai.

Shani ka-ang Angelus akyu hpyi woi ngut ai hpang dai shani na Kabu gara ai shiga hta na Madu a arai jai shamat kau nna, Madu a man e mara sa shagun hkrum nga ai kunhting wa, kunhting aya kaw na jahkrat kau hkrum ai hpang, masha ni shi hpe hkap la hkra, shi a madu a hka kap ai ni langai hte langai hpe shaga la nna, hka jahpan byeng kau ya ai mabyin ga shadawn hte la kap nna lahta na zawn Wa Sarabyin tsun dat ai lam rai nga ai.

Wa Sarabyin tsun ai hta,

“Kumhting wa a myit nding nan ai lam hpe Madu tsun shakawn lam galaw nga ai nrai, kunhting wa a myit sam ai lam hpe tsun shakawn ai lam she rai nga ai, ‘n tara ai sut gan hte tinang a matu jinghku hku mu: shaloi she dai htum mat jang, shanhte gaw dinggrin a nga nga ai nta hta, nanhte hpe hkap la na marin dai’ ngu ai lam gaw Madu Yesu saw shaga nga ai mungga madung rai nga ai, n tara ai sut gan ngu ai gaw ja gumhpraw arung arai ni hpe ngu ai rai nga ai. Ndai sutgan ja gumhpraw arung arai ni gaw myit ga garan lam, lachyen ginghka lam ngu ai madin shakum ni hpe byin pru shangun lu ai, Madu Yesu tsun shadum nga ai lam gaw ndai sutgan ja gumhpraw arung arai ni hpe shada da mai kaja ai masa ganawn mazum lam byin tai hkra shabyin shatai la na matu saw shaga ai lam rai nga ai, hpa majaw nga yang sut gan arung arai ni ngu ai hta masha madaw she grau ahkyak nga ai. Madu Yesu tsun ai ga shadawn mabyin hta kunhting aya kaw na jahkrat kau hkrum maw nga ai nhkru ai kunhting wa hku nna, “ya ngai kaning di na rai ta?” nga nna shi a hkum hpe shi san ai, anhte mung tinang a hkrat sum ai, shut kataw ai lam hpe ni yin la chye ra ga ai, mai kaja ai magam lam ni galaw nna tinang a shut ai lam ni hpe sharai la lu na aten the atsam Madu anhte hpe jaw ya nga ai. Masha langai ngai hpe myi prwi hkrat lam shabyin kau ai wa hku nna masha langai ngai hpe kabu pyaw shangun lam bai galaw shabyin u ga, n tara ai lam ni galaw kau hkrup ai wa hku nna, ra kadawn nga ai ni hpe garum shingtau gam garan jaw ai lam bai galaw u ga, dai zawn galaw ga ai rai yang Karai kasang a shakawn shagrau ai hpe anhte hkrum lu na ga ai”

nga nna Wa sarabyin hkaw tsun lai wa ai.

Source : Vatican News