Simsa Lam Ngu Ai Gaw Mungdan A Awng Padang Re, Nga Nna Wa Sarabyin Tsun

“Simsa lam ngu ai gaw Mungdan a awng padang re, ndai lam hpe anhte chye ra ga ai” nga nna Africa dan Mungdan ni de du gawn nna Roma de bai gin htang wa nga yang nbungli ntsa hta Wa Sarabyin Francis tsun dat nga ai. Wa Sarabyin a nbungli ntsa hta jawn lawm nang wa ai shiga dap na shiga la ai masha ni hte nbungli ntsa hkrum shaga nna san ai ga san ni hpe htai ya ai aten lahta na zawn Wa Sarabyin tsun dat ai lam rai nga ai.

Vatican shiga dap kaw nna shana dat ai shiga ni hta, nbungli rawt lung mat wa ai ahkying hkum lahkawng chyen daram na ai hpang nbungli ntsa hta shiga dap na shiga la ai masha ni hte hkrum shaga lam galaw nna san ai ga san ni hpe htai ya ai lam Wa Sarabyin galaw lai wa ai.

Ga san langai mi gaw, Mozambique Mungdan hta du nga ai aten Mungdan gum san magam hte mung, bai Parliament rap daw kaw na mung masa party lahkawng maga na party ning baw ni hte mung Wa Sarabyin hkrum shaga lam galaw lai wa ai, dai rai yang simsa lam hte seng nna Mozambique Mungdan a matu Wa Sarabyin lak san tsun shaga mayu ai lam hpa ni nga ai kun, nga ai ga san rai nga ai.

Ndai ga san hte seng nna Wa Sarabyin htai ya ai hta, “Simsa lam gaw gap ai magam bungli hkrun lam ngu ai hta tsaw ai aten ni nga mai ai zawn grai nem mat wa ai masa aten ni mung hkrum kadup mai ai, raitim mung dai hkrun lam a jahtum hta e simsa lam ngu ai lu la mai ai ngu ai lam hpe dai ni  Mozambique Mungdan sakse rai nga ai.

Mozambique Mungdan hkawm sa nga ai simsa lam gaw gap ai magam bungli hkrun lam shawng de matut sit nawt nga na myit mada ai. Simsa lam gaw mungdan a awng padang lam re, ndai lam hpe anhte chye na ra ga ai, grau nna kasat gala majan ni a majaw hten run nga ai mungdan ni hku nna ndai lam hpe chye na ra ga ai. Majan gaw jahten sharun lam hpe chyu shabyin ai, anhte hta nga ai lam ni yawng hpe jasum kau shangun ai, lai wa sai shata 3 daram hta, nam bat lahkawng mungkan majan byin hpang wa ai Normandy ngu ai panglai gingau shara hta Mungkan mungdan ning baw ni law law du zup nna mungkan majan byin hpang wa ai ladu hkru masat nhtoi galaw lai wa ma ai, raitim mung dai majan a majaw dai Normandy panglai gingau hta hpyen la marai 46,000 tup si hkrum lai wa masai re, majan gaw hpa mang hkang hpe mung mahtai n shapraw ya lu ai, raitim mung, shinggyim masha ni grau nga mu nga mai wa na hpe nra sharawng ai masha ni hku nna dai majan hpe shabyin nga ma ai,” nga nna Wa sarabyin tsun dat nga ai lam Vatican shiga dap kaw nna shana dat nga ma ai.

Africa dan Mungdan 3 de sa du gawan lai wa ai Wa Sarabyin lai wa sai bat lahkawng ya shana maga daw hta Vatican de bai du wa sai rai nga ai.

Source: Vatican News