Simsa Lam A Matu Garum Hpyi Lajin Dat Ai ( Pope Message ) 28 September 2023

24-9-2023

Wa Sarabyin kawn Marseille shara hta sa du kawan ngut ai hpang simsa lam a matu garum hpyi lajin dat ai shiga.

Wa sarabyin Francis kawn Marseille kaw Missa hkung ga nawng jaung ngut ai hpang mung masa a majaw tsin –yam hkrum sha nga ai ni hpe bai shaga la let Ukraine hte Mungkan ting hta majan a majaw jam jau nga ai ni yawng simsa wa na matu kyu hpyi garum ya nga ai lam hpe tsun let shangut lai wa ai.

Wa sarabyin Francis gaw France mungdan a dingda maga na Marseille myu mare kaba de lahkawng ya tup sa du kawan lai wa ai, dai ten hta “Mediterranean Meeting” hkarang panglai grupyin ginra the seng ai zup hpawng ni  hta hpang jahtum shang lawm let Ukraine hte Mungkan ting hta majan ni simsa wa na matu yawng shang lawm na hpe hpyi shawn tsun lai wa ai.

Wa sarabyin Francis kawn Marseille’s kaw nga ai Velodrome Stadium ngu na ginsup pa hta galaw ai Chyoi pra ai Missa hkung ga na jahtum hta yawng hpe chyeju dum ai lam tsun lai wa ai, bai nna French Church ni hpe mung shanhte ni a kabu gara hkalum la ai hte gawn lajang ya ai a majaw chyeju dum ai lam hpe tsun lai wa ai, ndai zawn galaw ai lam ni gaw Karai Kasang a tsawra matsan dum ai lam hpe sak se hkam ai lam rai nga ai hpe mung tsun lai wa ai.

Wa sarabyin kawn Missa hta Nice kaw na Saradaw hte up hkang salang ni, kam sham ai hpung masha ni sa du shang lawm ai hpe myit dum matsing da nga ai lam hpe chye lu ai.

Wa sarabyin kawn lai sai 2016 july 14 hta majan tsim yam byin mat ai shaloi lawt lu ai ni hpe bai myit dum let France mungdan ting hte Mungkan ting hta majan a majaw asak si hkrum nna jam jau hkrum nga ai ni yawng a matu kyu aja wa hpyi ya let myit dum na lam hte “terrorism ngu ai dawsa masa ngu na gaw (Cowardice) ngu na jahkrit maidum kyan lailen rai nga ai lam hpe” tsun lai wa ai.

Wa sarabyin Francis kawn mungdan kata nga ai Ma ni, machyi ai masha ni hte asak kabai sai ni hpe shi galoi mung rau rai nga ai lam hpe n tsun shi yang grau nna Ukraine hta byin nga ai majan tsin yam a matu hte Mungkan ting majan a majaw jam jau kaba hkrum nga ai ni hpe myit dum let simsa wa na matu ahkyu hpyi ya na hpe hpyi shawn tsun lai wa ai...

Wa sarabyin kawn bungli galaw ai masha ni hpe lak san shagrau nna shakram lai wa ai. Bai nna Marseille na shanghpaw hka daru hta bungli galaw lai wa ai France mungdan a shawng nnan na bungli galaw Jau Jacques Loew hpe myit dum let bungli galaw  masha  ni a sari sadang hpe hkungga na, sharawt la na hte makawp maga ya na lam ni hpe mung tsun lai wa ai.

Hpang jahtum hku nna Wa sarabyin kawn ya na zawn hkrum zup ai hpe shi galoi mung myit hta dum nga na the France ga hku “Notre Dame de la Garde” anhte hpe garum ya nga ai Nu Maria gaw Marseille hta nga ai masha ni yawng, bai kun dinghku ni hte marai hkum shagu a ntsa e makawp maga ya u ga ngu kyu shaman ya lai wa ai hpe chye lu ai.

Add new comment

12 + 8 =