Shani Shagu Na Makau Hta Ni Htep Ai Hku Nga Ai Ni Kaw Yesu Hpe Tam La Ga"Nga Wa Sarabyin Tsun

Pope Francis Angelus akyu hpyi nga

Wa Sarabyin: Shani Shagu Na Makau Hta Ni Htep Ai Hku Nga Ai Ni Kaw Yesu Hpe Tam La Ga

  January 30, laban shani, “Madu A Lamu Kasa Akyu Hpyi Ga” tsun ten, dai shani hti ang ai Kabu Gara Shiga Chyum Mungga hpe sumru woi let, Karai Kasng ra sharawng ai lam hpe shagrit shanem myit hte a sharawng a shara rai tam la ga; hkum ning dang kau ga, ngu Wa Sarabyin Francis kam sham ai hpung masha ni hpe sharin shaga saw shaga da nga ai.

  Yesu Madu gaw shi a buga rai nga ai Nazareth mare kaw shawng ningnan mungga hkaw tsun ai lam rai nga ai (Lk 4:21-30). Shi a buga masha ni gaw shi hte ni htep ai hku nga lai wa ma ai. Raitim, shanhte gaw shi hpe n hkap la ma ai, ningdang kau ma ai, shinggan kau ma ai, hpyen tai ma ai. Teng man lam hpe hkap la na malai, manu mana mau hpa kaba re ai lamyik kumla hpe sha myit mada ra sharawng nga ma ai. Hkristan masha ni gaw dai zawn n mai rai ai; mai kaja ai lam hpe hkap la ra ai; mai kaja ai lam galaw ai ni hpe kam myit tawn da ra ai, ngu Wa Sarabyin Francis shadum jahprang saw shaga da nga ai.

 Yesu hpe shanhte ni n hkap la ma ai majaw, “Kadai Myihtoi mung tinang mare buga hta hkap hkalum hkrum ga ai n rai,” ngu Yesu hkum nan tsun shadum da ai (Lk 4:24).Ndai ga si Yesu tsun ai hpe lachyum hta ga nga yang, shi hpe n hkap la ma ai gaw shanhte a yaw shada myit hte nan ninghkap ai dan dawng nga ai.

“Shi hpe nyet kau na ma ai hpe chye ninglen hpa rai shi a buga de bai sa nna ndai zawn mai kaja lam hpe galaw ai rai, chyeju galaw ai rai,” ngu anhte ni ga san san yang san na ga ai.

 Anhte hpe n hkap la ai ni, nyet kau ai ni hpe anhte ni hpa rai mai kaja ai chyeju galaw ga ai rai? Kanu Kawa ni gaw, chyeju n dum, n mu ai kashu kasha ni hpe jarit masat n nga ai tsaw ra myit hte tsaw ra ma ai, galoi mung tsaw ra ma ai, shanhte a matu galoi mung kaja dik galaw ya ma ai. Karai Kasang gaw dai kanu kawa ni hta grau ai rai nga ai. Dai majaw mai kaja ai masha ni hpe galoi mung hkum ninghkap ga, ngu Wa Sarabyin Francis shadum sharin shaga da ai.

 Yesu du sa wa ai shaloi, Nazareth mare hta byin lai wa ai lam gaw anhte a n hkap la chye ai, nyet kau chye ai lailen ni hpe shading sharai la na matu shadum ya ai.

 Yesu Madu tsun dan ai maigan myu sha lahkawng rai nga ai gaida num hte Naaman yan a lam gaw anhte ni hkap la ra ai mabyin rai nga ai, kasi la hpaji la ra ai mabyin ni rai nga ai. Shan lahkawng yan gaw Myihtoi ni hpe hkap la ma ai. Myihtoi Elijah hte Myihtoi Elisha yan rai ma ai. Dai mabyin lahkawng yan gaw jam jau ai ten ang katut byin ai mabyin n rai nga ai.

 Gaida num wa hte Naaman gaw myit kraw kata kaw nna nan a sharawng a shara rai shagrit shanem ai hte Myihtoi ni hpe hkap la ma ai; makam gaw shagrit shanem ai myit hte jing jing chyip chyip rai nga ai kaw nna lu la ai. Gaida num hte Naaman yan gaw Karai kasang hte shi a Myihtoi ni a lam hpe n nyet kau ai; Shan gaw sumnung shingdi ai hte madat mara ma ai; shan gaw myit kayin kaye n re ai, myit n ja ma ai, salum chyinghka hpe n pat da ma ai.

 Yesu Madu gaw, anhte a shani shagu na sak hkrung lam hta shi hpe hkap la na matu saw shaga nga ai. Shinggyim ra marit ai myit hte lamyik kumla tam ai ni gaw Yesu hpe tam mu lu na n rai; ntsa lam kumla ni hte arawng mala ai hpung dagu ni hta makam hpe tam mu la na n rai.

 Anhte kaja wa sak hkrung ai shani shagu na prat hta aput angun n nga ai sha, myit um-ang ai lam n nga ai sha, mara tam dinglun ai lam n nga ai sha, Yesu a lam hpe tam la chye ra ai.

 Daini na Nawku Hpung hta Yesu hpe tam la chye ra ai; shani shagu anhte hte ni htep ai hku nga ai ni kaw Yesu hpe tam la chye ra ai; ra kadawn ai ni kaw Yesu hpe tam la chye ra ai. Hkrum mai ai masa lam ni yawng hta shagrit shanem myit kaba hte anhte hkum hpe anhte jasan jaseng la na matu Yesu Madu anhte hpe saw shaga nga ai.

 Kanu Nu Maria gaw Yesu hpe hkap hkalum la ai kasi kamang madun dan nga ai. “Shagrit shanem ai hte sharawng awng ai kasi kamang rai nga ai anhte a Kanu Nu Maria gaw Yesu Madu hpe hkalum la ai lam anhte hta madun dan ya u ga, ngu akyu hpyi let Wa Sarabyin Francis, shi a mungga ginchyum dat da ai hpe Vatican Shiga Dap kaw nna ndau da ma ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice

Add new comment

3 + 1 =