Shanhte hta nhkum zup gawngkya ai lam ni nga tim Kanu Kawa ni hpe hkungga la ra di ra ai, nga nna Wa Sarabyin tsun

Bat masum ya shani shagu makam masham sharin shaga ya ai lam ni galaw nga ai Wa Sarabyin Francis gaw, lai wa sai bat masum ya, September 19 ya shani  San Peter pa kaba hta du hpawng nga ai shawa hpawng hpe, ‘Kanu Kawa ni hpe hkungga la ra di u’ nga ai Tara Kanu lam shi kaw na lam bat mali ngu na tara lam hte seng nna sharin shaga ya ai lam Wa Sarabyin Francis galaw lai wa ai.

Wa Sarabyin tsun ai hta, “Kanu Kawa ni hpe hkungga la ra di ai lam gaw tinang a asak prat hpe galu shangun ai, ngwi pyaw shangun nga ai, tara kanu lam shi hta ndai Kanu Kawa ni hpe hkungga la ra di ai ngu ai tara lam tha sha, ngwi pyaw asak galu ai ngu ai lam mu mada lu nga ai. ‘Kanu kawa ni hpe hkungga la ra di u’ ngu ai ndai tara hta, Kanu Kawa ni hkum zup chyoi pra yang sha shanhte hpe hkungga la ra lam galaw ra ai, ngu ai masa nlawm nga ai. Ndai tara shadum ai lam gaw, Kanu Kawa ni hkum zup chyoi pra ai mi rai rai, shanhte hta nhkum zup gawng kya ai lam ni nga ai mi rai rai, kashu kasha ni hku nna Kanu Kawa ni hpe hkungga lara di ra ai ngu ai, kashu kasha ni hkan sa ra ai lit hpe hkang da ai lam she rai nga ai. Kanu Kawa ni yawng gaw kaja ai ni hkrai gaw nrai na ma ai, dai zawn sha kashu kasha ni mung shanhte a kaji daw ma prat hta kabu gara pyaw lu lai wa ai ni hkrai mung nrai na ma ai, raitim mung, Kanu Kawa ni hpe hkungga lara di ai a marang e, kabu gara ai lam lu la mai ai, asak kalu ngwi pyaw ai lam ni lu la mai nga ai, tinang a prat hta asak galu kabu ngwi pyaw lam lu la na, nlu la na, ngu ai lam gaw tinang hpe shangai shaprat ai Kanu Kawa ni hpe gara hku kaning rai hkungga lara chyeju dum ai lam galaw nga ai, ngu ai hta sha la kap nga ai,” nga nna Wa Sarabyin Francis sharin shaga lai wa ai.

Ma prat kaji daw ten hta yak hkak lam ni law law hkrum nna, nji nmu re ai masa hte nga kaba wa ra ma ai raitim, Kanu Kawa ngu ai hpe ning dang kau ai lam galoi n galaw ai sha tsawra hkungga ai lam ni galaw lai wa ma ai majaw awng dang lai wa ai hkristian masha ni, san pra ai masha dang da na lajang nga sai ni mung nga nga ai lam, mying hte hkrak rai nna ga shadawn tsun madi madun ai lam mung, Wa Sarabyin galaw lai wa ai, nga nna Vatican Radio kaw nna shana dat nga ai.     

Source : Vatican News

Translated : Fr.Bernard Dashi Tang Ji