Sarabyin A Mungga Jan 18, 2024

Nhtoi: 14-1-2024

Madu Yesu A Kasa Ni Zawn Kabu Gara Ai Hpe Bai Tam Na

          Wa Sarabyin Francis kawn Madu Yesu a Kasa ni zawn anhte a kabu gara ai myit hpe nnan bai gram nna tam na hte Kasa ni Madu Yesu hpe shawng nnan hkan tam na mu ai shaloi kabu myit pyaw simsa ai chyeju Hkam la lu ai hpe masha ni hpe garan gachyan ai lam tsun let n gun jaw lai wa ai.

Wa Sarabyin Francis kawn laban Missa garai n hpang shi yang Yawhan a kabu gara shiga kaw na shawng nnan Kasa ni Madu Yesu hpe mu hkrum nna Kabu gara ai lam hpe tsun lai wa ai hpe chye lu ai. Madu Yesu a hpang na masha langai ngu ai gaw moi shawng de na shi a hpang hkan ai masha ni Messiah hpe tam ai zawn anhte mung shi hpe tam ra ai, shi hte rau rai ra ai hte shi a kabu gara shiga hpe garan gachyan ra ai lam hpe tsun lai wa ai.

 Lai wa sai laban Shani hti ang ai chyum mungga hta na kasa lahkawng Madu Yesu shi hpe hkan tam ai hpe chye ai majaw shi hte hkrum ai shaloi nanyan hpa hpe tam nga ai kun? Ngu ai ga san San dat ai gaw daini e anhte a myit masin hta hpa baw rawng nga ai hte anhte ni kaja wa hpa hpe ra sharawng nga ai ngu ai lam hpe chye na matu saw shaga nga ai lam re ai hpe Wa Sarabyin kawn tsun san lang dan lai wa ai. Wa Sarabyin kawn kahtap na Karai Kasang gaw ntsa lam sha myit na shi a hpang hkan ai masha hpe n ra sharawng nga ai, Madu yesu tsun da ai shi a mungga ni hpe madat mara let tinang hkum tinang san jep ai hte galoi mung shading sharai nna hkan sa nga na hpe sha ra sharawng ai lam tsun lai wa ai.

Wa Sarabyin kawn matut nna Messiah hte hkrum ai, bai hkan tam ai, shi hpang hkan ai ni gaw shi gara kaw nga ai hpe san ma ai, dai majaw Karai Kasang gaw shi kaw sa sa nna Wa maram yu na hpe “to come and see” saw shaga nga ai, anhte ni a makam(faith) hta shi hte hkrum shaga ai, shi the rau galoi mung nga ai lam ni lawm nga ai hpe tsun lai wa ai.

“Karai Kasang a hpang hkan nang ai hta ahkyak dik gaw shi hte rau nga ai, shi hte n hka ai lam rai nga ai”. Wa Sarabyin kawn hpang jahtum hku nna kasa lahkawng Madu Yesu hte hkrum ai mahkrum madut gaw shanyen hpe UGA masha ni hpe kabu gara lam, chyeju hkam la ai lam ni garan gachyan na matu myit shadut ya ai kaba dik ai mahkrum madut re ai hpe tsun lai wa ai.

Wa Sarabyin kawn dau Shani na kabu gara shiga hta lawm ai Kasa lahkawng rai nga ai Andrew gaw Simon (Petru) hpe shi Madu Yesu hte hkrum ai lam hpe lawan ladan tsun dan dat ai, dai hpe Wa Sarabyin gaw Madu Yesu hte hkrum ai gaw Kaba dik ai chyeju re ai lam hte dai hkrum ai ten gaw “shana maga daw hkying mali laman” re ai lam tsun lai wa ai, bai shan yen dai ten hpe galoi mung malap na nre ai hpe mung tsun lai wa ai.

Wa Sarabyin kawn anhte hpe shawng nnan Karai Kasang hte hkrum ai hpe myit dum nna anhte a ra sharawng ai hpe shi hta akyu hpyi ai marang e myit nnan hte shi hpe tam let dai kaw na lu ai kabu gara myit ngwi simsa ai chyeju ni hpe masha u ga ni hpe bai gam garan ya na hpe tsun shadum hpaji jaw tsun shadum lai wa ai.

“Chyoipra ai Kanu Maria e anhte hpe Karai Kasang hpe tam na sharawng ai myit, shi hte galoi mung nga na sharawng ai myit, bai shi a lam hpe htawng tsun na sharawng awng ai myit anhte hta rawng na matu hpyi karum ya rit.” ngu nna tsun Lai wa ai..

By; Fr. Patrick Nawlang Zau Jatt Awng

https://www.vaticannews.va/en/pope/news/2024-01/pope-at-angelus-rediscover-the-joy-of-being- lord-s-disciples.html