Sanpra Ai Masha Tai Ra Ga Ai, Anhte Hpe N-Ngun Jaw Nna Anhte Hte Rau Nga Ai Sanpra Ai Ni

DAI NI NA MUNGKAN HTA SANSENG SANPRA SAKHKRUNG NA MATU,

 KASA A LIT HTE MATSUN DAT AI

1.“ KABU HKINNUM LET AW LAW NGA MU,” ( Mt. 5;12 ) nga nna Madu Yesu gaw shi a majaw zingri hkrum, shagrit hkrum, yu kaji hkrum ai ni hpe tsun ai. anhte hte seng ai yawng shi hpe sak jaw kau na matu, Madu anthe hpe hpyi nga ai. Shi hpyi ai hpe anhte jaw ya jang, shi Madu anhte hpe hpan shabyin tawn ai a yaw shada tawn ai jet ai asak hte kabu aw law ai chyeju bai htang jaw na rai nga ai. Madu gaw anhte hkum shagu hpe sanpra ai masha byin shangun mayu ai. Anhte myit su nna, ram daw kaja ai hku sak hkrung nga ai hte sha gaw shi myit n dik ai. Gara hku sanseng sanpra rai sakhkrung nga ra na matsun manoi ga ni, chyum laika a shawng na laika man kaw shalawam da nga ai. ndai hte seng nna, “nye a man kaw hkawm u; mara shagun n hkrum u ga,” (Npawt. 17;1 ) nga nna Abranham hpe Madu matsun ai.

2.Lawu kaw ngai shadum da ai ni gaw, sanseng sanpra lam hte seng ai lachyum, hpa hpe, gara  hku hkan  galaw shatup ra ai masing masa ni ngu nna ngai n yaw shada ai. mayak mahkak amyu magup shinggrup nga ai ni na anhte a aten hta, sanseng sanpra ai kaw du lu na matu, tatut gara hku galaw sa wa na hpe ngai madung tawn yaw shada nngai. Madu gaw anhte langai hpra hpe, “Tsawra ai myit jasat hta, shi a man kaw sanseng sanpra nna, ra rawng ai lam n nga hkra,” (Ephe.1:4) sak hkrung nga na matu, lata san da sai.

{DAW LANGAI}

SANPRA AI MASHA TAI RA GA AI, ANHTE HPE N-NGUN JAW NNA ANHTE HTE RAU NGA AI SANPRA AI NI

            3. “Anhte a man kaw du nga ai gat shingjawng poi hta, shakut sharang myit marai hte shang na matu,” (Heb.12:1) nga nna ka da ai. Hebre masha ni kaw shagun ai laika hta, Abraham, Sarah, Moshe, Gideon hte kaga kasi tai ai law law hpe madun nna n-gun jaw da ai. (Heb.11;1-12;13 ) “Summwi zawn hti n lu ai sakse tai sai ni,” (Heb. 12:1) nga nna n-gun mi alu shadum da ai. Ndai hti n lu ai sakse tai sai ni kaw anhte a kaji kawoi, kanu kawa, tsawra ai ni mung lawm nga na ma ai, ( 2 Tim. 1;5). Ndai sakse tai lu sai ni gaw, shinggyim gawng kya ai lam n nga ai ni law law a lapran kaw, matut dingyang shagrit shanem myit hte Maduu a ra sharawng ai hpe hkan galaw shatup nna sanpra ai masha ni tai wa lu ai ni rai ma ai.

            4. Dai ni na aten hta karai kasang a man kaw du ningngai nga sai sanpra ai ni gaw, anhte hpe tsawra nga na hte, anhte hte rau galoi mung nga  nga na matu, sadi dung ai ni  rai ma ai. Shingran laika hta makam masham a majaw sat kau hkrum ai sanpra ai masha ni a lam hpe ndai zawn mu hti lu ai. “ karai kasan a mungga a matu hte shanhte a makam masham a majaw sakse tai sat kau hkrum ai ni hpe, shanhte a, tawn hkungri npu e, “ nga yawng nga pra a Madu, sanpra dingman ai wa e, galoi ten e she sa jeyang dawdan ya na n ta?” nga nna nsen shaja let hpyi shawn nga ma ai hpe ngai mu nngai,” (Shrn.6;9-10 ) anhte langai hpra mung, “karai kasang a jinghku ni grup rai wang shinggrup tawn ya ai majaw, kaja wa nga yang, ngai langai hkrai galoi mung n dang hpai ai lit hpe, ngai hkrai n hpai ra na sai. Karai kasang a sanpra ai masha ni gaw ngai hpe makawp maga, madi shadaw ya nna pawn da na rai ma ai,” ngu nna tsun lu nga ga ai.

            5. A lu ai masha shatai ai “beatification” hte sanpra ai masha shatai ai “canonization” lamang ni galaw ai shaloi, shanhte a makam masham hte seng nna magrau grang ai atsam marai, tinang hkum hpe makam masham a majaw sat kau hkrum ai myit marai, masha kaga a matu tinang a shinggyim asak hpe si ai du hkra ap nawng ya lu ai myit jasat ni hpe mu lu ai. Dai majaw shanhte gaw Madu Yesu a kasi kamang hpe hkan shatup ai ni, hpung masha ni e yu mau kabu ya ai ni rai ma ai. hkristian wuhpung ni myit mang langai sha tai wa lu na matu, tinang a asak hpe ap jaw kau ai A lu ai Maria Gabriella a kasi hpe mung myit dum akyu jashawn ra ga ai.

KABU HKINNUM LET AW LAW NGA MU (GAUDETE ET EXSULTATE)

(WA SARABYIN FRANSIS)