San Vincent de Paul a tsawra myit hte garum pahtau hpung shayi sha ni  ngu mying hkam la ai mama hpung ni a matu Casa Santa Marta nawku htingnu hta nawng jau ai misa hkungga na Wa Sarabyim Francis a mungga

2020, May 9, bat 6 ya jahpawt Vatican tsi rung tsi gawk ni kaw htep lahti garum ap nawng nga ai (the Daughters of Charity of St. Vincent de Paul)San Vincent de Paul a tsawra myit hte garum pahtau hpung shayi sha ni  ngu mying hkam la ai mama hpung ni a matu Casa Santa Marta nawku htingnu hta nawng jau ai misa hkungga na mungga hta “Mungkan ga na n-grin ai arawng aya power gaw Karai Kasang a arawng aya power hte nhtan shai ai nga nna jahpra da nga ai.

Dai shani, Wa Sarabyin gaw San Luisa de Marillac hpe myit dum ai misa hkungga nawng ai rai nna, San Luisa de Marillac gaw San Vincent de Paul a tsawra myit hte garum pahtau hpung shayi sha ni (the Daughters of Charity of St. Vincent de Paul) ngu mying hkam la ai mama hpung hpe gaw de hpang wa ai san pra masha rai nga ai. Shi a poi nhtoi gaw lai wa sai March shata 15 ya shani ang ai rai nna, lu sha gam ladaw hta ang ai majaw lai wa sai 2016 ning kaw nna, May 9 de sit da sai lam chye lu ai.

Chyoi Pra ai Wenyi gaw sadan a manawn masam myit hte shi a atsam hte, ja gumhpraw hte, gumlau hkrum nga ai Nawku hpung galu kaba wa na matu makawp maga madi shadaw garum ya nga ai.

Wa Sarabyin shi a mungga hta “Dai ni gaw San Luisa de Marillac hpe myit dum ai shani rai nga ai. Dai majaw Vincent de Paul katsi la hkan sa nna, tsi gawk tsi rung ni hta 100 ning daram apnawng daw jau nga sai sasana mama hpung ni a matu akyu hpyi ya nga ga. Shanhte gaw ndai Vatican tsi rung tsi gawk hta mung apnawng nga ma ai” nga nna shachyan hpang da nga ai.

Mungga hpe Kasa laika 13:44-52 hta na Antioch kaw nga ai Yuda masha nkau ni a manawn masham ai lam hpe “Yuda masha ni gaw mare na du agyi salang ni hte Karai Kasang hpe nawku kam sham ai lahta tsang maigan amyu num sha ni hpe nyit sharawt jashut nhtawm” ngu tsun da ma hpe madi madun dan da nga ai. Shanhte gaw Madu Yesu hpe shaang nna Pawlu tsun ai mungga ni hpe ninghkap asawng asang di ma ai. Karai Kasang a hpung dagu hte seng nna mung Shakawn Kungdawn laika 97(98) hta na “Dai Madu hpe mahkawn ga nnan hte mahkawn mu; shi gaw mauhpa magam amu ni hpe galaw da nu ai! Shi a daru magam n-gun hte chyoi pra ai n-gun a jaw e, shi gaw awng padang hpe hkam la ni ai. Dai Madu gaw shi a awng padang hpe ndau shabra nna;......” ngu ai shakawn kundan ga hte shakawn shagrau da nga ai.

Kasa laika hta Antioch kaw na masha yawng Karai Kasang a mungga hpe madat hkam la na matu rau jawm hpawng de nga ma ai. Hpa majaw nga yang San Pawlu hte Kasa ni Wenyi a garum shingtau a marang e sharawng awng ai hte mungga hkaw tsun nga ma ai majaw rai nga ai. Dai zawn masha law law hpawng de ai hpe Yuda masha nkau ni manawn masham nga ma ai rai nna, Pawlu a hkaw tsun ai lam ni hpe asawng asang di ma ai.

“Maga mi hta Chyoi Pra ai Wenyi gaw Nawku hpung galu kaba wa na matu garum ya nga ai. Maga mi hta sadan gaw Nawku hpung hpe jahten sharun na matu ginjang shatsang taw nga ai. Dai gaw galoi mung bying taw nga ai lam rai nga ai. Marai langai mi kaja lam galaw hpang ai; tim, hpyen wa gaw jahten sharun na matu du sa wa chye ai. Nawku hpung galu kaba wa na matu shakut shaja ai hta mayak mahkak lam law law nga nga ai; sak jaw ap nawng si hkam ra ai ni nga nga ai,” nga nna Wa Sarabyin tsun da nga ai. Karai Mungga gaw nawku hpung rawt jat galu kaba wa na matu rai nga ai rai nna, zingri zingrat lam gaw galoi mung bying pru chye nga ai.

Wa Sarabyin Francis gaw “Karai Kasang a shalan shabran n-gun jaw ai lam hte Mungkan ga na zingri zingrat ai lam lahkawng lapran hta Nawku hpung gaw sharawng awng ai hte hkam la hkawm sa nga ai re” nga nna, hpaw tsun da nga ai. Nawku hpung hta mayak mahkak lam nnga ai rai jang lama ma ra taw sai.

Wa Sarabyin matut tsun ai “Kabu gara shiga hkaw tsun ai lam hpe jahten sharun na matu sadan jai lang ai arung arai gaw manawn masham ai hte pawt shindawng ai lam rai nga ai.” Sadan a pawt shindawng ai gaw jahten sharun ai lam re. Chyoi Pra ai Wenyi gaw Nawku hpung hta pri nem ai lam hpe gaw sharawt ya ai. Sadan gaw shani shagu jahten sharun taw nga ai. Mungkan ga na arawng ana power ni gaw manawn masham ai a lanak hkingrai sha rai nga ai. Dai arawng ana power gaw kaja ai ngu hkam la yang hkam la na ma ai; dai hpe jai lang ai masha ni kaja yang kaja na ma ai; raitim dai arawng ana power hkum nan gaw hkrit hpa rai taw nga ai.

“Mungkan ga na n-grin ai arawng ana power gaw Karai Kasang a arawng ana power hte nhtan shai ai rai nna, de a shingdu de ja gumhpraw ngu ai nga taw nga ai re. N-grin ai arawng ana power hte ja gumhpraw hpe  tengman ai lam hpe shazim makoi magap kau na matu jai lam ma ai” ngu mung shadum da nga ai. Shi mungga jahtum ginchyum dat ai hta “Hkristan masha shagu shi a makam hpe Yesu Hkristu hte Shi a Wenyi kaw ap da ra ai; n-grin ai mungkan arawng power ana hte ja gumhpraw hta nre” nga nna Wa Sarabyin Francis tsun shadum da ai.

#popefrancis

#rvakachinservice