Num Hkungran Sakramentu

NUM HKUNGRAN SAKRAMENTU

  Num hkungran Sakramentu “chyeju kumla” gaw, Madu wa hte madu jan tsawra ai lam hpe shangang ya ai, shachyoi shapra ya ai hte chyeju jaw ya ai rai nga ai. kashin Kamun hkam la sai, numsha hte lasha gaw, Nawku Hpung a htung hte maren num hkungran ai Chyeju kumla/Sakramentu hpe hkam la ai shaloi, Karai Kasang a chyeju hpe kup tsup ai hku lu la ai. Shan gaw prat tup, rau kanawn mazum sana, nga nna ga shaka da sai majaw, ru yak ai nhtoi hta rai tim, ngwi pyaw ai nhtoi hta rai tim, shada da tsawra nna, garum shingtau hkat ra ma ai.

  Dai hta grau nna, daw jau ai amu hta shada da n-gun atsam lu la ma ai. Gade wa yak timung, madu wa hte madu jan gaw, Hkristu anhte hpe tsawra ai zawn, shada da tsawra hkat let dinghku amu magam ni hpe rau gun hpai ai. Hkungran ai Sakramentu “Chyeju kumla” gaw, dinghku amu hta shakut sharang lu na hte, kangka rai kanawn mazum lu na matu, numsha yan lasha hpe garum ai chyeju jaw nga ai.

  Yesu gaw shi a Nawku Hpung hpe tsawra ai hte shi a hkum hpe de a matu nawng kau ya sai. Hkristu a kasi hte maren hkungran sai num hte la gaw shada da tsawra ap nawng ra ai.

  “La ni e, Hkristu gaw dai Hpung hpe tsawra nna shi hkum hpe nan de a matu ap kau ya wu ai hte maren nanhte a madu jan ni hpe tsawra nga mu,” (Eph 5:25).

  “Nadu wa ni gaw tinang hkum hpe tsawra nga ai zawn, tinang a madu jan ni hpe tsawra nga na, sut nga ai. Tinang a madu jan hpe tsawra ai wa gaw, tinang hkum hpe nan tsawra nga ai,” (Eph 5:28). Shada da tsawra hkungga ai dinghku gaw ngwi pyaw simsa galu kaba wa lu na rai nga ai. “Numsha ni e, dai Madu hpe daw nga ai zawn tinang madu wa a hkang ai hku hkan nga mu: kanang rai nme law, Hkristu gaw dai Hpung a baw rai nga ai zawn, dai madu wa mung madu jan a baw rai nga ai: Hkristu shi hkum nan dai hkum hkrang a hkye hkrang la ai madu rai nga ai,”(5:22-23).

  Wa Sarabyin Francis a matsun laika “tsawra myit a kabu awng sharawng lam,” (Amoris Letitia) hta “shi hta yawng hkum tsup ai Yesu gaw, num la num ya hte dinghku de ai lam hpe moi npawt na masing hte maren bai shagrin ya sai (Mt 10:1-12). Num la num ya hte dinghku hpe Hkristu hkye da ya sai (Eph 5:21-32). Tengman ai tsawra myit a npawt, Chyoi pra Wenyi hta dinghku hpe shabyin da sai. Hpan shabyin da aiai kaw na byin wa ai num yan la a ga sadi gaw hkye hkrang la ai labau hta shadan shaleng ya ai.

  Dai hpe Hkristuhte Nawku Hpung hta lachyum jahkum shatsup ya ai. Madu Yesu gaw num la num ya, dinghku de ai lam hpe Nawku hpung hku nna, Karai Kasang hpe tsawra myit a sakse tai nna, myit mang langai sha sak hkrung sa wa lu na matu ra ai chyeju jaw ya ai. Dinghku a asak gaw mungkan ntsa Karai Kasang a hkrang hte maren num hte la hpe hpan da ai ten (Np.Nhp. 1:26-27). Kaw nna hpang jahtum shani, Hkristu Madu hta sagu kasha a dinhku shabyin ai ten du hkra a matu re,” (Shrn 19:9), nga nna tsun da ai. (AL63).

By; Fr.Patrick Hkawng Rae