Nuclear Laknak Madu Da Ai Lam N-galaw Na Matu Nawku Hpung A Sharin Shaga Lam Hta Jat Bang Lam Wa Sarabyin Tsun

Nuclear laknak lang ai lam gaw kyang nnang ai lam, myit kyang n kaja ai lam re majaw Nuclear laknak asung jashawn lam, shing nrai zing kyem madu da lam ni n galaw na matu Nawku hpung a tara laika makam masham sharin shaga lam hta jat bang na re, nga nna Wa Sarabyin Francis tsun dat nga ai. Japan Mungdan kaw nna Roma de bai wa nga yang, n bungli ntsa shiga dap na shiga la ai masha ni hte hkrum shaga lam galaw ai aten ya na zawn Wa Sarabyin tsun dat ai lam rai nga ai.

Wa Sarabyin tsun ai hta, “Nuclear laknak lang ai lam gaw myit masa arawn alai hten za ai lam rai nga ai majaw nlang mai ai lam Kahtawlik Nawku hpung a tara laika makam masham sharin shaga lam hta jat bang na re, n mai lang ai sha n-ga zing kyem da lam mung n mai galaw ai, hpa majaw nga yang dai zawn zing kyem da ai hta lama ma shut shai lam byin pru wa yang, shing n rai mung up du langai ngai, Asuya ning baw langai ngai sin dawn katawt myit n grin ai myit hte lang hkrum dat yang shing gyim masha amyu baw ting hten za mat wa lu ai majaw rai nga ai”

nga nna Wa Sarabyin tsun dat nga ai. 

Shiga dap na shiga la ai masha ni san ai ga san law law hpe mung Wa Sarabyin htai ya lai wa ai. Nagasaki hte Hiroshima hpe mu ai shaloi Wa Sarabyin a myit hta kaning nga hkam sha pru ai kun? Sinna mung masha ni hku nna sinpraw maga na Nawku hpung hpe yu nna lama ma hka ja la mai lam nga ai kun? nga nna Japan Jau langai san ai ga san hpe Wa 

Sarabyin htai ya ai hta: “N htoi gaw sinpraw maga na pru ai, pyaw hpa marin hpa, ntaw ntsang lang mayu ai myit lai ni gaw sin na maga na re. Myit aru yu ai, tinang a prat hpe bai ginhtang sumru dinglik yu ai ngu ai mai kaja ai ma ni sinpraw hta nga nga ai, ndai lam ni hpe sinna mung masha ni kasi yu la hkaja la mai nga ai. Nuclear wan bawm jahkrat hkrum lai wa ai ngu ai lam gaw Nagasaki hte Hiroshima lahkawng yan bung ai lam rai nga ai. Nbung ai lam ngu ai hta, Nagasaki hta gaw moi shaning law law kaw nna Hkristian ni ru jung nga ai shara rai nga ai. Japan Mungdan hta Hkrstian ni zingri zingrat law law hkrum lai wa yu ai, dai hta ndai Nagasaki kaw Hkristian laja lana zingri zingrat hkrum lai wa yu ai shara rai nga ai.

‘Hkristian ni hpe sa ap ya marit’ nga nna ka da ai hpun pyen pa langai Japan Mungdan Sarabyin dat kasa rung kaw nna ngai hpe kum hpa jaw ma ai, Hkristian langai ngai hpe rim la nna sa ap ya lu yang shagrau kum hpa lu la mai ai ngu nna ndau ai masat pa rai nga ai. Jau langai hpe rim la lu nna sa ap ya lu yang grau law ai kum hpa shagrau hkrum na rai nga ai. Nagasaki de du ai shaloi tsa ban hte ru nna shaning law law Hkristain ni zingri hkrum lai wa ma ai ngu ai hkam sha lam ni byin pru ai. Hiroshima hta gaw Hkristian ni n nga ma ai, Nuclear wan bawm jahkrat hkrum lai wa ai mabyin hpe myit dum na matu san san sa du ai lam rai nga ai”

nga nna s ga san hpe Wa Sarabyin htai ya lai wa ai. 

Wa Sarabyin a nbungli, November 26 ya Roma aten shana maga hkying 4:15 daram hta Roma Mare Fiumicino nbungli daru de angwi apyaw atsawm sha du yu wa sai rai nga ai, nga nna Vatican shiga dap kaw nna shana dat nga ai.                  

Source : Vatican News