Ntsen Nhten Lam Ni Hpe Kau Da Nna, Manang Wa A Prat Hpe Hkam Sha Lawm Ga

February 14, laban shani, San Peter Pa hta, “Madu A Lamu Kasa Akyu Hpyi” ten, Wa Sarabyin Francis, dai shani hti ang ai Chyum Laika Mk 1:40-45 hta na manggang kap masha hpe Madu Yesu shamai shatsai ya ai lam, myit sumru woi da ai.

 

Kam sham ai hpung masha ni yawng shada ntsen nhten ai lam ni hpe kau da nna, masha shagu a prat hpe hkam sha lawm chye nga ga ngu, Wa Sarabyin Francis, Madu Yesu machyi masha hpe shamai shatsai ya ai lam hpe kasi kamang tawn let saw shaga shadum jahprang da ai.

 

Mawshe a tara hte maren dai manggang kap masha gaw n san n seng ai wa ngu shawa masha ni hkam la ma ai rai nna, shinggyim wuhpung wuhpawng ni hta mare buga ni hta, makam hpung ni hta shi hpe n hkap la ma ai.

 

Raitim, dai manggang kap masha hpe Yesu Madu Shi kaw sa wa shangun ai. Shi a lata hte ana ni hpe jum ya ai. Ndai zawn galaw ai gaw Yesu Madu shi hkaw tsun ai Kabu Gara Shiga hpe gara hku jahkum shatsup ai ngu ai hpe madi madun nga ai.

 

Tara Tawt Lai Ai Lam Lahkawng

Kasa ni madi madun ai tara tawt lai lam lahkawng hpe Wa Sarabyin sanglang da ai.

 

Tara tawt lai ai lam langai gaw manggang kap ai masha tawt lai ai lam rai nga ai. Shawa hpawng de n mai sa ai ngu tsun da ai raitim, jahka da hkrum ai kaw nna Yesu hpang de sa wa ai. Dai manggang ana gaw Karai Kasang e tara jeyang hkrum ai lam re ngu hkam la lai wa ma ai. Raitim, shi hta Karai Kasang kaw na myit mada lam kaga naw nga nga ai. Kaja wa nga yang Karai Kasang shi hpe jeyang ai n re; Kawa Karai Kasang a tsawra matsan dum lama hte mara dat hkyamsa hkam la lu ai rai nga ai. Shi hpe anhte ni n mai ginhka da ga ai.

 

Lahkawng ngu na tara tawt lai lam gaw Madu Yesu hte seng nga ai. Mawshe tara hta manggang kap masha ni hpe n mai jum, n mai hkra ai ngu hkang da ai rai nga ai. Yesu Madu dai manggang kap masha kaw sit sa nna Shi a lata hte shi hpe hkra ya let shi hpe shamai shatsai ya ai. Ga hte sha tsun na shamai ya ai n re; lata hte ahtawk hkra nna nan shaman ya ai. Tsawra myit kaba hte ahtawk hkra ai. Lachyum gaw hku hkau lam hpe gaw de let rau rai nga ai lam hpe madun let shi a prat hpe hkam sha lawm ya ai lam madun ai rai nga ai.

 

Yesu galaw ai ndai mabyin masa gaw Karai Kasang kadai hpe mung garan ginhka ai lam n nga ai lam, anhte hte tsan ai kaw simlum ai hku nga taw ai n re lam, anhte hte ni htep dik ai shara hta anhte a prat hta matsan dum lama myit kaba hte hkam shalawm ya nga ai lam ni hpe shadum ya nga ai. Ndai gaw Kabu Gara Shiga Laika hta anhte mu lu ai Karai Kasang ni htep ai hku nga lawm ai, matsan dum lama ai, shawang tsawra myit kaba ai, simsa si mani ai lam ni rai nga ai. Dai zawn re ai myit masa ni a majaw Yesu Madu anhte a jiwoi jiwa ni a tara hpe tawt lai ai rai nga ai. Karai Kasang a wenyi hte bung pre ai hku hpan da hkrum ai anhte ni hten run na hpe Karai Kasang n ra ai. Anhte a wenyi hte hkum hkrang hpe hkye la na matu tawt lai lu ai tara ni hpe Yesu hkum nan tawt lai dan ai rai nga ai.

 

Awu Asin Di Nna N San N Seng Ai Lam Hpe Hkrum Hkrit Mu

Dai ni na mungkan hta, anhte a hpu nau ni law law wa shinggyim lam yan masa hta hkan nna shingdu gayin da hkrum ai, shinggyim wuhpawng kaw nna shale hkrum ai ni law law nga nga ai. Dai zawn re ai lam ni hpe anhte a shinggyim wuhpung wuhpawng ni hta shalawm la ra ai ngu Wa Sarabyin Francis shadum sadi jaw da ai.

 

Karai Kasang gaw myit shingran hte sha seng ai n re ai; myit ningmu hte sha shachyaw da ai n re ai. Anhte a shinggyim machyi ningma ni hte n san n seng ai awu asin ni Karai Kasnag hpe hkra machyi shangun na n mai byin ai. Anhte Karai Kasang hpe kam sham ai Hkristan masha ni mung dai n san n seng ai awu asin ni hpe hkrit tsang n ra ga ai.

 

Dai n san n seng ai awu asin a majaw hkam sha machyi hkrum nga ai hpu nau ni hpe mung ta tut shang lawm hkam sha lawm let garum shing tau la ga. Shada n tsen n hten ai lam ni n nga ai sha, manang wa a prat hta shang let hku hkau kanawn mazum sa wa na hkum hkrit ga. Yesu Madu hte manggang kap masha yan kaw na sharin hkam la let shada hku hkau kanawn mazum sa wa ga. Shingtai hkam sha shangun ai lam yan ni yawng hta na lawt lu na matu Karai Kasang kaw akyu chyeju hpyi let anhte a myit masin salum hpe hpaw da ga ngu Wa Sarabyin Francis n-gun jaw da ai hpe Vatican Shiga Dap kaw nna ndau da ma ai.

 

Translated by Fr. Patrick Gawmaw Hkawng Yae

#vaticannews #rvakachinservices

Source : Vatican News

Add new comment

4 + 8 =