Nnan Hpe Gyin Shalat Chye Nna, Dai Gaw, Galoi Mung, Mai Kaja Ai Lam Rai Ra Ai Ngu Wa Sarabyin Tsun Ai

Wa Sarabyin: Nnan Nnan Hpe Gyin Shalat Chye Nna, Dai Gaw, Galoi Mung, Mai Kaja Ai Lam Rai Ra Ai

 September 18, laban shani, San Peter Shawa Pa hta, 'Madu A Lamu Kasa Akyu Hpyi Ga' tsun ten, Wa Sarabbyin Francis, Nnan hpe gyin shalat chye mu, dai nnan gaw, galoi mung, mai kaja ai lam sha rai u ga, nga nna Hpung Shawa Masha ni hpe n-gun jaw da ai.

 Dai shani hti ang ai Kabu Gara Shiga hpe lakap nna hkaw tsun da ai. Madu Yesu a ga shadawn, 'N tara ai kunhting wa' a lam rai nga ai.

 Dai kunhting wa gaw shi a sahte wa shi hpe bungli kaw na shale kau ai majaw shi a shawng lam a matu lawan ladan sumru hkan galaw la ai lam rai nga ai. Sahti wa hpe wa ra ai hka kap masha langai hpang langai shaga la nna wa ra ai hka hpe shayawm kau ya ai nna shanhte shi hpe hkap la wa na matu tau nau hkyen lajang da ai rai nga ai.

 Shi a n tara, n jaw n ang ai sawn suru ladat shaw galaw sa wa ai hpe sahti wa hkum nan shakawn da ai, nga nna Madu Yesu a ga shadawn hta lawm ai.

 Ga shadawn hta na kunhting wa gaw shi a lit magam hta n kang ka ai majaw mung, pyaw hpa lam hta chyu len taw ai majaw mung, shi a sahti wa e shapraw kau ai hpe hkrum katut ai. Raitim, shi a shawng lam prat a matu zen, ja ai hte zai ladat shaw nna, tau nau hkyen lajang shachyip da ai.

 Ndai prat na ramma ni gaw grau nna pyi zet ja zen re ai ladat ni nga ma ai. Nhtoi a kasha ni tai ra ai. Mai kaja ai lam ni hpe gyin shalat sa wa ra ai. Yak hkak lam ni hpe tawt lai lu ra ai. Kabu Gara Shiga a matsun lam hte maren sak hkrung hkawm sa ra ai. Hpu nau ni hpe daw jau ai ni rai ra ai, nga nna Wa Sarabyin shadum n-gun jaw da ai.

 Prat bang shagu na masha ni shada, hpu nau myit majing hte, matut mahkai hku hkau kanawn mazum nga pra sa wa ra ai. Tinang hta nga ai hpe shada garan kachyan, shada daw jau ra ai. Htani htana asak hpe hkam la lu na matu rai nga ai.

 Anhte gaw mungkan sut rai ni hpe jai lang let mai kaja magam, grau nna, matsan masha ni, kaji htum ni hpe garum ya na matu shaga la hkrum ga ai.

 Kabu Gara Shiga matsun hte maren htauli htaula myit rawng ai, zen ja re ai myit hte mai kaja lam ni hpe gyin shalat ga; mungkan sut rai ni hte Karai Kasang a chyeju kumhpa ni hpe jai lang let anhte hkum anhte shatsaw sharawt la ga; mung shawa wuhpawng a matu mung hpu nau tsaw ra myit hpe shapraw jai lang ga; anhte hpe galoi mung garum ya nga ai Kanu Nu Maria kaw akyu hpyi htinglu htinglai hkam la let hpu nau shada garum shingtau magam hta shang lawm nga ga, nga nna hpang jahtum n-gun jaw da nga ai.

Source : Vatican News

By Fr. Patrick Gawmaw Hkawng Yae

#vaticannews

#rvakachinservice