Ngai Madu Yesu zawn Arai Mahkra Hpe Kau Dau Lu Sai Kun ( Sh ) N grin Ai Mungkan Sut Gan Ni Hte Gyit Hkang Da Hkrum Nga Ai Kun

Wa Sarabyin Francis kawn kam sham ai hpung masha ni hpe Madu Yesu gaw ja gumhpraw, arawng aya hte n grin ai tsawm htap lam ni hpe gara hku tawt lai kau lu ai lam hpe hkaja la na matu n gun jaw tsun lai wa ai.

Madu Yesu zawn nang awm dawm byin lai wa ai kun (sh) n grin ai Mungkan lam ni a majaw htawng jahkrat da hkrum nga ai kun?

Wa Sarabyin Francis kawn lai wa sai laban ya shani na Missa hkungga hta kam sham ai hpung masha ni hpe san lai wa ai ga san rai nga ai, Karai Kasang hpang de sit shang ai hta lai nna tinang hpe ka-up nga ai n grin ai ntsa lam ma hkra kaw na lawt lu hkra galaw ra ai hpe aja wa tsun shadum lai wa ai.

Dai shani hti ang ai Mark a kabu gara hpe la kap let shawa masha ni hpe Karai a mungga hkaw tsun ai hpang Madu Yesu hpe n bung ai ningmu hte bai htang ai lam ni madun lai wa ai, dai hta shi a amyu ni gaw shi hpe mana mat sai kun, bai nawku hpung na ahkang aya nga ai ni mung ndai wa gaw tsa dan wenyi ka up da nna shamu shamawt nga ai ngu nna tsun let mara shagun nga ai lam tsun lai wa ai.

Maga mi hku yu ga nga yang Madu Yesu gaw shi a chyoipra ai wenyi a hpung dagu hte mungga hkaw tsun ai hte machyi ai masha ni hpe shamai shatsai ai lam hpe galaw ya nga ai. Dai wenyi sha shi hpe Karai Kasang zawn wanglu wanglang lajang ya ai, dai majaw shi gaw shadawn shadang ai hte masa lam ni n lawm tim  anhte hpe lu tsawra ai hte daw jau lu nga ai hpe tsun lai wa ai.

Wa Sarabyin kawn anhte ni jahkring mi azim sha nga nna Madu Yesu a shanglawt lam hpe myit sumru yu nga ga. Shawng nnan hku na Madu Yesu gaw lusu ai lam ni yawng hpe shi kau da ai majaw shimlum ai hte matsan mayan rai nna nga lai wa ai shi a dai daw buga Nazareth hpe tawn kau da lai wa ai.

Bai shi gaw machyi ai masha ni hte shi kaw sa nna karum hpyi ai ni yawng hpe hpa manu jahpu n la ai sha shamai shatsai ya ai hte karum ya ai lam san san hpe galaw lai wa ai.

Masha e ra ai lam n law nna tengman ga tsun na hpe hkum htingnai u.

Wa Sarabyin kawn Madu Yesu gaw arawng aya hpe mung kau da lu ai.

“Masha law law shi a hpang hkan nang na matu shaga nga yang, shi gaw galoi n shadut nu ai zawn shi hpe karum ya lu na masha kadai kaw na mung karum ya na hpe n la lai wa ai, bai nna shi zawn sha kasa ni hpe galoi mung kaji dik ai maga de tsap ya na hpe sharin ya lai wa ai.

Hpang jahtum hku nna Wa Sarabyin kawn Madu Yesu gaw mying kaba na hte masha ra sharawng ai lam hpe kau da lu ai, dai majaw shi gaw tengman ai lam hpe tsun na matu galoi mung nhkrit n gaya ai “masha ni n chye na ai mi rai rai, myit n kaba ai mi rai rai, grau nna shi hpe udang hta jen noi sat hkrum na rai tim” galoi mung n kaya ai sha teng man ai lam hpe tsun lai wa ai.

 Karai Kasang gaw shi a hkum hpe galoi mung masha e jahkrit shama ai, dut mari la ai, tara tawt lai ai hpe galaw na ahkang n jaw ai hpe tsun lai wa ai.

Madu Yesu gaw ndai lam ni yawng hpe kau da lu ai wanglu wanglang masha hku nna manu dan dik ai lam hpe madun dan lai wa sai lam hpe Wa Sarabyin anhte hpe tsun shadum sharin ya lai wa ai. Lama na anhte gaw tinang hkum hpe arawng aya, pyaw hpa lam ni hte ja gumhpraw ni a gunglau ai hta shang na ahkaw ahkang jaw kau ai rai yang gaw dai ni a mayam anhte tai mat na re hpe tsun shadum lai wa ai.

Anhte ni maga mi hku bai rai yang anhte a salum hta Karai Kasang a tsawra myit chyeju ni hpe hkap la let gau ngwi ngwi jat wa hkra galaw nna, n kaja ai lam ni hpe kau da rai kaja ai lam ni hpe sha anhte a makau grup yin hkan nga ai ni, anhte a nta ni, kun dinghku masha ni hte anhte a wuhpung wuhpawng ni hkan chyam bra wa hkra galaw mai nga ai”.

Dai majaw Wa Sarabyin kawn ngai gaw ndai mungkan lam ni hpe kau da lu ai kun (or) ngai wanglu wanglang rai nga ai masha kun, nye hkum ngai simsa nna simsa shim lum lam ni hte masha ni hpe tawn kau da nna ja gumhpraw, arawng aya hte awng dang ai lam ni a gyit hkang da hkrum nga ai kun? Shing nrai ngai nga ai makau grupbyin hte ngai bungli galaw ai shara ni hkan “fresh air of freedom, sincerity and spontaneity” ni hpe chyam bra hkra galaw nga ai kun ngu ai hpe tinang hkum tinang san yu na matu saw shaga lai wa ai.

Wa Sarabyin Francis kawn Karai Kasang a shanglawt lu ai kashu kasha ni tai na matu  Madu Yesu sharin ya lai wa ai hte maren sak hkrung nna tsawra ai hte karum jaw garum ya chye ai ni tai na matu chyoi pra ai Nu Maria mung   akyu hpyi htinglu htinglai ya na matu garum hpyi let shangut lai wa ai.